Terminada, la muchachada

So, iz isch fertig. Dasch üse letst Itrag. Üses Adieu a üsi Reis...

Mir si wieder in Playa u hei hiä no 2x pfuuset u si a Strand. Dir läset richtig. Pink Hulk isch zrügg zur Ansch cho. DWirkig vom Mitteli het nacheglah u är isch wieder i sini Ur-Ürsu-Form zrügg kehrt. 

Daser nid gad wieder dr Schisser fasst heter sech säuber ufne Biär-Diät gsetzt u dAnsch muess izze di grosse Biär säuber trinke:

Viu grossartigs heimer nüm. No schnäu öppis füre Chrigu u Nicu no es letsts Mau veruckt z'mache:

No guet, Ceviche.

U de no es letsts Merci a aui wo üs si cho bsueche. S'het gfägt mit öich. U a aui wo deheime fliissig üse Blogg gläsä hei. Mir hoffe dir heit chli chönne teilha u mängisch o chli Schadefröid.

Mir fröie üs öich wieder z'xeh u probiere de nid ds fest z'jammere. Mir wüsse no nid wimer de ds Schlag söuä cho, aber das geit de öppe scho. Wi de das söu go mit üs u dere Chöuti xehmer o no gad nid so. Aber öii Wohnige si ja aui gheizt u im Pooc gäbis schiins ging no Biär. Faus mer is de gliich Mau z'lang, z'fest u ds töif i üsem Eländ suule, chöiter is ja de eh Äckätätsch gäh. Wiu mir si ja scho ni ir beste Position zum briäggä ;-)

Merci, Adieu u bis glii Mau

Eis mitgäh

Hola Hola

Mir si zrügg im schöne Mexico. U schön isches würk womer si.

In Belize simer no uf Caye Caulker. Dasch es Inseli:

Füre Sunneungergang heimer is es Wedding-Renewal müesse atue. Uf dere Siite vor Insu hets öppe ei Bar u i dere hei sech zwöi Amis di ewigi Liäbi nöii versproche... How romantic...

Eigetlech heimer vo dere Insu mitem Schiff uf Mexico wöuä. Das geit u duuret knapp drei Stung. Leider isch di verantwortigsvolli Gseuschaft a üsem Abreisetag nid gfahre. Womer üsere AirBnB Frou gsteckt hei das mer di angeri wei näh, het si gmeint: das chöit dir scho. Müesst eifach wüsse das i de letste 2 Mönet ihres Schiff uf hoher See 4x eh Motorschade het gha... 

Mir si de mitem Boot u Bus gange. Dr Bus het wi ging ewig gha... U üs ar Gränzä abglade. Me warti de änä dra. Denkste... Womer si usecho isch wiit u breit keh Spur meh xi vo Bus. Dä sigi go zMittag hole. Het es alts Müetti gmeint. U eh hiufsbereite Taximaa het üs für 20$ uf dMexico-Siite wöuä fahre. Mir hei de dankend abglehnt, ds Schnäggähüüsli gsattlet u si 10min glüffe. Hei niämer müesse bestächä u ds Gäud de ine Kokosnuss u eh Flor de Jamaica Tee investiert.

In Chetumal simer de go zMittag ässä, was dr Ürsu äuä gschiider ungerlah hätti... Chum simer hiä in Bacalar acho, ischs ihm merklech u stündlech schlechter gange:

Da wohne mer u da schlafe mer:

Wi dr er Grössi vom Wägeli chöit entnäh isch ds WC da nid integriert. Das isch 25m übere Rase. U dänkbar ungünstig für Mann mit Durchfall... Durchfall giengti ja no. Kombiniert mit Chötzle isch de das doch eher unagnähm. S'het äuä eine zGfüeuh gha: dä Burst muess izze hei. Iz gämär ihm no eine mit. Daser ja nid uf dIdee chunt dr Flug umzbueche...

Ürsu fingt, das sigi unnötig u unfair. Schliesslech wehre mir üs ja nid gägä zSchicksau, hei üse Flug buecht u sogar scho üse Bus uf Playa. Sei's wie's sei... Eis mitgäh isch haut ging guet ;-) 

Iz het ihm dAnsch vori Beptobismol gholt. U das isch iz halt sis dritte Fläschli xi. Somit chunt dAnsch eleini hei. DÜrsle het sech verwandlet:

Het ds Wägeli i See gschosse u isch i riesige Gümp derfo. Me munklet er isch nöime im Dschungu vo Brasiliä mit verrissne Hose wieder zue sech cho. I normal-Grössi u ohni Erinnerig... Für aui wo Hulk nid kenne... So geit das :-)

DAnsch isch chli truurig muess si iz eleini cho, aber iz isch hüt schön Wätter u das isch ihri Ussicht (usem Wägeli, nid vom Lokus)...

Ja, das isch äuä Ansch's letst oder zwöitlest Itrag. Suechet nech scho Mau eh angeri Kafi-Lektüre ;-)

*würg*

Ansch u The Pink Hulk

Belize, Baby

Greetings from Paradise

Mir si iz in Placencia. Oder im Paradies vom Paradies. Schön isches hiä, huufe Läckereie gits. Aber öb iz das so viu besser isch as aus angere bleibe dahingestellt. 

Mir mache nüm viu u nämä dr Rat vor Petra zHärzä: relax to the maximum. Am Ürsu fallts schwär u er dued de dAnsch scho vorem Mittag zu Biär nötige:

Vor dr bim Blaue Chrütz dAmäudig abeladet möchti är sägä daser hüt 2 Fläschli u gester eis het gha. S'isch aso unbedänklech. 

Wi dr xeht isch nid schön Wätter. Iz rägnäts sogar. S'het aber glich glängt für ne Rotstiich. Das ligt aber vilech o ar Sunne-Salbi womer bim Inder ikouft hei. Bösi Zunge munkle, di isch mit irgend ere stinkende Zinksalbi ufgfüllt worde. 

Ikouft heimer o no. Für ds Läbä deheime chli ufzpeppe:

Wär no niä hiä isch xi, weiss das nid. Aber nach jahrelange Studie hei mir entschiide das di besti, scharfi Sauce us Belize chunt. Über dNr. 2 bis XX laht sech diskutiere. Aber übers Nr. 1 nid. Mir rächnä drmit das üsi Ichöif bis 2017 längä. Knapp. S'muess sech somit öpper denn da härä wage ;-) aber keh Angst, s'isch schön hiä:

Jep, me heimer nid. Mir si iz no wiiteri 2 Täg da u de geits de zrügg is gelobte Land. No vier Täg Tacos, Tortas u Cervezas. Bevor mer de wiiterflüüge uf...

... Ah nei. Isch ja iz de fertig...

Ansch u Ürsu

Imam-Vögu

Mir si gad ufem Wäg nach Belize City. Hei wieder Mau eh guete Bus verwütscht. Vou Gringos u as letsts abgholt worde (mit 3/4h Verspätig) u entsprächend dSitze ir Mitti döfe ufklappe zum is niederlah. Gracias. Ar Gränzä heimer de uf de Belize-Siite üser letste Quetzalitos i Melone, Pepinos u Radisli igsetzt. Natürlech mit Orangesaft u Salz. Wi sechs ghört. Je 4 hets koschtet u dr Ürsu het de am Mandli di 2 letste Vögu wöuä schänkä. Er söui vier Banane näh. Da nume Affe gärn Banane hei, heter de ei Öpfu wöuä. Aber nix da. 4 Banane < 1 Apfel. Eifach das dr das no wüsstet...

In Belize si im Übrige dZöllner super Type. Me wird hiä gfragt: how long will you stay in paradise? Freiwillig heter is de 2 Wuche länger i Pass itreit. Gäud heter o kes wöuä. Äuä im Wüsse drum das de bir Usreis 30$ fällig wärde. The price for paradise.

Mir si di adrohte Ruine go luege. Zersch Yaxha:

Ded chame nume mitere Tour härä. O hiä simer ersch 30min z'spät mitem Taxi abgholt worde. Fahrer, Guide, eh Gringo u mir. Nachdäm mer de ds Stedtli scho verlah hei, het de ds Telefon glütet. S'sige da 2 vergässä gange... Guet, zurück auf Start. Dr Guide hinge ine u mir de z'viert ufs Rücksitzli. Das het de am Herr Chänu weni behagt u er het agfange dr Guide azschnouze. Dä isch scho agsüüret xi, wiu är vor Ansch eh Rüffu kassiert het (het is füre Sunneungergang bir akündete Sunset-Tour äxtra wöuä höische). Missmuetig isch de es Minibüssli engagiert worde u mit 1h Verspätig simer de los. Di zwöi Vergässne si es jungs Russepäärli xi. Dr Typ het de unzverrode sini riesigi Täsche nid wöuä im Charre lah. Niämer hets begriffe, bis me z'oberst uf dr Pyramide isch gstange, ds Täschli isch g'öffnet worde u tara:

Eh chlini Drohne. Kouft: bim grosse Satan. Made in the US :-) zur Fröid vo üs, heter is de uf Facebook g'added u mir presentiere. Sis Photo:

Nice, eh? Di zwöi druffe si se übrigens. Dr Drohnepilot isch im Übrige dChatz. Eifach no für dGliichstellig.

In Tikal simer o no xi u da heimer nech o no eh Steihuufe:

Ded heimer de no ewig nach Coaties gsuecht (Nasebäre). Leider aber nume Turkeys gfunge. Nume: wän interessiert scho eh Vogu mitemne Chropf...

Zum zMittag heimer de eh Kokosnus ergatteret u nachem us-schlürfe muess diä ja no gspalte wärde fürs Fleisch. Das heisst uf spanisch: abrir el coco. Das isch de mitemne Grinse gmacht worde. Erklärig fürs Grinse: Bedütig vo te abro el coco isch - i spalte dr dr Schädu (nid dKokosnuss). Haha.

S'het is de rächtziitig ufe Sunneungergang hei glängt. U näb üsem Zimmer isch dVogumoschee xi. Jede Abe isch ded dr Muezzin druf u het sini Schäfli zue sech pfiffe. We de au da si xi, het ds Abegebät gstartet. Eh huere Krach. As gueti Patriote hei mir da gad a üsi Abstimmig gägä dMinaret dänkt. U das üser Abstimmige eifach nid gemäss em Voukswille umgsetzt wärdä. U das sofort u vou-umfänglech. Eh Schweinerei :-) us Angst um dä schön Boum u di Vogugmeinschaft heimer is de a Boum köttet. Nid das no eh SVP-ler oder eine vor PEGIDA uf dIdee chunt dr Volkswille umzsetze u dä Boum im Sinn vor Abstimmig umztue. Hahaha. Mir merke: scho wieder eh politischi Botschaft... Sch***** :-)

Faus öpperem dIronie entgange isch, sigi hiä für di humorlose Läser erklärt: mir stimme nid rächts u hei o nüd gägä Moschee!

Adieu

Ansch & Ürsu

A Guate, a Guate, a Guate

Das schreie si nis izze wieder zue. DChickenbus-Fahrer rüefe das we si uf Guatemala-City fahre. 

Das isch zwar i di angeri Richtig. Aber ds Land stimmt ämu. Mir si izze in Flores, üsem letste Stopp in Guatemala. Hiä simer drei Täg u mache hüt u morn no Usflüg zu Steihüüfe (mir xeh di entsetzte Xichter vo de Läsende: iz chöme diä scho wieder mit däm).

Äbä, zu Flores. Dasch es Stedtli ufere Insu imne See. U so xehts us üsem Hotel us:

Dr Wäg da härä isch chli müehsam u beschwärlech xi. Vo Honduras us heimer eh Ewigkeit gha bis mer im 250km entfärnte Rio Dulce si xi (7h). U vo ded no Mau 4h für 200km (dHeufti drfo stehend im Bus).

In Rio Dulce heimer 2x übernachtet u s'üs im Dschungu bi Micheladas la guet gah:

Eh Usflug heimer o no gmacht. Uf Livingston:

Di Biudli si am Rio Dulce nah. Eh Stopp bi heisse Schwäfuqueue heimer o no gmacht. Ded si aui Lüüt dri ga bade. Aber nachdäm mir dFüess badet hei, heimer is entschide dases nid dr Wärt isch sech umz'ziäh. Stattdesse simer id Kokosnüss: 

U in Livingston isch Garifuna-Culture axeit. Das isch sones Karibik-Ding. Mir wüsses o nid gnau. Das si di Schwarze a de Karibik-Küstene vo Zentralamerika. Di hei ihri eigeti Kultur u Sprach (öppis zwüsche Spanisch, Änglisch u weiss-dr-Tüüfu-was). U di mache när sörigs Ässä:

Das isch Tapado. Eh Fisch- u Meerfruchteintopf mit Kokosmiuch u Chochbanane u Kokosbrot. Dr Ürsu hets gad uf sini To-Learn Choschliste ufgno und weners de cha, chöiter nech de säuber ilade.

Jup, das wärs o scho wieder. Glii müesster de wieder Ziitig läsä. Mängä Blogg wirds nüm gäh.

Ansch u Ürsu

Honduras

So, mir hei z'gfährleche El Salvador verlah u si izze im no gfährlechere Honduras :-) hei aber zersch no paar Sache us El Salvador. 

Das isch dr Cristobal (spanisch für Christoph, u da kenne mer ja eh paar...):

Cristobal het amne Müetti ufem Märit ghört u isch bi ihre ufem Märitstang desumetanzet u het fröhlech vo aune Sache probiert wo si när verchouft het. Em Läbäsmitteler ir Schwiiz chunt do äuä gad ds Ougewasser.

Mir hei de no dMöglechkeit gha ufne Vulkan oder ane See z'ga. Mir hei is de füre See inkl. Micheladas entschiede.

När simer uf Honduras, womer dCopan Ruine gö go aluege. Dasch es Züüg xi zum organisiere u mir si schlussändlech mitemne Büssli gange u das het di akündete 4h tatsächlech ighalte. Hiä isches schön u o wieder sehr gmüetlech:

DTrottoir si immer chli höcher glägä, was dAnsch de zu Agriffe ufe arm, hiuflos Ürsu verleitet. Dä probiert se zwar sit 1 Jahr (erfouglos) z'erziäh. Was chli abträglech isch, isch we är se wott packe u drbii ine Hundsgagu steit. De isch när aui herti Arbeit verbii...

Das isch dUssicht vom Mirador im Dörfli:

U di Hagle da wohne bi de Copan Ruinas u triibe ded ihres Unwäsä. Es isch eis Gekeiffe u mir hei beidi gfunge, das dr Ürsu eidütig eh Papagei wär, we är eh Vogu wär ;-) ganz eh schöne mitere Riise-Gäuä. Hahaha

U dasch us de Ruine. Copan gilt as Paris vo de Mayas. U das wäg de ganz vilne Stukature wos hiä überau het:

I di einti Pyramide chame ine. Natürlech muess me für i Tunnu zahle. 15$ chostet dr Itritt u de wei si für 100m Tunnu no gad Mau so viu. So öppis löh mir üs natürlech nid la biätä u si de gmüetlech um dPyramide gspaziert u hei dr Usgang unbewacht vorgfunge. Natürlech simer de ine u ganz unschuldig zum Igang us-cho. 

Iz mache mer is morn ufe beschwärlech nach Rio Dulce in Guatemala.

Häbät eh schöne Sundig.

Ansch u Ürsu

Nid politisch wärde...

Me söu ja nid no nöis afah u uf di alte Tage no politischi Botschafte uf dä Blogg ufnäh... Aber öppis vor Wäut berchömemer ja glich no mit. O wes nüd schöns isch :-(

Iz heimer doch no öppis xeh wo mir u huere geil finge. Drum chunts iz glich no, üses politische Statement:

U das wärs o scho.

Wiiter geits mit üsne Erläbis, wo nid ussergwöhnlech aber SCHÖN si: Strand, Meer, Biär, Schlafe.

U natürlech üses spektakuläre Bungalow. Mit Sicht ufs Meer u ufe Pool:

U da chame o fougendes mache am Morge: diräkt usem Näscht i Pool gumpe :-) das Video chöiter bir Ürsle nachefrage, mi cha hiä nume Föteli ufelade.

U hiä no öppis meh für dSurfer:

Natürlech hets de o no öppis gha für di Dicke. Hiä wei eim aui eh Pupusa Loca adräie. Das sigi ds non plus ultra u drum het dr Dick i däm Reisegrüppli das natürlech müesse usprobiere:

Da isch när eifach aus dinne was si gad hei: Shrimps, Chicharon, Queso, Frijolitos, Ajote und und und. Es Gedicht!

Iz simer in Santa Ana. Das isch üsi letsti Station in El Salvador. Hiä gömer morn ane See oder ufne Hügu. Er Hitz nah wirds äuä dr See wärdä ;-)

Es isch schön hiä:

U friedlech. Im Gägäsatz zu was me deheim so über das Land ghört wirkts hiä weder gfährlech, no bedrohlech. Mir hei o mitem Hosteltyp gredt u gfragt wi das so sigi mit dene Maras (isch dh Gang vo hiä). Er het i 7 Jahr woner hiä isch zwöi vo dene xeh (me erkennt diä a de Tattoos wo si überau - o im Xicht hei). 

U eh lustigi Vegi-Gschicht heimer o no. Si ine Comedor zum zMittag u ded ad Thecke. DAnsch het de läckeri grüenl Bohne, Salat u Riis wöuä. Im letste Momänt aber no öppis im Riis entdeckt u de gfragt: hay carne? Nenei. S'heigi keh Fleisch. Druf abe isch de ufs einte Stückli zeigt worde u dr jung Herr het gmeint. No es carne, es salchicha. Ürsu fingt: isch ja Wurst ischs Wurst :-))))))

Bis nächst Mau.

Ansch u Ürsu