Long Blogg

Ahoi

As ersts ändlech öppis womer scho lang hei wöuä poste:

När heimer eh Ladig Halloween. Natürlech heimer Maske kouft. Sehr zur Fröid vor Ansch u zum Missfalle vom Christoph. Dr Ürsu isch aso nüm dr einzig wo gstämpfelet het i dene Ferie...

Am Abe simer de useghöcklet u hei de Ching Mars, Snickers u Twix verschänkt. Wüsster was das isch?

Dä links isch dr verböistig Christoph. Er het nämlech üs drü agherrscht me mögi de Goofe nume no dMilky Way gäh. DSnickers u dTwix heigi är o gärn :-) när heter i Sack glängt, sech di Snickers gschnappt u se i eim Biss ir Hamsterbacke versorgt. 

När simer a Halloween anes Strassefest u hei ded eh geili Band gratis chönne luege:

Dr Name isch is entfalle. Aber es isch äuä Marcos Huusband xi... Au hei Blutfuess gspiut. U Blutfuess isch am am Häuptling Plattfuess sini Liäblingsfuessbekleidig. Bi jedere Möglechkeit wird hiä Blutfuess umeglaueret. So das de z'obligate Fuesswäsche vorem iischlafe o räntiert. Dr Dräckigkeit vo de Füess entsprächend artet das Spatzebad de o hüüfig us :-)

När het dBand üs no erfröit mitemne geile Spruch. Entsprächend de religiöse Asichte het sech eine as Papst verchleidet. U de folgendermasse es Ständli gwidmet übercho:

- The next song is for the pope. 

- Yeah, look.  He's drinking on the job. 

- Ah, my god doesn't give a shit.

Mir si de in Houston 2x go Sport luege. DAnsch heimer o mitgno u si het das Spektakel tapfer la über sech ergah. Ohni sech z'fest mit Biär chönne z'betäube. Das isch i dene Stadie nämlechlech flüssigs Gold (chost öppe 10$). Das het dr Marco nid derfo abghalte sis fasch komplett z'läärä. I dene Stadie fülle si di Biär vo unde. Sprich: si hei eh offne Bode u eh Art es Magnet wos ufedrückt zum z Biär inezlah. Das xeht in etwa so us:

Dä Finger düütet ah was passiert isch. Dr Marco het bim trinke afa a däm Loch umenifele u wiu ke Wiederstamd isch cho, heter de ging me drückt u plötzlech nass Finger gha. O vo däm heter sech ni la entmuetige u ersch ghört wo ds Biär über Schue, Hose u Vordersitz gläärt isch :-)

Für Götschis Grosstat heimer ne gad uf si wohlverdienti Thron ghievt:

Wius is nachem Basketball-Spiel so dürstet, das mer no id Hüüser si. Per Zuefall simer im Black-UG glandet. Ded hets fasch gratis Biär u gueti Unterhaltig i Form vo dicke, tanzende Lüüt gäh. Dr Nachteil: ir Toilette het dr Tod i Form vo Erstickig gluuret. Dr Götschi isch as ersts xi u wo dr Äschli as nächst isch gange, si plötzlech näb em Gstank drei dunkli Gstalte mit ihm am Pissoir gstange. Vor Chlupf hets ihm dr Abchlemm-Musku zämäzoge u er het müesse use ga bisle, süsch wärer verstickt. Glücklecherwiis hets es Sekte-Houptquartier ir Nöchi gha, de heter sech ir Rueh chönne erliechtere.

In Houston heimer übrigens geili Mitbewohner im AirBnB gha:

Chiiiiiiicken. DAnsch wott eh Wohnig mit Huehn-Möglechkeit. Weder aso öppis ghöret...

So. Iz weimer nech nüm länger vor Arbeit abhalte ;-) mir hei nume no öppis. Hiä isch z'beste Halloween-Kostüm: der Lampenmacher (Frage bitte a Karli, Nicu, Cyru, Nik, Chrigu etc.)

Aeschlimaa, Götschi, Ansch u Ürsu

Freigeister (passend zu Halloween)

Hi There

Aso as ersts üsi Uflösig vom Rätsu. Bart u Renne hei viu errate (Running Man oder Bud Spencer)... Aber Bart, Renne u USA kombiniert hei nume zwe gschafft. Wär rennt dür Amerika u berchunt meh u meh  Mitspringer? Richtig. Däm wo me glehrt het: 'life's like a box of chocolates. You never know what you gonna get'. We ders iz no immer nid wüsst, de wirds Zyyt wieder Mau eh Fium z'luege. Das Mau eh wahre Klassiker, Nicola :-) 

DAntwort: Forrest Gump. DGwinner: Cyru (mit Abstand). Säru (dasch o so eini wo da ir letsti Ging uf däm Blogg umegeisteret).

Mir si izze in Austin, er Houptstadt vo Texas. Hiä heimer wieder es AirBnB u das Mau es ganzes Huus. Latürnech het nid aus chönne klappe. Es warti es Zahleschloss mit emne Schlüssu dinne vor üsere Tüüre. Guet, mir gmüetlech acho u was finge mer vor: weder Schloss no Schlüssu. Z'WIFI Passwort heimer de gha u chönne Internet azapfe. Hei dere Müette gschribe was eigetlech los sigi. U di isch de 30min später da xi. U was macht me mit so viu Ziit u uf privatem Grund in Amerika? Richtig. Man konsumiert ein Bier im Freien :-)

DAnsch macht im Übrige nume us Protest sone Chopf.

Was a üsem Huus o toll isch: me daf nid choche. U für das ds enforce dued me de eifach keh Gasfläschä ungere Herd. Aber weit gefehlt weme meint mi chönni üs Freigeister der ersten Stunde da ischränkä. Da nämä mir ohni z'zögere üse Gas-Chocher füre u choche haut im Garte. Genau so geit das...

Was o no isch gstange: no furniture moving. Natürlech heimer is das o nid la gfaue u suber usegstuehlet:

Morn isch übrigens Halloween u mir hei säubstverständlech o scho ikouft faus öpper sötti a üses Türli cho chlopfe. Mir hei gfunge mir löcke de diä ine is Hüsli. U de gits de chli Feuerwasser für di chline Trapper...

Dr Ürsu wett de vor Co no es Biärli. Vorgester simer imne Outlet xi u er het de dr Götschi im GAP Lade vom Hosechouf chönne abhalte. Es bruuns Hösli i dere Währig...

... het sech dr Marco wöuä zocke. Dr Ürsu, wo o immer serig wott, het sech de a modisch Ratschlag vor Ansch erinneret u ihm das usgredt. DAnsch seit immer: wes nid es schöns Bruun isch, ischs im Zweifelsfalle immer beige. U beige faht ja o ah mit besch*##%

Dä Herr i Götschis Hose heimer im Übrige ire Blues-Bar xeh. Ded heter sini Tanz- u Verfüehrigskünst (trotz Ehering) are dicke, 20-Jahr jüngere, praktiziert. Dr Ürsu het de nachem vierte Song wo genau gliich dönd het (aso eifach i sine Ohre drei gliich u eine ähnlech) afah stämpfele u so het me de das Lokal (unter Protest) verlah. U das bevor mr xeh hei öb das Hösli Wirkig zeigt het.

Eh Nachtrag zum Riverwalk in San Antonio heimer o no. Mit troumwandlerischer Sicherheit het üs dr Marco de o no a di guete Steue in SA gfüehrt. Dä Riverwalk wird nämlech je wiiter me usserhalb vor Innestadt geit ging schöner. U ganz usse hets de es Quartier mit schöne Hüüser, kuule Restis u Mikrobrauereie:

Weme natürlech es Bierli nimmt muess me de o ga bisele u das macht me, wi deheime o, ir freie Natur (Freigeist).

Di zwe hei de chli pressiert. Mir si drum nid sicher xi öb ds biisele ir Öffentlechkeit in Texas nume mit Stockhiebe oder gad mit dr Giftsprütze g'ahndet wird.

No gad öppis meh us SA:

Womer, nach Kaffee dürstend, hei dGleis wöuä überquere isch dä Zug cho. Gefühlte 10min heter öppe 200 Wäge i Schritttämpo vor üs düre zoge. Dr Krach het de o es wiiblechs Rumpustiuzli gweckt. Di het sech gad näbem Bahnübergang es Nästli gmacht u de am Zug schwankend i lallendem Südstaate-Dialäkt au Gottschand nah gschroue. Hin u här träppelet isch si o. U üs het dünkt das sigi äuä wiu si het müesse go biisle u däm Gschäft i üsere Gägäwart nid het wöuä nachegah. Hahaha

Politisch wette mer o no öppis mitteile. Hiä düe aso o dRepuplikaner dSüdamerikaner ungerstütze:

Muahaha. Oder mit ne Gäud mache. Je nach Uslegig :-)

Cheers,

Aeschlimaa, Marco, Ansch, Ürsu

Europa-Park

Grüessech zämä

Mir hei wieder Mau es Bilderrätsel für öich: wele Fium wird hiä thematisiert?

Z'gwinne gits das Mau eh Rundi IPA im Pooc :-) wi sechs ghört für Amerika.

Mir si izze im San Antonio u gester am Riverwalk xi. Das isch sone berüehmte Flussabschnitt wo gemäss LP usxächi wi es Stück Europa. Ähä. Härä gschuenet u was finge mer vor? Dr Europapark. Sogar elektronisch atribnigi Schiffli hets wo ded druf umefahre. Das nid no gad 'this is halloween, this is halloween' as Musigthema gspiut wird gränzt anes Wunder.

Ab so viu Kitsch heimer is de gad müesse uf dStrass obe am Fluss zrügg ziäh. U was fingt me ded vor? Ds genaue Gägäteil. Es Batallion Bättler u süsch verlorni Seele. Isch äuä, wi so hüüfig, ds Gäud ine Attraktion versänkt worde statt i nachhaltige Arbeitsplätze.

Mir heinis de zrügg ine angere Stadtteil verzoge u ded eh Biärgarte gfunge mit geile Oldschool-Stüehl u ere grosse Anzahl Bier. Das het üs passt u mir heinis de ded stationiert u sogar chönne ds Football-Spiu luege. Saubere Sache.

Hiä merkt me übrigens trotz Gross-Ufgebot vo de Republikaner das Mexico ganz nöch isch:

U eh lustigi Gschicht heimer ou no. In Dallas simer dShopping-Tiär ga frei lah u hei de as Sterchig no eh Starbucks ufgsuecht. I jugendlechem Übermuet hei mer is de allerhand Nämä usgsuecht wo dAmis ni chöi ussprächä :-) schlussamänd het de dr Aeschlimaa vor dr Ansch ohni eh Miene z'verziäh mit folgendem Name bstöut:

DAnsch het sech müesse abwändä vor grinse u mir si de aui in freudiger Erwartung bim Threse ga ufe Versprächer warte. 'Freidolin' oder so öppis heimer erwartet. Mit no glassnigerer Miene as dr Aeschli het de dr Cafetero üs üsi Raglette Kafi überreicht u üs es perfekts Fridolin verchouft... So geits mit Lüüt verseckle.

Adios

Aeschlimaa, Götschi, Ansch u Ürsu

Eh Rundi Chue

Aloha

Aso as ersts heimer es Biudli vo üsere letste Camping-Station. Öppis für dHeimat: Näbu.

Kenneter, oder?

Gester heimer de üse Bsuech döfe go abhole. U gad as ersts es Biär usem Schoggi-Miuch Fläschli müesse probiere:

Mir si de ad Stock Exchange Coboy (merke: kein Schreibfehler sondern so wime das usspricht) Meile. As ersts het üs ded das super Schiudli erwartet:

U mir si sicher, das meine diä ärnst mit de Knarrene. Läck hei diä aui Klischees bediänt. Jede u jedi het Coboy-Stifeli agha u di meiste hei ds Natel im Revolvergurt igsteckt gha.

Wis so isch im wiude Weste muess me ja dBsitztümer (dChüe u Rösser) entsprächend kennzeichne. Sprich es chliises Branding mache. Di Tradition wird natürlech gläbt. U so berchöme aui 21-jährige Froue bim Itritt eh Stämpu. Das me de o gad xeht öb me se daf ifah oder süsch gsibletti Luft muess ga schnuufe...

Natürlech simer de o a Main Event. DAnsch het eh Rundi Chue usgäh u dr Äschlimaa zBiär drzue.

Das hiä isch üsi Liäblings-Chue xi. Säubstverständlech isches eigetlech eh Muni. Das wüsse mer. Schliesslech dued me dene Viecher ja ds Schneebele abbinde das si de o würklech veruckt si. Das ziäht natürlech o. Knappi 8sec hei si im Schnitt chönne uf dene Chüe höckle. När si si in hohem Bogen abgworfe worde. Diä da obe hets schneuer gschafft :-) u het de no probiert ufs Mandli druf ds stah u ihm mitem Horn eis z'gäh. Dr Muni het de dBeschnüerig vo sim Glied o no abgworfe. Isch umegstouziert wine König. Use heter o ni wöuä u isch ersch abtuubet wo si eh zwöiti Chue hei ineglah u er dere nache isch.

No ne Iischub vom Äschlimaa: ds Chäubli chunt uf dWäut. De ischs es Chäubli. Wes afaht Gras frässä ischs es Gusti. We ds Gusti es Chäubli brchunt ischs es eh Chue u zäih zum frässä. Uf au Fäu ändets as Stiiiik (wi dr Nicu würd sägä). Aber Stiiiik isch wi 'i go for', 'i dömp', 'Ggoboy' u 'Schöttl'... Aso wi Röifus Götti würd sägä: i speak english ä blätzwiit.

Di Bull-Rider si de o sehr beliäbt bi de Chatze. U o hiä gilt: eh Hippster muess me si. Süsch gits da nüd...

Für Ürsu's Pap heimer no öppis xeh. We är de nüm cha loufe, düe mir ihm de sone Rollator zueche:

U no ne chlini Anekdote... Mir hei vo üsem begränzte Budget es Hüüsli kouft:

U das im Casa Känu fröidig mitteilet. U de isch das ume cho:

Me heigi o scho eis :-)

Hahaha. So, uns dürstet

Aeschlimaa, Götschi, Ansch u Ürsu

Muus im Sack

Bi üs isch wieder einiges gange. As ersts heimer no eh Muuse-Gschicht. Het ja eh Haas am Ürsu si Schue agriffe. Heimer gmeint. Isch aber äuä eher eh Muus xi (di stöh ja uf Chäs). Mir hei üses Tupperware schön gfüllt u uf nes 1m80 höchs Müürli gstöut. Chum simer im Zäut heimers ghöre nage. Mir usegsecklet aber nüd xeh. Nume üses Tupper het Biss-Spure gha :-) guet, di Sach im Kofferruum verstout u zrügg is Nästli. Paar Minute später fahts dusse imne Plastiksack wo üse Vorgänger het la ligge afah tue u mache. Mir gmeint sig eh Waschbär u mit de Lampe ga luege. Was xeh mer? Eh Sack wo umefreeset u zabblet. U wär isch ded drin? Eh dicki Muus. Isch ines Loch ine u nüm use cho. Mir hei de churz überleit öb mer se as Straf für üses verbissne Tupper söuä la zable. Hei aber de när dGrillzange gno, dä Sack packt u se chönne usebugsiere.

När simer id Carlsbad Caverns. Das si riesigi Höhline:

U mit riesig meine mer 3.2km Loop chame ded ungerirdisch mache. Das sig es Walfisch-Muul. Sit Jurassic Park weiss me aber: Tyranno-Saurus, nid? Da di Beschilderige aber no us de 70er Jahr si, het me das haut no nid kennt...

DGägänd hiä xeht übrigens so us:

Ganz viu schöni Kaktüs :-)

Ufem Wäg id Caverns isch üs no das begägnet. Offebar het eh liäbi Fründin vo üs emigriert u isch izze Zuckerbäckerin :-)

Weiss äch dr Fäbu das?

Am Rio Grande simer no xi. Aso izze würklech nume no eh Steiwurf wäg vo Mexico.

U ded heimer no di Schnüggle xeh:

Wär dänkt 'ah, z'dicke Päärli het ihre nächst Verwandt, das gemeine Schwoin xeh', der irrt! Das hiä isch eh klassische Trick vor Natur. Das si nämlech Javelinas und nid nöch mit de Söi verwandt. Nabelschweine sis, verwandt mit de Pekari. So isch das.

U luget, di heimer o no xeh:

Hiä simer im Übrige ir gröschte Wüesti vo Amerika. U was machts we mir da si? Richtig. Es rägnet. 4.9 inches (weiss dr Tüüfu wi viu das isch) rägnets hiä pro Jahr. Gester u hüt hets öppe 6 grägnet u üs fasch zZäutli überschwemmt. Danke. U ire Wüesti hets o keh Lüüt u fouglech o keh Light Pollution. U drum bout me hiä es Observatorium härä. Da chame de ga Star Party mache u brav wime isch, dued me sech de da voramäude u muess gad zahle... Blöd isch natürlech am Rägä, daser meistens us Wulche chunt. U wo Wolke da kein Stern. Drum hiä eifach es Grät:

Me het üs de drfür süsch paar Infos gäh womer aber ufgrund vo mangeldem Vorstelligsvermöge (sprich: di tüe dLänge- u Breitegrad mit irgend öppis multipliziere u i Himu projiziere, oder so) nid hei chönne verarbeite u spiichere. Was mer no wüsse: i 50 Mia. Jahr stöut dSunne zLiächt ab. S'längt aso no für üs ;-)

So, das wärs. Mir gö i Kuchen:

Breaking Bad

Ahoi

Da mir in New Mexico si, daf as Serie-Fans natürlech eh Iitrag über Breaking Bad nid fählä:

Dä nätti Herr da obe isch dHouptfigur (Walther White) . U faus dr dä nid söttet kenne, wäris Ziit di Serie Mau afah z'luege. In churz geits drum das är unheilbar chrank isch u usgehend vo däm is Drogegschäft iistigt. Es louft de aus angers as är das het vorxeh u steigeret sech ine ganz wiudi Sach.

Apropos wiudi Sach: hiä in Amerika gits eh wunderschöne Usdruck - Road Rage. U di Wuet hei mir döfe erläbä :-) mir si gmüetlech amne Flüssli in Santa Fe spaziert u zum ne Rotliächt cho. De heimers ghöre futtere. Adieu het da eine keifet. Wine Wald voll Affe. Mir natürlech agnoh es sigi Mau wieder eine wi Säru u Fäbus Ex-Plaggeist (di het regumässig Mitts ir Nacht unger ihrem Fänster Zetter u Mordio gschroue). Eh Verwirrte aso, wo Ziit mit Säubstgspräch usfüllt (git aso hiä eh Huufe vo dene - wiu me i God's own country äbä me uf sich luegt as auf den geliebten Nächsten). Aber nenei! Am Rotliächt heepet das Mandli us sim Pick Up use. Beschimpft dr Vordermaa u wo dä zPäch het daser nid übers Rotliächt cha, geit hinger ihm zTürli uf und ds erboste Mandli secklet füre u donneret ihm angers eis ad Schiibe :-) vouer Furcht isch de dr Beschumpfnig uf ds Gas u ab durch die Hecke. Dr Wüeterich het ihm de no es 'Yeah right, Go back to fucking Texas' nachegschroue. Hahaha.

So xehts übrigens in Santa Fe us:

U ded simer o no es Stückli uf dr berüehmtiste Strass vo Amerika glüffe (nid gfahre - haha):

Santa Fe isch bekannt für sini Kunstgallerie. Mir zwöi Fiuzlüüs si natürlech i sone Gallerie ine u hei brav di Kunst bewunderet. 28'000$ het de es Väseli mit Native American (jawohl, das si dIndianer) Verzierige kostet. Mir hei de üses Ruckseckli langsam abzoge und füre zum Buuch gno. Me wott ja nid no es Väseli abeschiesse wo me as üses Reisli choscht :-) da isch eh Verchöifer uf dAnsch los u het gfragt 'how's it going?' Uf ihres 'good how are you?' Isch de nachere Kunstpouse es 'Amazingly well and expect to get better' cho. Ähä, es Sprüchli istudiert, hä? Mir hei de gfunge er sägi das äuä wiu er hofft das mir eh Vase abedonnere u si de gflüchtet. 

Dr Ürsu het de o gad Kunst gmacht:

Das wunderschöne Foto wäri aso z'verchoufe u ds Gäud würd ine guete Zwäck investiert. HouHouHou, i üs natürlech. 

Er het sech de o no öppis kouft, es T-Shirtli für chli weniger Batzeli:

Für aui Bünzlis wo finge mi sötti üser Problembärä ir Schwiiz abschiesse... Hiä heiter sis Statement!

Über Roswell simer de o no gfreeset u ded ine Diner ga zMittag ässä u is UFO-Museum:

Hiä hets drum Aliens. Ganz eh Huufe. Mir hei aber kener xeh. Aber Bewiise heimer gfunge. ürsu's Schue hei si entfüehrt u verbisse. 

Z'einzige was mer xeh hei isch eh Huufe Chüngle um üses Zäutli :-) das si se äuä xi, di Aliens!!! 

Öich eh guete Wuchestart

Ansch u Ürsu