Im Tal des Todes

Ello Ello (mit fronsösischem Axon)

Mir si vo de Bärgä ids Death Valley abe für chli Wermi z'tanke.

I de Sequoias isches ir Nacht vei echli chüel worde. Aber s'het sech glohnt. Mir hei Bäre xeh. U das doch ordentlech:

Dasch eh Muetter mit zwöi Junge xi. Si isst am Bode u di Chline si uf em Boum xi. Gad am Strasserand heimer diä entdeckt. När heimer natürlech ghalte u gluegt u gfötelet. När isch sone Rangerin im Schlitte uf dr Gägäfahrbahn aghalte u het gheepet: sir, you can't block the road. Jaja, gaga... Block the road my ass... Keh Charre cho u mir fröidig gluegt. Bim Wandere heimer de no einisch eh Bärefamiliä xeh u ganz am Schluss no es Mändli, wo sis dicke Füüdli vor üs ufem Wanderwäg bewegt het.

Mit Zwüschestopp in Ridgecrest (dasch ded wo me nid haltet weme nid muess), hets üs de is Death Valley glängt. In Ridgecrest hets nume für nes Plätzli imne Camper-Camping glängt. Schön isch anders.

Drfür heimer hiä im Tal des Todes eh guete Platz verwütscht. S'het sogar es Böimli. U, Achtung, dä Camping het eh Pool. Im Death Valley. Geits de no? Da überau steit das me müessi ufpasse mit Ässä u trinke heimer üs ideckt :-)

Lustigi Schiuder hets hiä o:

Und hiä simer am Badwater. Dasch dr töifsti Punkt vo Amerika. 828 Fuess (was o immer das isch, wär misst scho i Füess? Di si ja gar nid au glich gross...) unger em Meeresspiugu.

Ja, so xeht das us. Gester Abe heimer gmüetlech grillet u bi üs im Camp isch no eh Kojote düreghuschet. Mir hei scho Fröid gha wos dunku isch worde u het afah hüüle. Kojote, heimer dänkt. Bevor üses Zäut vor erste Windböe fasch wäg gfloge isch. Läck het das afah chuute. U was hets amne Ort wos 5cm pro Jahr rägnet? Richtig: Sand u Stoub. U dä hets när afah i üses Zäut ineblase. Innerhalb vo Minute simer im Zäutli inne paniert xi. U dä Gagu het nid wöuä höre. 5h lang het das tah wine Sou.

Hüt Morge heimer de üses ganze Zäutli-Züüg usgschüttlet u füecht abtröchnet. Mir hei gad eh nöii Sanddüne ir Wüesti eröffnet :-)

Izze simer ufem Wäg is Valley of Fire u när geits zum Grand Canyon. Öich eh guete Wuchestart. Besser xeit, eh schöne Abe, dr Tag bi öich isch ja scho düre.

Ansch u Ürsu

Im Land der Riesenbäume

Ahoi

As ersts heimer eh Request vom Herr Bussinger z'erfülle. Er het eh Chipmunk gforderet. Da dä z'schnäu isch für üsi Händys (dir wüsst das si diä: was? Wär isch das? Wieso bewege sech diä so langsam? Und überhoupt, es si aui so langsam um mi ume) heimer es Foti vor Kamera kopiert:

När heimer paar amüsanti Sache: Chef-Ichöifer Känu het im Supermarkt müesse ga Salatgurke poste. Lang heter gluegt, da dUswahl gross. Zielsicher heter sech de für dBio-Gurke us Nordost-Kaliforniä entschiede. 3$ statt 90cents für diä us Südkaliforniä. Chapeau.

Im gliiche Lade heimer de no es zMittag ikouft. Zuckersalat... Ahnigslos heimer is ä four beans salad, a bestseller, la ufschwätzä. Werum dä Bestseller isch, heimer de bim verspiise gmerkt: me es Dessert isch das xi. U mir hei gad mit salzige Olive müesse nachespüehle. Da xeht me wo si di Dicke rekrutiere in Amerika: ir Salatabteilig.

Im Yosemite simer no eh Tag xi u dä xeht so us:

U mir, mittlerwiile so:

Ded simer gmüetlech a üsem Tischli ghocket u plötzlech hets im Zäutplatz näbä dra obe im Boum afah raschle. U zägg, donneret Nachbars eh u huere Tannezapfe vo öppe 20m obe vou ufs Outo-Dach. Was isch passiert? Fröhlech schnatternd isch z'oberst obe es Eichhörnli ghockt u het fröhlech ei Zapfe nachem angere abepfäfferet. Sehr zu üsem Leidwäsä isch zOuto nid no es zwöits Mau bombardiert worde :-)

In Reno simer o no xi u ded chame bekanntlech gamble. Jaja, dir fröiet nech izze: di hei ihre Chlüder verspiut u müesse izze de heizue. Aber nix da! Ke Cent heimer i Slot glah. Gamble, dasch nüd für üs. Ga tschaupe u Hamburger ässä simer.

Iz simer im Kings Canyon u Sequoia Nationalpark. Hiä wohne dSequoias. Rieseböim wo uralt wärdä. Bis 2200 Jahr. U eine heimer hüt scho xeh:

Xeht ni so gross us, gäuet? Weme dr ganz Stamm mit Basketbäu würd fülle, mögte 159'000 dri. Viu, hä?

Hiä hets wieder kener Duschine. Dasch für üs Zäutler eh Fluech. Drum simer ga frage bire Lodge. U tatsächlech: vo 12-3 chöi frömdi Fötzle sich ga dusche... Nume: wär wott denn scho dusche? Das löh mir as Tunichtgute natürlech nid mit üs la mache. Fräch simer 17:00 vorgfahre, parkiert, Huusnummero gmerkt (füre Verhörfall) u z'zwöit id Manneduschi gschliche. Zägg, Gäud ineglah, gschwiige u gschruppet. Gad womer am alegge si xi geit dTür uf u mir scho Angst gha üs droht eh Interogation. Dr Ürsu het vor Chlupf gad sis Hösli loh gheie u natürlech schön is Nasse. S'trochnet izze im Outo (uf Götschis zuekünftigem Sitzplatz). Dr Duscher isch de eh harmlose Cabin-Gast xi u verhört het üs niämer. So geit das...

Bis zum nächste Mau mit: Neues aus der Duschkabine.

Ansch u Ürsu

Shower Challenge

Grüessech mitnang

Vilech hei di einte oder angere vo öich scho vo dere dämleche Ice-Bucket Challenge ghört... Mir hei izze o eini. D'2:30min Dusch Challenge. Di heimer hüt zwungenermasse müesse schaffe. Eh Duschi choscht hiä 1.5$ für 2min30sec. U mir zwe hei natürlech nume Quarters für ei Person gha. Camphost furt u drum isch dAnsch zum Ürsu id Manneduschi gschliche. Zägg, zGäud ineglah und u huere pressiert. 2 Lüüt, 2x Haar wäsche, 2x ischuume u das i 2:30. Hopp, usprobiere. 

Wimer när hei usegfunge, hättis eh Outomat gha für 1$-Note z'wächsle. Das het dAnsch de gad usprobiert und, fucking hell, schlückt di Soumade vomne Aperat doch üses letste Dollarnötli u git nüd zrügg. Souerei!

Dasch üse letst Campground im Redwood National Park, gad am Meer mit schönem Sunneungergang:

Dir xeht, o hiä hets Strand. Nume ds Wasser isch souchalt u mir heis nume knapp gschafft gad ds bedle.

Im Wald simer natürlech o no xi u dä isch sehr schön:

Tiärli heimer o xeh, besser xeit Tiär. si i zwe Fiuzlüüs ineglüffe. Läck. verfiuzti Haar u Blutfuess im Walde. Di männlechi Luus het üs de xeit: there is a 1800 pound Elk around the corner. Churze Exkurs: dAmis nenne riesigi Hirsche Elk. U mir übersetze das as Elch. Eh Elch isch aber hiä ä Moose. Guet, somit mir um Kurve düüselet u siehe da:

Vättu isch doch tatsächlech vei echli gross xi. Nach churzem Rächnä heimer de aber gfunge das 900kg de äuä doch ni cha stimme. Zrügg im Camp heimer de schnäu nochegluegt: 750 isch zMaximum. U dasch dä sicher nid xi. Somit chöi aui, wo am Ürsu ging Übertriibige vorwärfä Mou ruhig si :-)

Apropos Ürsu: hüt simer im Lassen Volcanic Park acho u dä isch öppe 1500m höch. Wo dr Chef hüt sis Nivea-Deo mit Bäueli obe inne het uftah, heter eh veritabli Deobombe los glah. ZChugeli isch ab dürs halbe Outo u mi cha sägä, dr Duftboum isch izze überflüssig.

So, Adieu.

Ansch u Ürsu

Redwoods

Hello Hello

Nach üsem letste Iitrag simer üsi Bütti ga abhole u mit dere los-gchesslet. Gad as ersts über dGolden Gate Bridge:

U ab i erst Walmart womer üsi Camping-Usrüstig vervollständiget hei. Es Zäut heimer bi North Face kouft u ded o no bi de Schlafseck wöuä zueschloh. Aber di si so tüür xi, das mer zur Konkurränz (Marmott) si. Ded hets de nume mit Gänsefädere gfüllti gha. u wo dAnsch xeit het das wöug si nid, isch si ufklärt worde, das di Fädere aso nume vo tote, glückleche Gäns sige. Läbig rupfe das göngi gar nid, u für dFädere töde scho gad gar nid. Richtig! somit hei si äuä X Agstöuti wo dür dDörfer ziäh u dLüüt frage: he, ligt bi dir no gad eh toti Gans im Garte? 

Drum heimer de im Walmart chli länger bruucht u si när ines huere Züüg inecho, wiu mer nid gwüsst hei wo übernachte. Mit letster Chraft heimer de no eh Camping gfunge u ded churz vorem iidunkle üses nöie deheime ufgschlage. Am nächste Morge simer ersch am Zähni erwacht u natürlech dämäntsprächend scho wieder chrumm dinne xi. Ab is Duschkaböisli gspeedet und, o Schreck, iischalts Wasser. Welch Freude.

Churz checket wi viu Platz mer no im Charre hei. Und ja, Äschli u Götschi: dir möget no ine, für eine vo öich wirds halt de äng :-)

Izze simer im Humboldt Statepark wos Redwoods het. Mir gloube, wemer das Schild richtig düütet hei, das eine vo dene dr höchst Boum ir USA isch. U so xeh diä auso us:

Kleiner Filmexkurs: hiä isch Starwars dräiht worde. U i dene Wäuder läbä dEwoks. Wär ni weiss wär das isch: Bildungslücke. U de wüsster was dr as nächsts müesst luege.

Xehter grande Angel?

U mir wäre latürnech nid ir USA weme da ni mitem Charre chönti dürechneble:

Di Böim gäbä o chli Rägeschutz, wiu hüt rägnets liächt. Was üs nid dervo abghalte het, es ersts Füür z'mache u geili Mais-Chöube und gfüllti Piuzli überz'tue. 

Natürlech heimer o scho Tiärli xeh. Eh Chipmunk, wo für üsi träge Glänk u Geister viu z'schnäu isch xi. Er het üs xeh u äuä dänkt: Wär isch das? Was isch das? Hö, werum si diä so langsam? Und isch ab. När no di zwöi sexy Füüdli:

So, u izze ziäh mer wieder wiiter u hoffe mir hei glii wieder Internet.

Ansch u Ürsu

Kebab Exkurs u SF

So, first things first. Mir si sicher in San Francisco glandet, hei üse Stämpu bercho u döfe izze bis am 11.12 in Amerika umedüse. Aber dr Reihe nah.

As ersts heimer no zwöi Bangkok-Erläbnis. z'erste isch üses letste zNacht mit em Chrigu. Simply put: äh Läckerei:

Eh Tonne Gmües, eh Ladig Fisch u aus schön Thai-spicey. What's not to like?

Ufem Heiwäg is Hotel heimer de no öppis vom wüestere xeh. Zwüsche Tische, Bänk u angerne Räste vomne Resti heimer eh Kebabmaschine entdeckt. Inkl. agfangnem Dönertier (für aui ni Kebabkenner, siehe unten). Nid abdeckt, haub agfange u äuä vou Viecher. Abbisse vo Ratte, Chatzebuslene u Streunerhünd wird di Läckerei äuä am nächste Tag ir Khao San Road abotte. Drum hüte sich, wer den Kebab isst :-)

Kebab-Exkurs: ds Dönertier isch zFleisch wo i Kebab chunt. Da aus Fleisch vomne Tiär chunt, muess o irgendwo es Dönertiär läbä. Für Kebab-Gägner: göht doch zBiu Mau i Le Kebab oder i Villa Kebab wieder Mau eine go probiere. Eine Läckerei. Für üse liäb Nachbar Cyrus: mir warte immer no uf ds Equivalänt vo dene zwene us dire neue Heimat, Bärn. Vorhär chöme mir nid hei...

Gut, aber eigetlech simer ja izze in Amerika u we dr Tüüfu u sini Gespielin i God's own Country wei iireise, de gits ging öppis z'lache. So o das Mau :-) wo dAnsch sich am Zollbeamte gnöcheret het, het dr nätti Herr si gfragt was si de da wöu. Si erst Tipp: Shopping :-) wo si de xeit het "zLand luege" het dr Herr gmeint wi lang de. Das mir drü Mönet wei bliibe u dAnsch scho ganz viu Stämple vo 2014 het, heter de mitemne  "Ah, you probably don't have money" kommentiert. Si het de das mit "i have saved and a job back home" konteret. Hahaha. Dr Tüüfu hinge dra isch de unbemerkt is heilige Land igreist. Igschliche sozsägä. 

DLüüt wo sich frage werum dr Ürsu i däm Blogg gärn as Tüüfu bezeichnet wird: das isch eh Übername us Jugendtage woner vo Ryan, Eno, Nik u Konsorte wäg sim liäbreizende Wäsä bercho het :-)

Womer de ir Zugstation acho si, heimer müesse Batzeli i Outomat loh für üsi Tickets. 2$ z'viu heimer dri glah u as Rückgäud isch üs eh Schwall Füfräppler entgägä cho. Mir hei gmeint mir sig in San Francisco u nid in Las Vegas. DTäschene si izze ämu wieder vou...

Wiiter heimer no eis, zwöi Gschichtli us üsem Hostel. SF isch es tüürs, vo Bedbugs bevöukerets Pflaster u drum heimer di letste zwe Nächt imne Viererdorm gschlafe. Es wärdä Ürsu's letsti Dormnächt si. Er fingt, er sigi izze z'alt für das. Zwöierdorms mit dr Ansch, super. Drüer- u Viererdorms mit Fründe. Äbäfaus okay. Aus angere. Fertig. Gester Nacht heimer es Hüestli bi üs gha. Di het drei Stung am Stück ghuestet, bis si sech für nes Medi het chönne entscheide. Hüt Morge heimer se dusse xeh rouche. Dumpfbacke. Di Nacht heimer zwöi tolli Exemplar. Z'einte isch am 22:00 i üses dunkle Zimmer cho (mir hei Jetlag) u het Fluetliächt gmacht, sich ufs Bett gworfe u isch igschlafe. Danke für die Rücksichtsnahme... Gschnarchlet heter o, aber sini Rächnig ohni dAnsch gmacht. Di isch am 2:30 näb sim Bett gstange u het ne agschnouzt. Er söu sich dräie. 3:30 heter zZimmer verlah. Uf Ürsu's Betthöchi hets eh Stöhni wo äuä bereits mehreri Mau zBett gnässt het, so füecht si di Tröim... Derzue ischs eine vo dene wo meint, er müessi sis Natel ir Nacht nid uf luutlos stöuä. U am Morge heter de bim Häcke no Tastetön dinne glah... Mou Paar ad Ohre...

Süsch heimers guet gha a üsem erste Tag. Si alti Fründe ga bsueche:

U hei vermissti Läckereie verspiise:

Es Zäut simer go sueche u bim zämälege het dr Ürsu de vergässä, das di Zäutstange ja flex hei. Weme aso eini biägt u se när losmacht, de schnellt diä zrügg :-) clever gmacht het de ds Mandli si Dickchopf gad ober dStange gha. U zägg hets im eis is Oug gfätzt. Hahaha. Gut gemacht.

Da mir chli truurig si, wäg vo Asiä, heimer de füre Kulturschock z'bekämpfä, no eh Abstächer uf Chinatown gmacht :-)

So, u das wärs izze. Üsi Posts wärdä izze äuä de säutener, da mer keh Wifi meh hei.

Ade u auf Bald

Ansch u Ürsu

Ade Blog

So, Ziit isch cho zum Abschiid näh. Einersiits vom Chrigel wo üs es wiiters Mau begleitet het. U izze es doch höchs Total vo 10 Wuche (wo bir letste Reis in Boliviä agfange het) mit üs düreghalte het :-). Angerersiits vo Asiä, wo mir di letste 37 Wuche si xi. Di letste 7 Wuche in Malaysia u Thailandia si schnäu verbii, schön xi u s'het aus klappet. Drum heimer äuä o di nid so lustige Ziite usbländet u izze zGfüeuh mir mögte no. Aber iz isch fertig für üs, u mir ziäh ines nächsts Abentüür.

Eis ohni Kokosnüss, aber sicher o mit viu Schönem. Für öich heimer aber no es paar Perle us dr Muetter vo aune asiatische Stedt: Bangkok.

Mir hei am Chrigu i de letste zwe Täg aus probiere z'zeige womer kenne u ihn drum as ersts gad id Khao San Road gschleipft. Für aui nid Backpacker: hier versammeln sich die Filzläuse :-)

Natürlech het diä nid enttüscht u scho nachem erste Biär heimer ne troffe: Wolfgang from Tschörmänii. Es het ne us dr Bar usegschlängget u mir wo dusse si ghockt hei das beobachtet. Mit verwirrten Blick heter üs de xichtet u gfragt öb är öppis döfi frage. Mir, nichtsahnend, gfunge: jaja... Är het üs de mitteilt das: Äi äm from Börlin. Änd, all de wumän hiir ar souuu diffikult. Iu nou, I dount wont to märry, ei onli wont... När heter vielsagend si Duume zwüsche Zeig- u Mittufinger füre- u hingere gschobe, grinst u ar Ansch ufe Arm glängt. Di het ne de agschnouzt u er het sini Taupe zrügg gno. Nachem zwöite Usfahre vo de Griffle het de dr Ürsu vermäudet: Wolfgang, it's time for you to leave. Bi sim Name isch ihm es Liächtli uf u er het strahlend xeit: Wolfgang. Däts mäi Neim. Ei niid iu tu help mii. Iuu ar mäi frend. Das heimer de nüm möge mache u ihn irgendwiä zum Uufbruuch chönne bewege. 

Das wiederum het Henry, se Stoncollectöör us Froonkreisch ufe Plan grüeft. Dä isch hinger üs gsässä u het sech amüsiert u isch när gad, ungfragt, eh Reihe füre zu üs grütscht. Ded heter ar Ansch sini Coverstory zum Beste gäh: i collect reer stouns from Thailond änd Indoniisia. Rare stones our asses... Usxeh heter wine gwöhnleche Sextourist. Mir hei is de abgwändet u plötzlech ischer cho mit: you know, the Tobleron-Chocolat, ser is ä ber on it. Das het üs de derzue bewoge o ihn nüm z'beachte. Wiu wär ded druf Bäre xeht...

Wiiterzoge simer när u bim zNacht heimer eh Thai troffe wo sit 45gi pensioniert isch u sit 20 Jahr ir ganze Wäut umereist. 50 Länder heter scho xeh u mir hei üs erfröit über dGägäsätz zwüsche ihm u de beide Europäer.

Mitem Chao Phraya Express Wasserbus simer de hüt go dä Tämpu da obe aluege. U bim achekraxle fasch zTod gstürzt :-)

Nachdäm heimer de dr Chrigu no ane ganz eh schöne Blueme-Markt gfüehrt wo zu üsem Erstuune tatsächlech Blueme het gha. Normalerwiis si di Hagle süsch ging läär we mir uftouche:

Izze göh mir de no go nes letsts Fischli ässä u düe när dr Chrigu ufs Taxi für a Flughafe.

Das wärs xi vo üs us Asiä. Adieu!

Ansch, Chrigu, Ürsu

Fischdiäb

Hey

Mir hei scho wieder eh rächte Chehr härä gleit u si izze in Kanchanaburi. Das wird äuä wenige eh Begriff si. Aber vilech isch nech die "Brücke über den Fluss Kway" bekannt. Das wär hiä:

Da hei dJapaner im 2te Wäutchrig im Eiltempo eh Bahnstrecki zwüsche Thailand u Burma wöuä boue. S'isch im Momänt wieder u huere heiss, entsprächend chöiter nech vorstöuä was passiert we si 24h hei müesse schaffe. Nicht so nette Mandlis.

Aber mir nämä vorwäg. Si zersch in Hua Hin xi u hei ded am Night Market gässä. Eh huere Winner isch das nid xi, aber eh lustigi Gschicht heimer glich. Chrigu u Ürsu hei es Fischli wöuä ässä u mit Zeige u Uflüpfe signalisiert. När isch eh sweet-talking Thai-Lady ufgchrützt u het für üs afah übersetze. Mir nüd böses dänkt, bis 'üse' Fisch wo vor 5min no ufm Iis glägä isch vor üs ufem Täuer dampfet her. Chline Blick zur Thai-Frou wo lang vor üs bstöut het: ihre Fisch no nid ded. U da isch is es Liächtli uf. Di 'nätti Dame het nid ghulfe sondern ihre chlii gäg üse gross Fisch ustuuscht. Ein gemeiner Fall von Mundraub. Gnuegtueig hei aber de mir gha: ihre Fisch sigi zäih xi. Üse aber nid. So geit das! Hahaha.

När simer am nächste Morge ab uf Bangkok, ded üses Züg ga ablade u gad sofort wiiter ufe Chattuchak-Weekend Market. Immer wieder es grosses Highlight. Es het huuuuuere viu Lüüt gha u wi immer het me sech verloffe u we immer öppis gsuecht wird, chame sicher si das mes nid fingt. Mir hei natürlech am Chrigu wöuä dTiärabteilig zeige. Diä aber ersch nach langer, vergäblecher Suechi entdeckt:

U da si si, artgrächt ghaltnigi Bebe-Hundeli im Chefig. Man erkenne: vor 4 Jahr hets das Plastik unge no nid gha u si hei müesse mit de Pfötli ufem Gitter stah. Vor 10 Jahr het me se diräkt i Choch-Chessu tah. Progress is happening. Übrigens gits de aber immer no eh Reihe vo angerne (gfährdete) Tiär im Agebot: Affli, Eichhörnli, Leguane, Spinne, Schlange, Papageie u sogar eh blaue Ara heimer xeh. Eh Füetterig vo nackte Bebe-Papageie heimer o xeh. Da wird dSprütze mit Schluuch ufzoge, dr Vogu packt, ds Röhrli i Mage abegjättet u när dSpritze i eim Schwall gläärt. Äuä eh agnähmi Art Nahrig ufdsnäh. Apropos Nahrug ufnäh. Das isch am Weekend Market o immer grosses Kino. Ganz viu Läckereie. DAnsch het de di zwe erschöpfte Herre zrügg glah u isch sich no go us-shoppe. Das hei di zwe drzue gnützt es paar Biärli u Eili z'verdrösche:

Singha, das möcht hiä erwähnt si, isch nume trunke worde wius kes zwöits Chang meh het gha. Man säuft mit Stil!

Zrügg im Hotel heimer de düschelet u dr Ürsu festgstöut: out of shirts. Eis vom Chrigu usgleiht u zägg, z'dick. Es zwöuts müesse näh. Glücklecherwiis weigeret sech dr Chrigu sithäär das T-Shirt o z'probiere. Het sogar äxtra 2 zum wäschä gäh daser drfo chunt. Äuä nid nume eine dick worde. HarHarHar

Am Abe simer ir Beiz gad im Egge vom Hotel xi. Di einzige Chunde u natürlech es Fläschli Samsong müesse trinke. Wi sechs ghört mit Eis, Limette, Soda-Water u Coke. U was berächnet dä Anus für sini Limette? 45 Baht. 1.50! Eh Frächheit. Gad uf Tripadvisor go es böses Review schribä. Und: iz isch dBar läär, mir gö nämli nüm!

In Kanchanaburi, da isches schön! Sehr sogar. Nachdäm mer di Brügg si ga aluege heimer am Abe am Fluss ufemne Floating Restaurant es Biärli gno:

U unger angerem di zwöi Sache xeh:

Es floating Party-House. Da düe sech dThais u dKoreaner druf betrinke u Karaoke singe. 

Und dr Rocket-Man. Dä rast mitemne u huere Garacho uf sim Skiff dür dä Fluss u transportiert Eis u süsch Sache u macht mit sim Mocke eh u huere Krach. 

Gester heimer no eh Wasserfall-Usflug gmacht:

U hüt geits de nachem zMorge gmüetlech Richtig Ändstation: Bangkok.

Adios

Ansch, Chrigu, Ürsu