Eine Ausreise

So, mir wei öich vo üsem Fährtli vo Mexico nach Guatemala verzöuä. Gnauer xeit vo Comitan nach Huehuetenango.

As ersts möchte mer sägä das mir üs o nach emne Jahr immer no a Orte härä wage wos kener Wiisbrot het. Nid eis heimer uf dere Reis xeh...

Los gange isches am 7:45 mit churzem Waggu ad Minibusabfahrtstation. Womer nätt gfragt hei öb mer no döfe öppis zÄssä choufe het me is ateigget üsi Plätz sige de eifach wäg. Aber mir chönni scho... Drum isch de dAnsch ineghechtet u dr Ürsu het no schnäu zwöi Bächerli Miuch-Riis (eh grossi Läckerei für 1.00chf) gschnappet. De isch me zügig los u het üs am 09:30 150km für 100M$ (6.50chf) wiiter ar Gränzä abgsetzt. Ded hei is de fründlechi  Gränzwächter 600M$ abknüpft (40.00chf). Mir hei zersch dr unverständig Tourist gspiut, was aber nix gnützt het. 

Wiiter ischs mitem Taxi für 20M$ (1.50chf). Dä Batze het üs dr Vordersitz kouft womer hei döfe teile. DAnschle het de dFänsterkurble gnosse u Ürsus Handles si vom Schalthebu malträtiert worde. DRüggelehne het beidne agnähm i Rügge drückt.

4km und eh riesigi Abfallgruebe später: Zoll Guatemala. Ded het me üs dr nächst Stämpfu is Büechli drückt. U für di Schwärstarbeit 40M$ (2.70chf) verlangt. Üses 50M$-Nötli isch de mitere Eleganz im Schublädli versorgt worde, dases scho fasch zGäud isch wärt xi. 5min sigi zBusterminal wäg. Guet, losgschuenet u nach 20min Hügudsdüruf am Busterminal acho. Vo aune Siite simer agschroue worde. 10:30 fahri dr Bus. U keh Minute später. Eh Chicken-Bus versteit sech. 10 Reihe, 60 Lüüt plus es Dotze ir Mitti. 40Q$ (5.50chf) choschtet das. Und: keine Pesos. Es muess gwächslet wärdä. Klar isch ded o eine zur Stöu xi. 100M$ git 50Q$. Das stimmt natürlech nid. Aber dMexicanos rächnä o immer no das 10M$ = 1US$ wärt si. Das isch vor zäh Jahr, wo eh Handle-losi Ürsle z'erst Mau in MX isch xi, so xi. Heute nicht mehr... U somit si haut i ihrere Wäut 10Quetzales (ihre Nationalvogel wo hiä aber usgrottet isch) 20 mexikanischi Sünneli.

Guet, 10:30 isch dr Charre agworfe worde. U mir hei müesse um 1min Ufschub bitte das mer beidi no hurti hei chönne ga biisle. U ab isch ds Bössli. 2.5h isch akündet worde. Mit Pneu pumpe heimers de i, Achtung Trommelwirbel, 2h35min gschafft. Vilech isch das o a Padre Juan glägä wo luutstarch u mit schmärzverzerrtem Xicht (äuä die Geissel Gottes) prediget het. Dios es mi Castel. So wird o gfahre. Me isch sozsägä ihre fahrende Festig. Bises zTobu abgeit. Hahaha

As langjährigi Reisendi heimer ging no nid glehrt das Proviant das A und O isch. Natürlech heimer nüd drbii gha u ds Hypo het üs de agriffe. Mit 10Q$ und iquetscht chunt me aber nid wiit. Wo de dr Fruit-Boy isch cho heimer däm Coco, Piña u Sandia für 5Q$ (0.8chf) abkouft. 

Mit de letste 4Q$ (0.6chf) hets de no im Bus id Nöchi vom Hotel glängt. 13:15 simer da acho. Somit: 57.60chf as Total :-)

Mit däm einte Quetzal im Portmone simer de Richtig Bank. Nume für mit Schrecke fest'zstöuä: no hay dinero. Aui üsi Chärtli si eh Fählazeig xi. Schlussamänd heimer de 120$ gwächslet (was öppe 45min duuret het wiu meh Gäudwöscherei im grosse Stil vermuetet het).

Natürlech heimer de üse Banker des Vertrauens halb wahnsinnig gmacht. Aber mir hei dänkt, mir bruuche de verständnisvolli Lüüt wo üs bimne Biär bim Gjammer zuelose. U de chöi mir ihn unger falsche Vorwänd is Biär löcke :-)

Fazit: gemäss Telefon mit dr Post isch üses Post-Chärtli Gschicht. Drum isch aus Gäud ufs Travel-Cash Chärtli transferiert worde. Das geit iz nüm, drfür geit z'agäblech kaputte Postchärtli izze. Wi dr Äschli schön xeit het: dr Chopf rouchnet vom Gebühredschungel. 

Paar Ananas heimer o no i Ansch's Rucksack packt:

Iz simer in Quetzaltenango. Gester simer ufne Vulkan gheizt u hüt zahle mr dr Priis mit Muskukater. Haha. DNatel heimer ufgrund vo Roubüberfäll deheime gla. Drum müesster izze mit Fotos vor Kamera vorliäb näh (di heimer abgföttelet, drum sry für dQualität...)

Öich aune es guets Nöis!

One done, One to go

Ahoi

So, iz (29.12) isches es Jahr här das mir furt si. U somit Halbziit für üs. U wi bir Tages-Schou wei mir das doch la revue passiere. Mir maches haut mit de Länder u nid mit de Mönet:

1) Thailand (Nord)

2) Laos

3) Cambodia

4) Singapore

5) Vietnam

6) Philippines

7) Borneo

8) Indonesia

9) Japan

10) Taiwan

11) Malaysia

12) Thailand (Süd)

13) USA

14) Canada

15) Mexico

Merci o aune wo mit üs mitgreist si, wo üs si cho bsueche oder wo mir hei döfe go bsueche:

U für diä wo sech bis da abe hei düregscrollet: mir chöme hei. Am 2.2.2015 ändet üsi Reis am 400. Tag in Cancun. 

Grund: ar Ansch ihre chlii Rucksack isch langsam dräckig u muess id Wösch.

Ah, u no öppis: we dr nid liäb sit mit üs, de gömer gad wieder... Wiu abxeh drvo öich aui wieder z'xeh ziähts üs gad nid so. Aber dir wüsst, dr Rucksack...

Adios muchachos

X-Mas in Mexico

Hellöu

Ude? Wi heiter gfiiret? Mir hei eigetlech ghofft mir chönne bedle u sünnele. Leider het is da ds Wätter eh Strich dür dRächnig gmacht...

Mir hei no knapp vorem grosse Rägä chönne Palenque aluege:

Aber is när unger üsne nöie Rägäschirme müesse verstecke :-)

När hets acheglah u üs isch nid viu angers übrig bliibe as dr heilig Abe mit es paar Margharitas, Biär u Tequila z'verbringe :-)

Hüt simer, Achtung, wieder Mau go ne Wasserfau aluege. Misol-Ha u Agua Azul:

Iz simer in San Cristobal de las Casas. Für di 200km da härä het dr Bus 4.5h bruucht. Me cha sägä, är isch graset. Hahaha.

Mir hoffe dir heit guet gfiiret u heit dFrsttäg guet überstande.

Ansch u Ürsu

Ratet Mau

... Was mir ir letsti gmacht hei?

Riiiiichtig. Steihüüfe agluegt. Mir verschone nech izze mit z'viu Biudli derfo:

Mir düe natürlech o wiiterhin üses möglechste für guet z'Ässä u finge sogar immer wieder öppis läckers füre Herbivor:

Das si Tacos de Nopales. U das isch Kaktus. U drnäbä isch eine mit Peperoni. Suberi Sach fingt dAnsch. Vegis, ab nach Mexico.

Wiiter heimer no es schöns Föteli (mir finge z'mingst es sigi schön) vomne Agave-Fäud resp. zuekünftigem Tequila :-)

U eh lustigi Story us Merida. Hiä hets eh Million Lüüt gha u di si aui de Wiähnachtsgschänk nache. Läck. Äuä wi bi öich. I au däm Gewusel heimer de es Schlitzohr usgmacht wo üs isch nacheglüffe. Mir hei de dHüet ghebt u si bliibe stah. Är o. När simer wieder wiiter. Är o. Schlussamänd simer de ufnes Bänkli ghocket u är isch 2x hin u här tigeret u när o abgsässä. Di Glägäheit hei mir gnutzt u si ab is nächste Museum. Hahaha. Isch aso souschlächt probiert xi. Dä sött sech schäme.

In Campeche simer no xi. U da hei si sech Müeh gäh. Aui Hüüser si farbig gstriiiche u s'xeht super us:

Dasch gad vorem Hotel u di Chile isch am Houptplatz:

Ufem Platz hets Wiähnachtsbelüchtig u mir si ded ga nes Biär trinke. Für nes zwöits hets nüm glängt. Hunderttuusig blinkendi Liächter in Kombination mit Flugzüügstart- u landemusig u frittiertem Hüehnligstank het üs vertribe.

Iz simer in Palenque u hei hüt dusse ufem  Platz es Biärli trunke. Da si zwe jungi Schnuufer düre glaueret u hei üs as Gringos betitlet. Dr Ürsu chündet scho sit em Afang vo Mexico ah, das das mitere Schimpftirade g'ahndet wird. U siehe da, er isch tatsächlech gnue wortgewandt xi für am Mandli es paar Schlämperlige nachezbäägge. Das het de Wirkig zeigt. Wo di zwe z'nächst Mau düre si, isch gschwiige worde :-)

Schöni Wiähnachte, guets Ässä, viu Wii, Biär u wases süsch no so git.