Abgäh

Hello There from Bean-Town

Mir hei di letste Täg mit dr Nad in Halifax no gnosse u si no go ne Usflug uf Peggy's Cove go mache:

När heimer ire Brauerei no Nad's Mobiliar gratis ufgstockt. Nachdäm me is verjagt het wiu eh Gruppe Biärtrinker isch ine cho, heimer fräch Stüehl reklamiert. Dr Typ het is de eh Rundi Barhocker härägstöut u gmeint, di ghei är morn furt. Da hei mir gmeint öb mer eine döfe ha und zägg:

Gester simer ds Halifax mit üsem graue Blitz am Morge früeh los. Mir heinis churz überleit dNad z'fessle u z'chneble u eifach im Kofferruum z'entfüehre das si no chli mit üs isch. Aber mir heinis de, schweren Herzens entschiide, se ded z'lah *sniff*

Merci Nad für dini Gastfründschaft! S'isch soooooooooopa xi. Mir chöme wieder (nächst Mau im Summer).

Mir hei de no am Farmer's Market eh Ladig Öpfle ufe Wäg kouft. Dir ahnet was chunt: am Zoll hei is dAmis diä abknöpft. Nichts Gesundes im Land der Dicken. Pouletflügeli hätte si nis äuä düreglah...

U einisch meh: Öpfu si Tüüfuszüüg. Dasch scho ir Bibu so xi. 

Iz heimer hüt üsi letschti Fahrt hinger is bracht. U üses Chrutzli abgäh am Flughafe. När heimer is ufe Wäg id Stadt gmacht. Wieder Mau mit ÖV. U prompt simer are U-Bahn Station eh halb Stung gstrandet wiu dr aschliessend Bus nid het wöuä fahre. Hahaha.

När simer no go dHarvard Uni luege. Hei üs ded füre Lehrgang i Advanced Travels wöuä ischribä ;-)

Was o ging wieder amüsant isch hiä: es het überau eh Chile. Sogar Mitts ufem Campus chame go bättä:

U iz wott schiins eine eh Chile mit integriärtem Mac boue... Das würd sech träffä, wiu frässä u bättä si de Amis ihres Liäbste. Di News het dr Ürsu bim Blick-Läsä ufgablet (u er fröit sech scho iz uf dSchimpfis vo sim Vätterli, das är so Schundlektüre liist).

News heimer o no: am 9.12 geit üse Flug uf Mexico. Mir flüge uf Cancun u mache no chli Zentralamerika unsicher. Mir gloube aber, dases üse letst Teil-Kontinänt wird si ;-)

Frage übers Heicho wärde ersch beantwortet we mir üs chli igläbt hei. Mir hoffe dir düed üs dFründschafte no nid gad chünde. Süsch wäre mer froh um Vorabmäudig. Das mer üs de langsam as Heicho chönte mache!!

Häbäts guet u bis zum nächste Mau

Ansch u Ürsu