Es ist genug!

Eh guete Fründ vo üs het Mau es Motto erlah: es ist noch nicht genug.

Säubstverständlech isch das ufs Biär bezoge. Wi chönts o angers si.

Mir chöi izze aber sägä: es ist genug. 

Mir hei üs nach langem Hin u Här entschide, das mir üsi Asiä-Reis beände. U das Symbolträchtig. Mir hei Ändi Dezämber mit guete Fründe (Säru u Fäbu) in Bangkok agfange u höre Mitti Septämber mitemne guet Fründ (Chrigu) ded wieder uf. 

Aber mir wäre nid mir, we scho ganz genug wär. Es geit wiiter. Nume nüm in Asiä, sondern bi üsere grosse Liäbi, em amerikanische Kontinänt. Mir flüge am 13.9 uf San Francisco. Dr Grund isch eh eifache :-) mir vermisse dNad u drum müesse mir haut izze uf dSuechi nach ihre. Mir hei ghört, si versteckt sech wiit im Oste. Drum heisst üses nöie Motto: the hunt for Nad :-) u natürlech bruuche mer o Mau eh Abchüelig!

Guet, izze wo das dusse isch, no chli News us Taiwan. Churz: mir si nid begeisteret, aber lustig isches glich (mängisch). Chürzlech simer 2x im Restaurant Bäre xi. Richtig, ir Heimat. Ded wos dr Gmüestäuer mit luuter usem Wasser zogne Wüestigkeite git. So mache si das hiä. Z'Gmües würd sech im Grab umdräie... Weme Glück het, hets ufem Tisch Sööseli. Weme aber am fautsche Tisch hockt, wird eim wild gestikulierend z'verstoh gäh, das me di Soose ja nid döfi alängä. Sooseli isch tüür u weme vom falsche Stand chunt, gits Haue.

Heiss isches ou! Wine Sou. Mir wüsse dir weit das nid ghöre, aber 35 Grad u 90% Luftfüechtigkeit isch o keh Spass...

Schöns heimer xeh, aber müehsam z'erreiche:

Dasch dr Vase-Rock ufemne vorglagerete Inseli wo 100'000 Touriste uf Töffli umereise. Me cha sägä: Saigon vou vo China-Touriste wo z'erst Mau es Töffli sattle. 

Das hiä isch dr Lotus-Pond in Kaohsiung u bi de Schmätterlinge simer o no xi... Gemäss LP flüge ded Ändi Juli 100'000gi ume. Letst Mau womer gluegt hei, isch das izze. Xeh heimer viu, aber 1'000 sis äuä chum xi. Hiä es Symbolbild:

Drfür heimer is grosse Gfahre usgsetzt:

Izze simer in Tainan u hüt heimer eh Usflug i Mangrove-Tunnel gmacht:

U si bim Tree-House xi. Dasch eh Hütte wo vomne Banyan-Boum isch überwachse worde:

U gester u hüt heimer 2x geili Bars gfunge. Sogar ir Schwiiz wäre diä eh Hit. Mir si 2x 3h eleini ded ghöcklet u hei einsam i üsi Biär müesse stiere :-)

Mir wüsse, mir hei keh Mitleid z'guet. U mir wei o kes. Wiu hüt heimer no öppis xeh. Es Stadt-Schwoin. U das si mir ja! Zwöi Glücks-Söi :-)

Post-Typhoon Blog

Tach

Wi bim letste Itrag befürchtet, heimer di drei letste Täg doch Päch gha :-( 

Womer in Hualien si acho, isch dr Wind no liächt gange, mir hei aber glich chönne ga velöle u das heimer o gmacht:

Am Abe si de di meiste Wulche langsam wäg xi u das wär no dr Usblick us üsem Zimmer (da heimer guet usgläsä - sogar mit Fernseh u änglische Sänder):

När heimer je eh Usflug i Tarokko und i Blue River Gorge wöuä mache, aber di hei si inegno. Bis am 15.8 isch da hiä aus zue. Somit heimer is eigetlech für nüd i däm Kaff niederglah. Mir hei is de mit 2l Wasser u Soba-Noodles ufgmacht für ane See. Bade u relaxe, vilech es Biärli näh u öppe chli grille. So xeht eh Nami am See bi öich us. Hiä nid. Kein Schwimmen im See erlaubt. Drum heimer de halt eh Spaziergang gmacht. Leider isch bi 35 Grad eh Hügu nid ds richtige u mir si nach dene 3h komplett dürnesst xi :-( 

So hets de ufem Hügu usxeh. Wenig spektakulär. Am nächste Tag heimer de o no öppis müesse mache u si i Fangdao Forrest Park. Nach 2h im Büssli simer acho. Ganz offebar het ded öpper vergässä ä Wald azpflanze... Im Tal bi 35 Grad heimer de vergäbä nach Schatte gsuecht... Drum simer unverrichteter Dinge wieder zrügg, hei üs paar Biär gschnappt u si i üsem Zimmer vorem Fernseh glandet:

Drfür heimer no es angers Highlight gfunge: dr Hualien Night-Market. Ded simer drü Mau ga ässä u ded gits läckeri Mais-Chöube vom Grill, Dampfbüppi u Fruchtsäftle (wome asteit wi zBärn ir Gelateria):

Für diä wo nid wüsse was es Dampfbüppi isch: dasch eh Art 'Brötli' wo mit Chohl (Vegi) und Hackfleisch gfüllt wird. När wird das im Wasser kochet u am Schluss no abrätlet. Normalerwiis wird das aber süsch überau im Dampf gmacht (drum dr Name, erfunde vom Phipu Aebersold). Obe hei si de eh Gupf and there you have it es Büppi usem Dampftopf :-)

So, izze geits im Zug wiiter ad Westküste womer de vilech chli meh chöi mache.

Ah, när heimer no öppis für öich aui xeh:

http://www.blick.ch/news/schweiz/westschweiz/behoerden-zeigen-sich-besorgt-die-bettwanzen-kommen-id3014454.html

Mir sis nid xi. Und: mir chöme nid hei, solang dir Bedbugs heit ir Schwiiz!!!

Ansch u Ürsu

Stormtroopers

Guete Tag Allersiits

Mir hei nid viu z'brichte vo däm Taiwan. Aber da di einte oder angere dNews vilech xeh hei, möchte mir üs mäude.

Mir si weder vom Typhoon, no vom Flugi-Absturz hiä zTaiwan beschädiget worde. Churz nach üsere Akunft hei di erste Sturm-Uslöifer üs troffe. Mir hei gloub chli  Päch mit dene Typhoons u betätige üs ir letsti as Stormtroopers. Z'Guete isch, di dräie ja eh nöie Star Wars Fium u vilech berchöme mir ded ja eh Statiste-Rolle :-)

Uf jede Fau simer uf de 50m zur trochnige U-Bahn verschüttet worde. DAnsch het zwar dr Schirm drbii gha, aber we dr Rägä vor Siite chunt u i dere Mängi, de nützt das leider weni :-) gester isch de gar nüd me gange:

Mir hei es Museum u eh Tämpu probiere abzklappere. Aber dasch aus "wegen zu" geschlossen xi :-(

Mir hei üs de füre Chino entschide u si ga  Transformers luege. Glücklecherwiis isch dä Hagu fasch drü Stung gange u isch sogar einigermasse churzwilig xi. Mit sehr guete Texte wi: if you look up to the stars, know that one of the stars is my soul.

Haha. Bsunders beidruckend we das eh Lastwage-Roboter seit. Für diä wo nid wüssä was Transformers si: Outöli wome cha i Roboter umwandle. Es Chinderspiuzüüg. Und: mir hei sogar salzigi Popcorn gfunge. Yeah!!!!

När heimer no öppis für aui Lüüt wo grösser si as mir (aso 90% vo aune Läser). DBett hiä si sehr gross:

Nid Mau dr Ürsu het richtig drin Platz u dä isch ja meh für sini Handles as für sini Grössi bekannt. Bitte Ougemerk lege uf Ürsu's T-Shirt: das wäre Storm-Troopers. U di sexy Superman-Boxershorts wo sis Discofüdeli bedecke: di si vo Rebi u Lüku. Das da o no eh namentlechi Erwähnig dinne wär, Rebi. Hahaha.

Izze sitze mer imne Zug uf Hualien. Sehr bequem, nid ganz so schnäu wi in Japan, drfür uf -5 Grad abeküehlet :-) in Hualien bliibe mer drei Nächt u wei dTarokko-Schlucht ga luege. Mau luege öb diä offe isch oder öb diä dr Typhoon inegno het :-)

Was mer o scho chöi sägä: di si gaaaaaaaaaanz nätt hiä. Drü Bispiu:

1) mir loufe mitem Rucksack dür nes Gässli (hei aber gwüsst womer si) u de stoppt es Töffli mit Vater u Sohn u fragt üs, wo mir gärn härä würde u zeigt üs dr Wäg

2) mir stöh vorem Fruchtsaft u probiere z'erklärä das mir gärn eh Saft mit Wasser u Iis hättä u nid mit Miuch. De chunt es Päärli u fragt üs öb si chönne übersetze 

3) Hüt im Zug heimer, da usbuecht, ni chönne näbänang hocke. Si eh Wage usnang xi. När het dr Herr näbäm Ürsu dAnsch entdeckt u gfragt öb mir näbänang wöug hocke, er göngi de a Ansch's Platz

Und: ganz wichtig! Hiä gits ging no ungsüesste chalte Grüentee u Schwarztee i 1 u 2l Fläschä. Läckerei!!!

Happy Day

Ansch u Ürsu

Adieu, Adieu

So, üsi Ziit im Land der aufgehenden Sonne chunt ds Änd. DSunne geit sodsägä unger für üsi Tour de Japon :-(

Mir si chli unglücklech. Nid sehr, aber mir hättä no möge. Aber: mir wüsse mittlerwiile wi schnäu das das cha chehre. Drum gömer, wes am Schönschte isch.

Mir hei natürlech no einiges gmacht i de letste Täg. 

As ersts simer no Mau, ganz nostalgisch, in Tokyo zrügg uf Ebisu womer mitem Nicu scho si xi. Usecho isches glich wi denn: Curry-Ramen u när Sake u ufem Heiwäg het de Mann mit Schaufel gwartet :-)

Sake trinkt me, im Gägäsatz zur landlöifige Meinig (u am Karli sire fäuhgleitete Vorliäbi), hiä in Japan im Summer chalt. Bsunders dr guet het de wi Wii u Schnaps so Gschmacksnote (wo mir nid chöi - für üs ischer guet oder nid). Wasmer när no usegfunge hei isch Oolong-Hay. Dasch Schwarztee mit Shoshu (Härdöpfuschnaps) u Iis. Grosses Kino, böses Erwache:

Mir si när no einisch zrügg uf Kyoto u ded is Manga-Museum:

Vo Kyoto us, simer de ire ewige Zugreis no uf Koya-San u ded eh alte buddhistische Friedhof u vili, vili Tämple ga luege:

Ürsu ma sech erinnere dases i sire Chindheit ging ah Soft-Ice gfäuht het. Gfährlech sigi das, vou Bakterie u bös überhoupt. Gnützt hets nüd, er liäbts u dick ischer o ohni Soft-Ice worde. Drum gits izze in Japan ersch rächt. U das i wilde Variatione. Hiä heimer Sesam und Tofu azbiätä:

Nach Kyoto simer uf Osaka mit Stop in Kobe u ded hets no öppis letsts gäh für Ürsel. Kobe-Beef. Dr ganz Blätz hätti öppe es Gwehr koscht, drum hets de für umgrächnet 6.- eifach eh Streife gäh für ihn. Eh grossi Läckerei.

Kobe xeht übrigens so us u isch öich vilech wägä ihrem grosse Ärdbebe im 1995 eh Begriff:

Was bliibt üs no azfüege? Eis Rätsu heimer no chönne löse. DFrag werum dJapaner so viu Lüüt mit graue Haar hei laht sech so beantworte:

1) si schaffe meh as angeri Asiate

2) si gö i sörigi Läde :-) das si eh Art Casinos u ded inne isch's so Luut, so viu Lichtli u soooooo verroucht das me i Minute es Jahr alteret :-))))

Izze simer no in Osaka umegschuenet u hei o hiä no zwe Läckereie gfunge. Es lets Okonomyiaki u Egg-Rice:

So, das wärs izze xi vo üs. Bliibt üs no, Dank azfüege:

A) Merci Nicu für di Bsuech

B) Merci Aya u Karli für Übersetzige u Ässenstipps

C) Merci Rebi u Lüku für Ässenstipp: bsunders dr Siidetofu isch Wäutklass xi

So, das wäris.

Sayonara, arrigato gosaimaaaaaaaaas

Ansch u Ürsu

Rückwäg

Hey Hou

Mir hei üs nachem letste Itrag ufe 'Rückwäg' gmacht...

Mir si zersch no ga wandere u ufe höchst Bärg uf Hakodate kraxlet. U dasch dUssicht obe druffe xi ;-)

Schön blaue Himu. HouHouHou. Aber ganz weni hets de glich no uftoh u mir hei eh Blick übere Daisetzusan NP erhascht:

Das isch es Bärgseeli u hinger dra si Fumeroles u s'stinkt überau nach Schwäfu.

Vo ded us simer zrügg uf Sapporo womer no einisch übernachtet hei. De simer no schnäu uf Otaru go zMittag ässä:

Dasch japanischs Vegetable-Curry u hiä wäri no ds Föteli vomne sone berüehmte Kanal wo aui Japaner gö ga aluege:

D'Ansch het de dr Ürsu azigglet, er düegi zweni Sache usprobiere. Bsunders bi de Fischli-Sache halti är sech zrügg (wi we Fischmage nid glängt hätti). Drum heter sech de entschiide, eh chli eh exotischi Glace z'probiere: See-Igel :-)

Erstuunlecherwiis nid Mau u huere wüest xi. Wi dir üsere Glace-Aktion u üsem Föteli chöit entnäh, isch izze dr Summer zrüggcho. U sogar es Hotelzimmer MIT Fänster u MIT Ussicht heimer gha:

Gester simer när i 10h vo Sapporo uf Tokyo gfreeset womer izze si u hüt (ja Ryan, dr Ürsu isch würk sehr interessiert a Kultur) is National Museum si:

Gester hets no das karabishi ramen gäh u das bstöut me mashi-mashi (extra) füre Schärfegrad vo kara (Chili) u sansho (japanische Pfäffer) festzlegge:

So, izze heimer de aui Läckereie vo de letste paar Täg ufzöut u so löh mir öich.

Diä wo a Gurte gö: viu Spass, Sunneschiin, gueti Bands u viu Biär.

Ansch u Ürsu

... few days later

Tschou Zämä

Wi geits nech aune?

Es paar Täg si scho wieder vergange u mir hei wieder viu, viu gmacht u xeh.

As ersts: dr Sturm het üs verlah u ds Ärdbebe het üs nüd gmacht.

Verwütscht heter is gliich chli, mit schlächtem Wätter u eim Tag wo aui Züüg usgfalle si. Aber mir hei Glück gha u wei is nid beklage.

Was heimer aus gmacht u xeh?

As ersts heimer ja wöuä go Marimos sueche u das heimer erfougriich gmacht:

Was isch das frageternech? Das si Algebäueli wos nume hiä gut u nume i däm einte See u nume i zwe, drei Buchte. Wemer di japanische Zeiche richtig düütet hei, entstöh diä indäm sich Alge-Stückli zämäschliesse und mit Strömig wärdä diä zu Bäueli wo ging grösser wärdä (31cm Durchmässer isch z'gröschte) u immer töifer abe sinke. Di ganz grosse si de so töuf unge, das si nüm gnue Liächt überchöme, löse sech uf u drmit forme si nöii. So is dat... 

Am nächste Tag heimer de wöuä ga eine vo de klarste See luege, aber da het is dr Typhoon äbä eh Strich dür dRächnig gmacht. Er het nämlech aui Züüg lahmgleit u drum heimer eh Alternative müesse sueche u gfunge :-)

Mir si ines riesigs Sumpfgebiät ga latsche u hei sogar einigermasse Glück gha mitem Wätter. Es het nume gnislet:

Gwohnt heimer übrigens in Kushiro u das xeht ded so us:

Mir si i somne Homestay xi u churz vorem Wecker hets a dTüür bouderet u mir hei scho wöuä usrüefe u när isch ds Japan-Müetti vor üsere Tür gstange mitem ne Tableau u het üs Schnitteli mit Confi u Kafi as Bett brocht. Flotti Sach, hä? Jaja, so isch das hiä in Japan. Liäbi si das hiä.

Hüt heimer eh Usflug id Bluemefäuder gmacht u meh wüsse mer gad o nüm, drum hiä eifach no eh Ladig bluemigi Grüess vo üs!

Ansch u Ürsu