Es fähle wieder paar Tag u sooooo viu Föteli. Drüm düemer afe dPaparazzi vo öich zFride stelle:
När simer imne Bambuswald xi wo dr LP as Top Pick dinne het. Wo me nid as Foto cha festhalte... Mir finge ne zwar schön, aber so u huere überwäutigend isch das aso nid xi. Mir finge, mir hei fasch am beste usxeh i däm Wald:
När heimer is gägä Abe uf Geisha-Jagd gmacht. Das isch fasch wi Wildlife-Watching. Me weiss niä wo diä uftouche... Ürsu het zwar nid begriffe was das gnau isch mit dene Geishas, aber xeh heimer ämu eini... Gad wo Nicu u Ürsu eh Rundi Oktopuss-Bäueli bstöut hei, het dAnschle i Lade gmöget, me müessi sofort usecho... U scho isch dMüette vor üs xi. Reaktionsschnäu isch dr Ürsu mit dr Kamera is nächste Gässli u het eh U-Move gmacht für dChatz vo vor zFötele. Atemlos ischer wieder ir Houptgass acho, nume fürs feststöuä, das si sech umdräit het u zrügg gäg Ansch u Nicu gloffe isch... Drum het nume Nicu Foti gmacht u hiä wärs:
Yeah, eis Highlight meh abghagget u ab nach Nara. Ded sitzt eine vo de gröschte Buddhas u dä heimer natürlech o müesse xeh:
Dasch sini Wohnig u hiä isch är:
När simer in Kyoto no im Golden Temple xi u ded heimer natürlech o no es Selfie gschosse. Vor üs hets eh Schüssle gha, dä het dMüette umedurigiert zu fötele, da wäre Nicu u Ürsu gad Single. We dChatz 5cm näbem imaginäre Chrütz gstange isch, ischer uf diä los, as we si öppis gstohle hätt... Mir hei üs amüsiert u Nicu u Ürsu hei sech höchstens ab de 12-jährige Teenager-Chatze gnärvt wo 45min im Bus gsunge u drzue grännät hei: it's such a sad Song... Bad song my ass...
Mir finge, eis vo üsne bessere Fotis. Merci Nicu!!!
Gschlafe heimer ire Kapsle. Dasch eh 2m längi, 1m breiti u höchi Höhli wome vor dra cha es Roulot abelah. Di meiste Lüüt si da schockiert, mir fasziniert. Eh eigeti Lüftig (wo dr Nicu ir erste Nacht ni het chönne bediänä u ab sine eigete Usdünstige fasch verstickt isch), eh Fernseh u es Tüechli u mi isch da bestens versorgt. Ohni Platzangst u nüd:
Womer am 2te Abe si heicho, heimer gad vor dr Huustüre es französischs Päärli atroffe. Wo dAnsch de ds Schloss nach gefühlten 5sec nid troffe het, het ihre le Bouffeur de Grenouille nätt ghulfe mit: you have to törn and puush (french accent). DAnsch het das mitemne trochne "yes, i know" inkl. arrogantem Ansch-Blick abtoh u Nicu u Ürsu si hinger dra fasch vereckt. Ds Mandli het nume no ganz truurig sini Chatz agluegt u isch ab i sini Kapsle.
Izze simer in Matsumoto. Hiä heimer es Schlössli ufgsuecht, rächt sexy:
U si no ihmne Resti xi. De heimer läckeri Noodles verdröscht u si äuä as Highlights düregange. Mir hei ämu eh lokali Spezilität döfe probiere: fish guts... Fisch Mage. Momou, merci. Nicu u Ürsu hei das, ohni es Xicht ds verziäh verdröscht. DAnsch het übrigens ihre Ateil gester gha. Nato. Fermentierti Bohne wo Schliim ziäh. Nicu het bim probiere fasch zwüsche Zug u Perron gchötzlet u dr Ürsu het gad 5dl Schoggimiuch müesse exe.
Izze wohne mer imne nätte, alte japanische Huus u hei es riesigs Zimmer mit Gmeinschaftsbad. Wo Nicu dDuschi het ufgsuecht isch es Päärli verschmitzt grinsend ded use cho. Nach dr Duschi het Nicu üses Zimmer verfäuht u zGrinse isch dene zwöi schnäu vergange wo är bi ihne inne gstange u i sim Kimono fasch scho abglägä isch. Muahaha.
Bettwanze heimer übrigens i üsere Falle o verwütscht, eh dicki mit blonde Chrusle, eh blondi mit Handles u eh Plattfuss mit bruune Chrusle. Mir si aui uf üsem Chläbband bliibe hange. Näbä zwe Mügge u X Fusel. Hut ab.
Happy time, adios
Ansch, Nicu, Ürsu
Keine Kommentare:
Kommentar veröffentlichen