Moving on...

Ahoi

Mir si üsne Bedbugs sit drei Nächt entflohe. Nämä im Momänt soutüüri Hotel, aber mit dr derziitige Luune vom Ürsu macht aus angere weni Sinn.

DLuune besseret sech jewiils bim Ässä oder bim Biär wieder :-)

Faus der nech hie ir Nöchi vo Kuching befindet: eh Abstächer i Top Spot Food Center isch äuä sogar eh Flug vo Singapur oder Kuala Lumpur wärt:

Das Ding isch uf dr Terasse vomne Parkhuus wo si im Momänt irgendwiä vo inne ushöhle...

In Kuching hets chli usserhalb no einisch es Orang-Utan Centre u das isch rege bsuecht:

The monkeys are free to come. Jaja... Nachdäm dr Chübu Frücht isch usgläärt worde, het sech dr Ranger derfo gmacht u dr Ürsu gmeint: "ah, dasch de kuul, da chöi dAffe säuber cho näh u hole". Woruf dAnsch gmeint het: "dä geit izze i Wald ga rüefe..." U druf dr Ürsu: "Sicher nid..." Leider isch me da haut immer no in Asiä u ds Gäud chunt jo nume solang dr Aff sech zeigt... DAnsch het Rächt bhalte u entsprächend isch de dr Ruef vom Muezzin im Walde erschollen... U am Ürsu sini Theorie quasi no im Keim erstickt worde :-)

Izze simer in Indonesiä. Em Land vo: Transport, Ma'am; Hotel, Sir... Aber o em Land vom Bintang:

Hinech isch dr Schwäbu cho u mir fröie üs daser da isch. U das nid vergäbä!

U das isch mit ihm mitgreist :-)

När heimer o no Reisenews: mir verlöh dr Süde vo Asiä u flüge am 17.6 vo Bali uf Japan. Wenn u öb mer zrügg da härä chöme, wüsse mer no nid, aber mir halte nech uf jede Fall ufem Loufende.

Schöns Wucheänd

Schwäbu, Ansch u Ürsu

Genau...

Tschou zämä

Mir hei es zwöits Mau Bedbugs verwütscht u müesse sägä, zur Stimmig treit das wenig bii :-(

Entweder hei mer se i de Ruckseck mitgschleipft oder mir hei im Zimmer gha. Üses Zimmer u dRuckseck u aus nid-wöschbare isch mit Gift vergaset worde... Üsi Chleider heimer aui lah wäsche u tumblere... Izze hoffe mer z'beste. Süsch chöme mer de zrügg zu öich.

Möge gad nid viu schribe, obwous hiä würklech schön isch. Mir mache glich ging no Sache. U öich chöimer no paar Fotis zum aluege zeige:

Penthouse, baby

Guete Morge us Sibu

Mir ligge hiä i üsem Zimmer u dusse rägnäts. Si in Sibu u hei hüt eh gmüetleche Tag vor üs. Am 1130 müesse mer üse Fähri schnappe u chöi drum no chli üses Zimmer gniesse.

Gester simer hiä acho u dAnsch het im Hotel für nes Zimmer mit Fänster u Doppubett gfragt. Da mir prägt si vo üsne Wanze göh mir wieder jedes Zimmer ga aluege. Me het is de im 8te Stock iquartiert imne Zimmer wo nid eis, sondern vier Fänster het :-) sozsägä Rundum-Sicht u im Bad o no es Fänster. Nice. Faus dr aso Mau in Sibu söttet si: Li Hua Hotel, Zimmer 804 für 75 Ringitt (21.-)

There you go.

Di letste Täg simer no im Similajan NP u bi de Niah Caves xi. Beidi Mau simer mehräri Stung ga loufe u s'isch sehr schön u grüen xi. Bi de Niah Caves simer zure riesige Höhli glüffe wo über 200'000 Schwaubeli wohne (u schisse). Ded müesst me dür dHöhli düre u chäm ine nächsti wos so alti Rockpaintings het (aso Tags vo de Höhlemönsche, gäu Fäbu). Ds herrleche Odeur i dere Höhli het üsi Sinne de benäblet u mir hei di falschi Abzweigig gno. Negative Effekt: kener Wandbemalige; positive Effekt: nid verstickt :-)

Di sexy, grüeni Schnegge heimer o no xichtet:

Im nächste Nationalpark heimer de no einisch gschwitzt. Nach öppe 15min isch me bachnass u hei wiiters Grüen xeh:

Ganz am Schluss het no eh Familiä Makake üse Wäg gchrützt. Natürlech wiit, wiit obe i de Böim, so das üses iPhone ja keh Chance het. Plötzlech isch de eh riesige Bänggu vomne Ast paar Meter näbä üs abe cho u mir si nid ganz sicher xi, öb dasWurfgschoss üs gulte hätti. Äuä nid, aber mir si gliich wiiterzoge u dMonos när ou.

Izze gömer no uf Kuching u si ded de sächs Nächt, bevor mer de uf Indonesiä abzische.

Öich wünsche mer es guets Wucheänd u natürlech üsne Voisins guets Zügle!

Ansch u Ürsu

Bloody Blogg

Allez, Allez, Allez, Allez

Mir si in Borneo u hei Bluet glah... Im erste Hotel womer si xi het dr Ürsu öppe 20 Stiiche gha am Arm... Im Dschungu si de diä besser worde, bevor mer zrügg uf Kota Kinabalu si...

Ded heimer es Hostel mit Teppichbode u Wanze verwütscht... Resultat: dAnsch het 50 Stiiche am ganze Körper gha u dr Ürsu so usxeh... 

Dasch dr lingg Arm. Ufem rächtä glich viu  und, o Wunder, dHandles si o agriffe worde... Äuä öppe 100-150 Stiiche heter verwütscht...

Nachem Hotelwächsu heimer de aui Chleider gwäschä u üs nachem Dusche mit Hand-Sanitizer (kills 99% of all germs) igriibe. U über das drüber no Antibrumm Forte... Izze heimer gloub eh Durchbruch erreicht u nümme meh Stiiche...

Im Dschungu simer no go loufe u ded hets Ürsel gad no einisch verwütsch. Eh Bluetegu het sech a ihm festgsuugt... Wwwwwwwwwuhuuuuu... DAnsch het däm aber de mitemne Antibrumm-Sprutz dr Gar us gmacht... Ds Bluet isch gflosse u Träne o (haha, nei, er isch tapfer bliibe, dr Ürsu).

Schöns heimer natürlech o no erläbt, wiu schön isches hiä sehr:

Am Strand simer xi:

U Läckereie heimer gfunge. Das isch Roti, u Roti isch eh Art Pancake. Dä da hiä isch gfüllt mit Zibele u Ei. U derzue gits Linse- u scharfs -Curry:

So, u hiä heimer no es Föteli vomne Wasserfau. Womer si härä gwatschlet:

So, öich eh guete Wuchestart.

Ansch u Ürsu

Dr. Dolittle und die Brüllaffen

Hi,

Mir sitze wieder z'zwöit im Bus Richtig Kota Kinabalu. DMelä u Märcu hei mir müesse zrügg lah, wiu diä no paar anger Sache wei mache. Merci öich zwöine fürs cho. S'het gfägt :-)

U merci ar Mama Melanie für dLäckereie usem Bündnerland:

@Nad: Salsiz u Bündnarflaisch. Eh Läckerei, sägi dir ;-)

Mir si izze drei Täg bim Kinabatangang Fluss xi u hei allerhand Tier xeh: Orang-Utan, Tarsier, Fischotter, Krokis, Hornbills (Nashornvögu) u vieles meh:

Dasch eh Naseaff. Di dominante Mändli vo dene hocke dr ganz Tag ufem Boum u zeige ihres beste Teili :-) git äuä es Dschungu-Viagra nöime hiä ;-)

U natürlech o no dr König vo de Monos hiä:

Mir hei de de Lüüt o no eh Dschungu-Bewohner zeigt: Urs, der Brüllaffe. Nachdäm mer eh Stung z'spät si abgholt worde, het de dr Transport statt 1h45 öppe 3h gha. Das het dr Ürsu weni gfröit u er het nach Discount verlangt. Das isch mit fougendem Satz abgschmätteret worde: if you do not pay for the transport, we don't drop you off on your way back. Genau dAntwort wo ihn i sim süsch scho enervierte Zuestand beruhiget het. Nach zwöi Telefonat mit em Sales Office isch de dr Transport nume no halb so viu kostet. Und: mir hei eh Privatfüehrer u es Privatboot für zwe vo drei Täg gha. Meet, Mr. Howler-Monkey.

In Malaysia gits übrigens wieder Läckereie :-) Ice Coffee u Fried Rice zum zMorge. Yay!

So, das wärs öppe vo üs. Izze gö mer langsam Richtig Kuching. Dasch im Südweste vo Borneo.

Öich wünsche mer eh schöne Tag.

Ansch, Melä, Marc u Ürsu

Borneo mit Mel u Märcu

Selamat

Mir si wiiter greist u izze in Borneo, Heimat vom Orang Utan (wo mer gö ga sueche i de nächste Täg). Mir hei dMelä u dr Märcu troffe u freese izze es paar Täg mit ihne ume :-) isch schön, wieder Mau Bsuech z'ha. U mir hei sogar Läckereie vo deheime übercho. Schoggi u Bündnarflaisch :-)

Üse erst Tag heimer in Kota Kinabalu verbracht womer eifach chli umeglatscht si:

Am Abe simer de a Nightmarket wo dr Ürsu i gueter Erinnerig het gha. Leider ischer aber de nüm so xi wi in Erinnerig. Ds Fischli u dTigerprawns si zwar super xi, aber zGmües, ds Riis u dNoodles si für nid gad dr Huufe xi. 

U das Ganze het ungeremne Zäut statt gfunge. Bis ds Ässä isch cho isch das ewig gange. U mir hei so heiss gha, das mer öppe aui dFarb vomne grillierte Shrimp hei agnoh gha. Haha.

Izze geits de es paar Täg i Dschungu zämä u de trenne sech de üsi Wägä wieder. 

Mir wette nech natürlech no es Föteli vo de Philippine zeige womer bis izze no nid hei chönne :-)

So, das wäris wieder einisch vo üs. Mir hoffe, das mer de nächst Mau chli mit Tiärli chöi punkte. Aber da simer ja nid so glücklech xi, ir letsti. 

Häbäts guet!

Ansch, Mel, Marc u Ürsu

MamSir in Manila

Hello Mam'Sir

Dasch di typischi Begrüessig hiä. U natürlech übernimmt me diä u dr Ürsu dued de o gärn Sir's as Mam bezeichne wiu är das so intus het.

Mir hei eigetlech no ä Tour dür Nord-Luzon wöuä mache. Aber womer am Samstig am 11i am Busbahnhof si acho, heimer döfe feststöuä das aui Busse bis am 3 usbuecht sige... De heimer eh Tag länger müesse in Manila bliibe u drum hets när nume no für ne Mini-Nordtour glängt. Es normals Astah für Billet duuret hiä 30min...

Am Sundig heimer de glich no uf Baguio chönne. U ded ischs herrlech chüel (25 Grad) xi. Mir hei sogar chönne go loufe u si ufne Hügu gsecklet. Wi sech's ghört. U so heimer glich no eh Iiblick id Cordillera gha:

So xeht das auso us. Schon schön, nid?

Mir hei im Übrige eh Luxusbus gno u me het üs fründlecherwiis gad näbä Lokus gsetzt. Dä het natürlech eh Nid-funktionierendi Türe gha u nach paar Stund di normale, sehr agnähme WC-Usdünstige i üsi Richtig verströmt. Merci.

Izze simer zrügg in Manila u bliibe gloub hiä. DTransporte uf de Philippine si nüd. Faus dr Mau göht, machet eh Plan u flüüget...

Apropos Usdünstige... So xeh hiä dFlüss us:

Manila het aber o sini schöne Siite:

Mir mache izze gad es paar Täg nid viu. Chli sii, guet Ässä, Teele, Käfele u Biärli näh...

Ürsus Bar heimer no gfunge :-)

U natürlech no süessi Läckereie:

Weniger eh Läckerei isch dr Zucker wo süsch zum choche bruucht wird... Chürzlech heimer Spaghetti mitere Tomate-Olive-Kapere Sauce gha wo eidütig nid nume dPrise Zucker vom Italo het dinne gha. Mind. eh Suppelöffu isch ded inne glandet... U bim Brötli womer am nächste Tag zum zMittag mit Pesto bestriche hei, das selbe. Es Pan Dulce us Boliviä isch versalzt drgägä...

Mir wünsche nech eh guete Tag u eh churzi Rästwuche