(Manta) Bowl

Sali Zämä

Üsi Reis dür dVisayas isch zÄnd. 9 Insle heimer xeh u si äxtra da härä uf Donsol cho. Hiä hets Walhaie u Mantas wo me cha ga luege.

Beschwärlechi Schiffahrte heimer uf üs gno u schöni Insle xeh:

Dasch üses Pumpboat. Scho gläärt.

U dasch dUssicht us üsem Superhotel uf Sibuyan-Island. Ded heimer nume ei Tag chönne bliibe wiu dFähri womer hei wöuä näh isch bankrott u drum heimer de das Pumpboat döfe sattle.

Gemäss üsem geliäbtä Reisefüehrer sig ir Hochsaison (u dasch izze) nid dFrag öb me eh Walhai xeht, sondern wi viu. U dMantas stöh bim Mantabowl ah für putzt z'wärdä.

Dir entnämäts üsem Schribstil. Xeh heimer nüd! Drei Touchgäng u insgesamt 10h ufem Meer u gfunge heimer NÜD. Mir si rächt enttüscht, müesse aber zuegäh das das z'erst Mau isch, das mer würklech Päch hei gha.

Drfür heimer eh kuuli Bar gfunge womer es Biärli u eh Kokos-Cocktail verdröscht hei:

Bim Walhai-watche het me is es Video zeigt. Mit tuusig u eire Regle. Nachdäm mer de 2h ohni Sichtig im Trüebe gfischt hei, het de es angers Boot ganz wiit wäg eh Walhai xeh. Innert Sekunde het de dr Motor ufghüület u di ersti Regle isch vergässä gange:

- 1 Boat per Whaleshark

28 Boot döfe ziitglich nach Walhaie sueche. U vo dene 28 hei sech 21 um dä arm Hai versammlet.

Ded acho het de eh wahri Tribjagd agfange. Jedes Schiff het sech probiere füredsdrängle für dSchnorchler überem Walhai abzsetze. Minus di nächsti Regle:

- 6 Snorkellers per Whaleshark

18 hei sech drum ume tümmlet. Üs het me de o abgworfe u mir Idiote si no is Wasser... Ganz ufgregt het de dr Butangin Interaction Officer (dasch dr Biolog usem Vietnamblogg - dr Böögg wo am beste änglisch cha vom Dorf) dAnsch gfragt: did you see the shadow? Shadow my ass. Nüd heimer xeh.

Übere Touchgang schribe mer izze nüd. Dä het sech ähnlech abgspiut. Mir hei ir Suppe grüehrt u ufne Manta ghofft. Nüd isch xi.

Izze gömer uf Legazpi, när uf Manila u no i Norde vo Luzon wos schiins chli chüeler sig...

Häbäts guet u hiä no es Foto vom geilste Gfährt uf de Philippine: ds Jeepney

Arrivederci

Ansch u Ürsu