Nöii Tricks

Aloha us Krabi

Bevor mir am Sundig Morge üses tröiste Reisegspähnli si ga hole, heimer üs no Mau ine Massage begäh. After all, we're in Thailandia. 1h isch di Tortur gange. Nach öppe 5min het dAnsch es ersts Mau quiket, was es 'oooh, do you feel pain?' g'ärntet het. Damn right i feel pain... Zu däm Ziitpunkt het dr Ürsu zFägefüür scho hinger sech gha u isch ir Höu acho. Mit aller Chraft si zersch dFinger i Rügge bohret worde, när dUngerärm u am Schluss isch dMüette uf ihm ghockt u het ihm mit de Chnöi dr Stiärnacke malträtiert. Merci schön. Nächst Mau Massage gits bir letste Ölig...

Chum heimer dr Chrigu abgholt, simer de o scho ab go dr Big Buddha ufem Hügu ga luege:

Üse Taxifahrer, ein Mann ohne Plan und Lesefähigkeiten, het üs de as ersts eifach ufne Hügu ir Nöchi vo däm Buddha wöuä fahre. Wo de plötzlech dStrass im Nichts g'ändet het, het o är de müesse umchehre. Dr Wäg wäri zwar agschribä xi, aber jänu... Uf Umwägä simer de acho u dasch aso no schön xi ded obe:

Übrigens het üs der nette Herr Lienhard Läckereie, Heftli u Gschänkli vo Rebi/Säru mitbrocht. U mir si dr Meinig: er daf wieder cho :-)

Am Abe simer de über Umwägä no am Night Market acho, wo si dr Satestand mitemne Ventilator agfüüret hei. Smart people.

Am Tag druf simer de richtig Krabi womer izze no gad si u hei eh tolle, nöie Trick zeigt übercho. Ds Busterminal isch vo hinge agstüüret worde. Sodsägä gedeckt getarnt u me het üs drü Wiisbrot öppe 100m vorhär ganz hektisch usegwunke. Me müessi da sofort usstige u blabliblabla. Dr Sinn vo dere Aktion isch üs de ufgange nachdäm per grossem Zuefau gad ded äxtra es TukTuk uf üs gwartet het. Natürlech mit Special Price... Da mir dr Priis aber scho kennt hei, si mir i aller Rueh di 100m zum Busterminal gloffe (wo üse Bus gwartet het), ded ga bisele u hei de es angers TukTuk zum regulärä Priis ergatteret. Wo dr Chrigu am Urinal isch gstange, heter dr ganz verdatteret Bus-Anus näb sech gha. Schad heter ne nid abislet ;-) me cha sägä, ei (dumme) Trick me abblockt.

Izze simer wi xeit in Krabi und gniesse ds Biär, dr Nightmarket und di schöni Gägänd:

Wiiter wett dAnsch no eh Ohrepänkli-Trend bekanntgäh:

Kleine Kugel vorne, grosse hinten. Nid das dr de meinet si heig dä öich abgluegt.

Üses Hotel isch im Übrige sooooper u mir hei sogar es Zuesatzbett für 15$ im Zimmer. Leider, leider isch das eh öppe 3cm dicki Matratze u womer fürne 2ti gfrogt hei hets gheisse: maybe you pay a little extra. Ürsle het de eh Rüggeschade erwähnt u dOuge klimperet u de ischsi doch gratis xi. Gnützt hets nüd, Chrigu het glich Rüggeweh. Muahaha. Aber dMassage am Strand heter de us unerfindleche Gründ glich nid i Aspruch wöuä näh.

So, das wärs u nid vergässä:

Häbäts guet,

Ansch, Chrigu, Ürsu

Muslimischi Manne-Schuel

Salam

Hocke mer a üsem zwöitletste Malaysiatag doch gmüetlech im Spunte u trinke es Guiness...

... u da chöme zwe bärtigi, gwandeti Manne i üse Spunte ine. U was mache si? Stüüre suber ufe blond, blauöigig Unglöibig zue. Ds Teufelsweib a sire Siite (wo zu auem Überfluss no es sündigs Satansgetränk zue sech nimmt) wird de geflissentlech überseh u ds Taupli vom Unglöibig gschüttlet (irgendwiä hets nach zischt u nach verbrönntem Fleisch gschmöckt). Me möchti öppis zeige u schlaht eh vergilbte Ordner vore männleche Koranschuel uf. Öb nid möchti gspändet wärde. Sozsägä investiere ine Rückschritt. Muahahaha. Herrlech. Investiert heimer. Aber natürlech nume ines Bräugetränk :-)

Gfunge heimer no eh Läckerei. Freeze-dried Jackfruit. Wär das no niä het gha: eine Sünde! DMelä het is diä im Mai Mau brocht u mir hei diä wieder gfunde :-)

Mir hei de no eh Usflug in Langkawi gmacht. Zumne Gondeli u emne 7-Pool Flüssli. Üsi Gäudreserve si knapp worde u drum heimer berächnet das mer no 110 Ringit bruuche (öppe 30.-). Ürsu isch de voller Tatendrang zum Bankomat gschritte u het Batzeli useglah. Da ds 0 nid richtig funktioniert het, heter de mit grosser Fingerfertigkeit u Wiitblick z0 chli übermotiviert betätiget. Resultat: mir hocke izze in Thailand mit 1000 Ringit u wärde mit guete Wächsukurse für dä Batze überhüüft...

Bim Astah fürs Gondeli heimer de di männlechi Koranschuel hinger u vor üs gha. Es guets Dotze Habibi-Brüeder mit u ohni Bärt het um üs gschroue. U im Gondeli si o no 4 vo dene mit üs xi. Läck hei diä Füchs im Rache gha. Hätte äuä glich söuä investiere. Vilech hätts de Zahnbürsteli gäh für dKoranschueu. Säuber Schuld. 

Ufem Hügu bim Gondeli heimer di bekannti Ussicht gha:

Nebel. Soweit, resp. sokurz die Sicht reicht. DUssicht hättä mer de fasch verpasst:

U si när bi dene 7 Pools go bade. Di münde när ine Wasserfall :-) het äch Mau eine au di Wasserfäu zöut wos git?

I 8h simer de gester bis uf Krabi (Thailand) gfreeset u hei ded am Night Market zNacht gha:

Wi immer eh grossi Läckerei. U wi immer hets in Thailandia o wieder "das gemeine Weissbrot". Sogar Schwiizerinne heimer xeh. In Bathik gwandet si si näb üs düregschliche u si ganz enttüscht xi, das se dStandbsitzer nid wiedererkennt hei: häsch xeh, di händ üs nöd wieder-erchännt... ja, heit äuä zweni usgäh für ne bliibende Ideuck z'hinterlah. Läck vermisse mir dä schön Dialäkt... 

So. Genug der Geschichten. Fahre iz de gad in Phuket Town ih. Ded landet morn dr Herr Lienhard u mir hoffe es dürstet ne nach Chang u glustet ne nach Thai-Läckereie :-)

Adios, Ansch u Ürsu

Gitarre-Johnny

Hoi Zema

Mir hei letst Samstig dr Gitarre-Johnny troffe. Ürsus Liäblings-Traveller... Si im Egg-Spunte glandet. Über Umwägä... 

Hei üsere Bibu (em LP) wieder Mau z'viu gloubt. Nachdäm mer scho ir erste Superbar fasch igschlafe si, heimer is i zwöit In-Spunte ufgmacht. Dä ghöri amne nättä Herr usem Balkan. Womer de ded si acho, het sech dä nätt Herr as dicke Chrot hinger dr Bar usegstöut. Bewegt het sech sis Muu, si Finger u sini Bardame. Är isch ded ghockt u het brüllend dr Lade unterhalte. Dr Finger heter nume bewegt wener dMusig liisliger gstöut het, das ihn o ja jede versteit... Mou, eh guete Tipp.

Druf abe simer zrügg womer härä ghöre... A Strasserand ga billige Fusu trinke. Ded isch er de uftoucht. 'Is sis seat teiken' (man höre den fronsösischen Aggson)? Heter gfragt u isch de abgsässä näb ds Inder-Mandli wo o a däm Tisch isch ghocket. Das het keh Änglisch chönne (hei mir scho usprobiert) u het eifach chli Schnepsle inegjagt. Drum het üs dr Frosch de ganz lang beobachtet u plötzlech xeit: iu are from ollande. Nei, simer nid. Nice try... Nachdäm er de no öppe 7 anger Länder het ufzöut heimer im de ghulfe u xeit mir sige us sim Nachbarland. Aaaaaah, Tschörmäni. Genau.... Mir hei ne de nüm beachtet u de heter sini Gitarre (wär nimmt scho sini Gitarre mit uf reise?) packt u sech ere andere Gruppe Traveller agschlosse. A sini Stöu si de 2 Malay-Froue ghockt u hei mit üs afah ploudere. Was so oder so interessanter isch xi. Plötzlech hets de vom Nachbartisch afah zupfe u singe. U sit däm rägnets...

Am Sundig heimer de eh...

... gha u nid viu gmacht usser Spaziergang, ässä u Chino. Mir si ga Lucy luege. Scarlett Johansson wo as Droge-Esel missbruucht wird. Dr Droge-Büttu wirdere i Buuch gschnipslet, Büttu geit uf, Scarlett cha 100% vo ihrne Hirnfähigkeite abrüefe. Somit xeht si nid nume guet us, sondern cha o no kämpfä, Sache la umeflüge u sech ine Computer verwandle. Fazit: Scarlett isch eh Sahneschnitte.

Jo, me erkennt ade Gschichtli u weni Fotos: s'passiert nid huere viu hiä. In Alor Setar simer no xi. Ded hets eh Moschee:

U hiä in Langkawi hätts äuä Stränd (womer nid xeh wius rägnät). Drum chöimer o nume es Ässäns-Foto poste, aber was für eis. Ha!

Grossi indischi vegi Läckerei uf Bananeblatt. Da stuuneter, hä? Ürsu het o gstuunet. So fest daser ufem Heiwäg ungeremne Schiud isch düreglüffe. DAnsch het brav Schirm u Chopf izoge, zMandli nid. U zägg, angers dri glüffe. U ja, me muesses zuegäh: s'het hohl dönd...

So, wei nech ni längwile. Mir hoffe dir heit izze Sunne, wesi scho üs nüm vergönnt isch. Nächst Mau de us Thai-ai-ai-landia!

Ansch u Ürsu

Gimme the keys...

... I'm drunk

Mir si izze in Georgetown uf dr Insu Penang u hei wieder Mau eh Drinking Joint gfunge :-)

Dir xeht, dÜrsle fühlt sech sichtlech wohl unter seinesgleichen: Trunkenbolde u Tunichtgute si das hiä... Host vo däm Gspass si natürlech, wi chönts o angers si, Chinese. ZBiär isch billiger as im Lade u s'wird ordentlech öppis gschlückt. Weme de nümme ma, torklet me richtig Töffli u zu de Töffliufpasser. We diä xeh das eine voue isch, chunt dr asiatisch Nez Rouge zum Zug. U dä xeht so us. Ds betrunkne Mandli wird zur Siite gwinkt, dases bim useschiäbä nid no anger Töffli kaputtet. När wird Mau zTöffli usegfahre, aglah u parat gmacht zum abfahre. Ds Mandli muess de nume no gnue schnäu afahre, u dGschwindigkeit dued de dr Räschte :-)

Georgetown isch bekannt für ihri Street-Art und ihre Streetfood u beides heimer natürlech o scho gfunge:

Gester simer ufem Penang Hill und im Botanical Garden xi:

U am Abe go nes Biärli näh. Ded simer vomne Mastergwitter überrascht worde. Zersch heimer gar nid inewöuä ga hocke aber wos de plötzlech Riesetröpf het afah abelah, heimer de doch inemüesse. Vilech mögeter nech ja dra erinnere das sone Soumade ar Ansch ihri Schue in Bali gstohle het... Ürsu het scho denn gmeint gad nöii choufe, aber dAnsch het nüd wöuä wüssä... Ufem Heiwäg isch de ds Wasser nüm abglüffe u mir si am Schluss imne fasch Chnöi-Töife Fluss hei gwattet u zägg, Anschle FlipFlop abnang. Izze hets hüt nöii gäh, aber leider nume Flipper u nid Havaianas. DAnsch isch grummlig u fingt: me chönn haut nid ging guet usxeh ;-)

Dir xeht, es rägnet ni nume bi öich :-)

När heimer no es Gschichtli us de Highlands womer vergässä hei. Am letste Abe heimer ine Bar wöuä womer scho am vortag si xi. Däm sini Zapfsüüle isch nid gange: makes too much foam... Rein zuefälligerwiis isch ds Fläschebiär natürlech meh as eh Stutz tüürer xi. Was mer am erste Abe no hei lah düregah het de dAnsch am zwöite Abe mitemne "yes, yes. You should clean the pipe" unterbunde. Dr Ürsu hätti gärn clean your pipe verstande, aber me cha nid aues ha :-)

Ah, was me hiä natürlech o no cha, isch leckere Torten fressn :-)

So, öich wünsche mer es schöns Wucheänd ohni Rägä!

Ansch u Ürsu

Hügeli uf, Hügeli ab

Salut us de Highlands

Mir mache chli ne Achtibahnfahrt z'düruf u z'dürab. Vom Fraser's Hill simer mitem Taxi zLoch ab ane Zugstation. Scho ufem Abewäg het is zTaximandli wöuä überzüüge dases ersch am 2i eh Zug heigi u är für ne guete Priis ad Busstation fahri. Dä hei mir natürlech scho kennt u prompt hets de am 12i eh Zug gha. Und: usverchouft. Natürlech. Höchstwahrschiinlech hätts Platz gha, aber äuä nid im gliiche Wage. U da me hiä in Malaysia dChatz nid daf elei loh, wäri so sündigs Verhalte natürlech gaaaaar nid abracht xi! Anyway. 

Nächst Zug 14:00 u mir zur Busstation (im nächste Kaff) müesse... Mir zrügg zTaximandli ga frage u är het de natürlech 10x meh wöuä as dr Zug choschtet. Aber, so är, es choschti de vom nächste Bahnhof zum Bus o 10.-. Guet, mir nüd gloubt u ab mitem Zug is nächste Kaff u ded het de ds Taxi, o Wunder, nume 2.- koscht. A Busbahnhof u ded usegfunge: nächst Bus am 4i. Super. Zrügg a Bahnhof u 1.5h ufe Bus gwartet, Dampfbüppi verdrückt u Tea Tarik gsüfflet. 

Fazit 1: Mir si nüm zJapan

Fazit 2: S'si äbä doch aus Arschlöcher, di Taxifahrer (mit 2 Usnahme: P. K. us B. u C. L. us B)

Viu Text, weni Bilder. So heiterse gärn, dBloggs, gäuet ;-)

När simer in Ipoh xi u hei kes einzigs Foto gmacht. Drfür heimer iz hiä es paar usem nächste Bärgdorf: Cameron Highlands.

Hiä simer gester xi ga loufe u am Abe (Achtung Sünder) ga es Biär näh. U de isch vor üs es Malaye-Päärli abghockt. DChatz vou verschleieret (dr Sidi Abdel Assar vo El Hama het nume zwöi schöni Ouge xeh). U was macht das Teufelsweib? Es dued zum Ässä ihre ganz Schleier furt u zeigt ihres (nid so schöne) Xicht!!! SÜNDE! Und was isst si? Eh Mais-Cholbe - Phallus-Symbol! 20min het si unverschleieret a däm umegräuet. DWäut geit zGrund. Mir si entsetzt.

Gut, hüt simer no go Teeplantage aluege u das ohni wiiteri Sünde zbeobachte:

Und gester, nach langem Zögere, het sech de dr Ürsu wieder ane Äntä gwagt. Z'erst Mau nach sim u Schwäbu sim Äntä-Reinfall. U mir chöi dä Blog beände mitemne: Ente gut, Alles gut.

It's a Waterfall

Hi All

Mir si im Momänt ufem Fraser's Hill. Herrlech chüel isches hiä. 22-25 Grad. Sensationel. So wis muess si :-)

Leider isch Rägäziit u s'pisst ging öppe. So o hüt, womer si go spaziere. Üses Ziel isch eh Wasserfall xi u nach knapp 2h si üs de drü Lüüt entgägä cho wo scho bi däm si xi. Womer de gfragt hei öber nice sigi, het üs dr Typ di zueträffendsti Antwort gäh wos git: well, it's a waterfall. Und so isch das. Irgendwenn het me eifach gnue vo dene xeh :-) aber mir beglücke nech iz glich:

Schön isches hiä obe süsch aso sehr.

U natürlech grüen. Wi sech's ghört für Malaysia.

Hüt Morge heimer o no öppis guets erläbt :-) si am Zmorgebuffet ghöcklet (wo usnähmend wüest isch xi)  u hei üses Toast im Toaster versenkt u när gwartet. När ischer uftoucht: dr toaststählend Schnäbifinger. Het dä doch tatsächlech üses Toast entwändet! U wo mir de es nöis hei wöuä ga dritue seiter: oh, that was your bread. Ja, genau. U de heter natürlech druf bestande, das mrs izze nämä. Mit sine Schnäbitatze dranne. Merci schön. Üs het dünkt, s'het chli gfischelet. Hahaha

In Kuala Lumpur simer o no xi. Über KL gits eifach nid viu z'sägä. Dasch überbewärtet ded. Was kuul isch, isch das Hindus, Muslims u wases süsch no so umehet hiä, mitnang us-chöme:

Ide Batu-Caves simer no xi u ded hets natürlech wi immer Schwalbe, Tuube u no süsch Vögeli. Wi me ja weiss düe diä gärn öpper aschisse. U izze lacheter scho aui, aber nei! Mi het üs nid agschisse. Drfür di useputzti, dicki Touristin. Aber di hets nid Mau gmerkt u isch wiiter stolziert mitem vergaggte Rügge. Muahaha.

Was o guet isch xi, isch ds Rudel Affe wo ded wohnt. Clever wi si si, wird de alles gstohle :-) zum Bispiu höckle si friedlech ufemne Pflock bis eh junge Bueb mitem Wasserfläschli näb ne steit. Dä wird de agfuuchet u wener vor Chlupf sis Trinke laht la gheie, isch das gad wäg. Uftue chöi sis natürlech o. Entweder dräie si dr Verschluss uf, oder es wurd ufbisse. Was o uffallt isch: Süessgetränk si beliäbter. ZWasser wird eifach usgläärt :-)

So, mit meh chöimer gad nid diänä.

Mou, iz hocke mer da gad bim Biär hei no gad öppis. Wüsster weme scho lang in Asiä isch? Weme froh isch umd Ameise am zNacht wius weder Kakis no Bedbugs si:

U weme weiss was passiert weme sis Ässä bstöut u ersch bir Akunft seit: i don't eat Shrimps :-) de geits zrügg id Chuchi, aui Shrimps (äuä eh nume 2i xi) wärde usegfischt u retour chunts. Weme de allergisch isch wi üsi Tischnachbarin, änderet de dr Teint is rot :-)

Häbäts guet!

Ansch u Ürsu

Helo (uf Malay mit eim L)

Ahoi us Melaka

Richtig, mir si izze in Malaysia :-) hei natürlech o scho Sache vo hiä z'brichte. Aber bevor dr chöit über üs lache, heimer öich o no eis zum beize...

Für aui Bärner wo gärn würde eh Aare-Schwumm ga mache si mir in Taiwan no in Wulai xi. Eh herrleche Bärgfluss/bach fliesst ded düre:

U ded hei mir badet, piggnigget (mit Dumplings u Soba usem 7/11) und äh Aareschwumm gmacht:

När simer no ufne Hügu u zumne guldige Wasserfau wo zwar eher bruun/gäub isch xi as bruun (aber mer weis la gäute):

När simer uf Malaysia gfloge u si gägä spät Abe glandet u hei is zu üsem Guesthouse ufgmacht. Wohlwissend das mer spät si u das Reservierige gärn verlore gö, heimer üs telefonisch vo Taiwan akündet. Mir chämi spät. Es sigi notiert. Dir ahnet was chunt. 2215 ir Nacht simer mit Sack u Pack acho u de hets gheisse: very sorry, your already paid room is occupied. Wine Wurm heter sech gschlänglet, ds Anüsli ar Reception. It's not my fault. It's the manager (wo me sit gester entlah heigi - genau). But! U izze chunts: I have a friend with a hostel... Kenne mer, oder? Das löh mir latürnech nüm la gäute. Wiu me weiss: my friend the bedbug.

Aus chrüüche u winde het ihm nüd gnützt. DAnsch het ne wine Kranich ufgspiässt, la zabble, gnadelos aues Gäud zrügg verlangt u ne sogar no für change usegjagt. Woner de zrügg isch cho u sech dStägä ufgschlänglet het, heimer scho paar Alternative gsuecht gha u woner de gmeint het mir zottle izze mit üsem Batze ab, het dAnschle zTelefon verlangt. Das heter zwar nid wöuä gäh, aber er het de gmerkt dases äuä dr schmärzfreisti Wäg isch üsne Chlaue z'entcho. Glücklecherwiis heimer de eh gueti Ungerkunft nume öppe 500m entfärnt gfunge. Gut! Faus dr aso Mau zMarquee Guesthouzz in Kuala Lumpur söttet in Betracht ziäh, löht öich lo sägä: ded wohne nume Anüsser u Würmli.

Eh Läckerei bim Inder u es Biär ufere Rooftop-Bar heimer de o no verwütscht u so üse Abe grettet u i Anschs Geburi chönne inefiire.

Ansch's Geburi heimer de mit viu Biär u Indischem Ässä in Melaka fertig-gfiiret. Eh Schoggichueche heimer o no gfunde u am Ürsu isch de no eh wiiteri Anekdote us sire Adoleszänz i Sinn cho. Nachdäm lets Mau uf dÖutere isch dröscht worde, muess är izze o uf sis Houpt chli Äsche schüttle...

Vor öppe 15 Jahr het dFamiliä Känu eh Usflug uf London unterno u wime weiss hets ded ja viu Inder, Pakistani, Iraner etc. Me het de as zNacht so eine usgläsä u ds junge Mandli het partout nid ded wöuä ässä u gstämpfelet biser i KFC het döfe. Glücklech über sis frittierte Hüehnli wo äuä dr Afang zu sine Handles gleit het, heter de zuegluegt wi dr Räste vor Familiä Naanbrot u süstigi Läckereie verdröscht het. Was däm no biizfüege isch: Mama u Papa Känu si ja bekannti Choblouch-Hasser, was se as indisch-Liäbhaber usschliesst. Bruder Känu cha indisch o nid xeh u somit isch hüt dr dick Hüehnlifrässer dr einzig wo das Ässä würk z'schetze weiss. Het Mau eine gsunge: the times they are a changing...

Melaka isch übrigens sehr schön u gfaut üs. Heiss isch immer no, aber me cha izze aube wieder nöime i Schatte höckle u es tüürs Biärli näh:

De fahre när immer so geili Rikshas näbä düre wo mehrheitlech Pink si mit Bärli, Hello Kity u Schmätterlinge verziert. Us de Luutsprächer schmätteret de meistens dr 50 Cent si Gangstersound ire Rieselutsterchi. S'passt wine Fuust ufs Oug:

Gut. Dem ist nichts anzufügen. Adieu!

Ansch u Ürsu