Our new Friends: Görtröd the Bug, Sayuki the Sobaqueen and Yoshi the Tourism-Student

Yeah,

Zersch Mau di schlächte News :-( mir hei gester Görtröd the last of the Bedbugs atroffe. Uf Ansch's Chüssi. Nicu het aber izze usegfunge das si di letsti vo ihrere Art isch xi u dAnsch se verschwartet het. Us Sicherheitsgründ heimer aber glich no Allestöter-Spray und Dopplets-Chläbi kouft. Was mer mit däm astöuä verrate mer nech z'ungerst :-)

Aber keh Angst, Simä. Mir düene vor dr Abreis mit sim Hab u Guet in Tumbler ;-)

Süsch heimer nume lustigi Sache z'brichte. 

A) heimer keh Stiche, trotz Agriff

B) simer in Tokyo imne Rooftop-Biergarte xi u hei üs ded eh Bierle gönnt. U so het das usxeh:

C) isch dAnschle när am Tag druf sogar mit üs Karnivore a Fischmärit cho :-) ded heimer vorem Igang xeh das me kener Sandale daf alegge. Guet xi das Nicu u Ürsu diä suber montiert hei u no gfunge hei das sigi eh tolli Idee... Ds Polizeimandli het de triumphierend grinst u di beide scho wöuä abwimmle. Aber mitemne chliine Move dür dGmüesabteilig heimer diä suuber übertöuplet :-) u gfunge heimer natürlech einiges sehr interessants u wüests natürlech o:

U natürlech no Delikatesse wi Thunfischouge:

U truurigi Sache wi Walfischfleisch :-(

D) heimer eh Kollegin vom Ürsu woner in Hawaii het lehre kenne troffe. Sayuki the Sobaqueen :-) si het üs chli dür dStadt gfüehrt u üs de nach laaaange Diskussione i eis vo ihrne Liäblingsrestaurant gfüehrt. Frage wi: 'where should we go', si konsequänt mit: 'what would you like to see' beantwortet worde. Drum isch scho das as Leistig z'verbuecge. Dasch de leider zue xi u di Ermsti ganz dürenang. mir heire de dEntscheidig abgno u üs für Ramen (Noodlesoup) entschiede. Mit Müeh u Not het si nis de nöime inebracht u wo dAnsch dinne ds Wort Soba bruucht het, isch si gad ufgsprunge u het üs ines Soba-Restaurant wöuä bringe. So si si, dJapaner ;-) mir hei aber Fröid gha u si gloub o:

E) Heimer bim Absacker-Biär a däm Abe no Yoshi dr Tourismusstudänt troffe. I bländendem Änglisch het är üs vo Karaoke-Bars in Belgiä verzöut u üs wöuä mit sim Xang für nes Ständli ermuetige. Da är das so fabuhaft het gmacht, hei mir de Riisus gno brvor är eine vo üs as kommende Sooran-Superstar het chönne vorstöuä :-)

Izze simer no in Kawaguchiko u hei no es E) azhänkä:

Vorhär müesse mer aber no sägä, dases gester nume einisch grägnät het. U das in Ströme. Da hets gad guet passt, das mer eh ine Sake-Brewery hei wöuä:

Ds aschliessende Apero heimer de i üsem Zimmerli ignoh :-)

Hüt Morge heimer de es läckers japanischs zMorge mit Miso-Soup, Fisch, igleite Gmüesli u vielem meh bercho:

Und Achtung:

E) heimer dr Mount Fuji de Japaner ihre heilige Bärg xeh u das no ohni Wolke.

Bim aschliessende Waggu ide Bärge um dStadt heimer de gägä Ändi eh falschi Abzweigig gno. Da aus nume uf japanisch isch agschribä xi, sig üs das verziehe. Emne Franzose-Päärli ischs glich ergange u mir hei ds Glück gha das üs eh nätte Japaner ane 'Busstation' gfahre het. Leider si ded kener Busse gfahre u mir hei de de Franzose vorgschlage z'füüft es Taxi z'teile. Di hei aber nid wöuä u so het Nicu si Charme lah spiele u es wiiters japanischs Privattaxi (eh Audi S6) uftribe. Papa Nippon het üs nid wöuä mitnäh aber sini Chatz het druf bestande :-) dFranzose hei stiif u fest nid wöuä mitcho wiu si angerne Japaner gloubt hei dases nume 90min bis id Stadt geit. Mir si natürlech igstige u de bi Tempo 60 eh Bärgstrass z'dürab. Vor jedere Kurve isch uf sozsägä 0 abebrämst u igschlage worde. Zum Glück isch dFahrt nid lenger gange as 15min. Süsch hätte mer eh Reinigung müesse zahle :-) zWätter isch de o wieder schlechter worde u dFranzose si äuä no chlo nass worde :-)

Dir xeht, ohni Bedbugs hättä mir de Time of our lives :-) aber hüt mache mer o dene dr Gar us. Mir hei üsi Bett mit Tape befestiget. Klebseite gen oben, das si bim Agriff bliibe hange. Ha! Take this mahsafaggas!!!

Big in Jäpän

... Wüsse sit hüt das dä Song vom Tom Waits chunt u nid vo de Guano Apes (aso ämu dr Ürsu - dAnsch isch ir Musig-Gschicht sowiit, das si gwüsst het, das diä nid zu so musische Ergüss fähig si). Merci Petra. 

Was Ürsu aber glehrt het uf dere Reis, isch das Guano dScheisse vo de Flädermüüs u Schwaubeli i de Höhline isch. Somit heisse dGuano Apes übersetzt Flädermuus-Scheiss-Affe. Nice. U Guano gilt übrigens in Asiä as Delikatesse (okay, vilech sis o nume dNästli vo de Schwaubeli wo si ässä - aber di si us Schwalbe-Spöifer u dasch o wüest) Also nice :-)

So, gnue vo Geschichten aus dem Lokus. Mir si ide japanische Alpe xi u Lüüt, mir hei gmeint mir sige deheime. Sogar Schnee heimer xeh:

Wemer nid es japanisch Piggnigg hättä gha, wäre mer fasch ids Poschi für hei igstiige:

In Takayama heimer üsi Homebase (ja, Gurtefans... Vor Petra heimer o no vernoh das üsi Homebase verschobe wird, wiu si ded irgend eh Gagg härästöuä... Tssssss) ufgschlage u das xeht so us, das Takayama:

Ah, heimer no vergässä: im Nationalpark (obe) heimer no dSchnee-Affli xeh. Luget Mau was diä für nes schön flauschigs Fääli hei. Mir nämte aso so eis für im Winter:

Di bade im Fau nid nume i de heisse Quelle, sondern o im iischalte Schmelzwasser. Mir hei nach üsem Waggu üsi arme Flosse müesse chüele u heis gschafft se öppe 3sec im Wasser z'ha. När si si scho fasch abgstorbe xi (gemäss Ansch si ihri Zäie scho fasch schwarz xi). Ds Affli isch aber paar Meter wiiter fröhlech eh Ewigkeit i däm Wasser ghockt. So viu zum Thema Spitze der Evolution... 

När simer no in Shinakawa Go xi: es Oldschool-Japan Dörfli. So hei si früecher in Japan dHüüsli bouet.

Mir heinis gfragt öb nid es paar vo öich mit üs wette ir Schwiiz Land choufe u när vo dene Hüüsli härästöuä ;-) mir chönte de o no paar Riisfäuder alegge u eh Sakebrauerei uftue ;-)

So, dir xeht, üsi Begeisterig isch ging no unbroche. Nämät aui Japan uf öii Reise ToDo's uf, ungerstriichets u setzets wiiter ufe as drs heit gha. S'isch besser u weniger tüür as dr meinet. U wi dr Nicu zeigt nume eh 12h Diräktflug mit üsere National-Airline wäg. De düeder öich u em Vaterland eh Gfalle. Hahaha.

Glii simer z'dritt. Rase izze uf Tokyo für El Gordo, Klösschen, The Sake-Barrel oder eifach dr Nicu ga abzhole. Juhu!

Machets guet u bis zum nächste Mau. Denn de mitem Titel: bigger in Japan :-)

Ansch u Ürsu

Hiroshima

Hellöu

Mir sitze wieder Mau im Zug. Das Mau vo Hiroshima uf Takayama. In Hiroshima simer drei Nächt xi u hei gad festgstöut das mer gar nid so viu Fotis füre Blogg gmacht hei :-(

Hiroshima isch äuä de meiste vo öich eh Begriff. Hiä isch di ersti Atombombe abegschosse worde u entsprächend dräiht sech ded o eh ganzi Insle um dä Ort. Mir hei natürlech zMuseum u dr Friedenspark o bsuecht u so xeht das us, resp. hets usxeh:

Das isch, was nach em Bombeischlag no isch Übrig bliibe. DStadt isch mittlerwiile uf 1.4mio Iwohner gwachse und isch sehr schön mit viu Grüen u Böim. Was sehr kuul isch, isch das si so wi imne Flussdelta bouet isch und dFlussarme chöme wi Finger dür dStadt. U ded wo dBombe troffe het isch äbä o sone 'Insle' u dasch izze dä Friedenspark. Eis vo de wenige Hüüser wo no isch gstange isch das vom Foto obe. Das hei si lah stah as Mahnmal:

In Hiroshima chame im Übrige super läcker ässä. Hiä zwöi Bispiu:

Das isch eh Okonomiyaki. Eh japanische Pancake. Dä geit so: z'ersch chunt Omelettemasse uf ne heissi Platte u obe druf eh huere Ladig Chohl u Mungosprosse. När gits eh Lag Späck drüber u wird dräiht u brate. När wärde dNuudle abrätlet u es Ei ufgschlage u verhöilet. Dr Chohl u Pancake wärde uf dNuudle glüpft u diä ufs Ei. När wird aus dräiht, mit läckere Sauce beschmiärt, Früehligszibeli drüber gschosse u eim uf dr heisse Platte zuegschobe. Ässä dued me mitemne Spachtel u weme nid geduldig isch, verbrönnt me sech geng zMuul. Me cha o eh Täuer verlange das me schneuer cha idrösche, aber dJapaner sägä zu däm, me het es Chatzezüngli weme das macht.

Wiiter heimer Tzukumen gha. Das si chalti Nuudle mit dämpftem Chohl, Gurke u Früehligszibeli. Derzue gits es Riis- u Algedrüeggli, frittierts Hüehnli, es Ei u eh Art es Siedfleisch. Das aus chame när i di roti, scharfi Sauce dünkle. Sehr läcker.

DJapaner hei übrigens Vegi verstande u mache brav alles ohni Fleisch u Fisch. Da dAnsch akzeptiert het das me in Asiä mängisch Fleisch- oder Fischbouillon berchunt het si bis izze jede Tag mehreri Läckereie bercho :-)

Mir hei natürlech nid nume gässä sondern si o no go öppis aluege:

Ds floating Gate isch eini vo de meistfotografierte Sehenswürdigkeite in Japan. Bi Ebbe chame unge düreloufe (bringt Glück) u bi Fluet xehts schön us ;-) mir hei beides xeh u natürlech o dHorde vo de Spändewüetige Japaner. Di drücke 1¥ Münze is Holz u dAlge vom Tor u när hets öppe vier Agstöuti wo aus Gäud wieder use-poople das ds Holz nid ds fest liidet :-)

Marotte hei si übrigens o u zwar isch eini derfo, das si unger kene Umständ näb üs wei sitze (obwou mir doch früsch duscht u agleit si u stuberein o). Wenns aso näb üs ei freie Platz het u ei Mönsch chunt, de wartet dä bis mir si gange. Di nächste zwe wo inechöme, sitze aber de näbä dä härä a üsi Ex-Plätz. Mir müesse de Mau no usefinge was das uf sech het, wiu süsch si si immer nätt u gsprächig. Lustigs Vöukli.

Was mer natürlech o no nöi hei, si üsi geile Stäbliboxe mit Stäbli, das mer nid so viu Böim abholze :-) di heimer is im 100¥ (1Fr) Shop gschnappt. Am Nicu, wo am Donstig chunt, heimer natürlech o scho eis kouft.

Liäbi Grüess

Ansch u Ürsu

Kon ni chi wa

Aso dasch natürlech di phonetischi Schrift, aus angere isch z'viu verlangt :-)

Mir sitze gad imne Donald-Duck Zug mit Rackete-Atrieb im Füdli:

Dasch eh Hikari-Shinkansen und me cha sägä, hiä in Japan chöi sech aui wo meine dSchwiizer sige Zug-Experte Mau cho abluege wi das geit. Di Dinger rase scho i de Stedt schneuer as ir Schwiiz uf grade Streckine. U si chöme 0917 ah u fahre 0919 wiiter. U jede isch dinne u cha höckle. Zuegegäbenermasse isch natürlech zZugfahre o chli tüürer. Aber es rockt u huere!!!

Mir si afe in Nagoya xi u fahre izze abe uf Hiroshima. Es fägt u huere u dank dr liäbä Aya u em Karli (arigato osaimas - oder so - heisst gloub merci viu Mau), cha sech dAnsch o isi verchöschtige: 

私はベジタリアンです。お魚、お肉が食べられません。宜しくお願い致します。

Das heisst: i bi Vegi u cha ke Fleisch i Fisch ässä, merci zum Voruus. U es hiuft gad bi so Sache:

Dasch eh Outomat wome muess druf drücke, när gits es Zetteli, das git me ab u de chunt ds Fressi-Fressi:

Dasch natürlech am Ürsu sis :-) u mir hei natürlech Hiuf gha vomne nättä Japaner (sehr fründlechi Lüüt) wo Ansch's Zetteli gno het u no dr Vegi-Teil vermerkt het.

Gester simer no imme Schloss xi:

U vor dranne hei si dEmpfangshalle für Bsuecher ganz us Holz wieder ufbout. Ded chame ine u s'xeht so us:

Aus vou schöne Gemälde u no ganz viu geile Japan-Zeiche:

Ja. So geit das hiä. När simer no are Gspänster-Usstellig xi:

U es Biärli heimer natürlech o scho trunke:

So, meh wüsse mer o gad nümme, das si afe üsi erste Idrück. Izze gömer äbä zersch uf Hiroshima u när i di japanische Alpe. När gömer de mit Fasch-Überschall dr Nicu in Tokyo go hole.

So, iz heimer i knapp 40min dSchwiiz dürquert ;-)

Sayonara

Ubud u Adieu

So,

Ds vorläufige Ändi vo üsere Südostasiä-Reis isch cho. Mir sitze gad in Ubud imne Kafi u plane üsi Japan-Reis :-) hei aber hiä no paar letsti Idrück für öich:

Balinese düe wi Wildi Opfergabe überau härä stöuä... Uf dTöffli, vor dGschäft u Wohnige, sogar uf Chuchimässer etc. Bringt äuä Glück. Fröie düe sech da natürlech o dMüüs, dKakerlake u aui angere Viecher:

Im Monkey-Forrest simer no xi u ded heimer es Bispiu vomne clevere Aff xeh. Während sech aui angere bi de Wärter um dKrümmel zangget hei, isch ds Mandli ganz gmüetlech näbä Chefig mit de Banane ghocket u het diä i aller Seelerueh härägfischet u när eh ganze Bund vertilgt :-)

Gester heimer no eh Chochkurs gmacht u hoffe, das mer de das no chöi deheime. De lade mer nech de Mau zumne Balinese Dinner ih. As Mitbringsu akzeptiere mer de eifach nume Bintang-Biär. Hihi

Müehsam si hiä einisch me di huere Transport-Buebe. A jedem Egge schreit di eine ah, öb izze wöugsch Taxi fahre... Das geit so wiit, dasis gester eine isch entgägä cho, vertöift i sis Natel häckend. Ds Mandli isch fasch i Ürsu ine u het im letste Momänt no ufgluegt u eh Schritt uf dSiite gmacht. Näb dr Ansch ischer de scho wieder i si Chnoche vertöift xi. När isch üsi wiissi Huut äuä doch no am Änd vo sine Närväbahne acho und er het es 'Taxi?' fürebrümelet... Das geit bi dene äuä so wiit, das si ir Nacht erwache u es 'Taxi?' vo sech gäbä. När git ne äuä dMüette ame eis u si schlafe wiiter. Oder vilech git si o as Antwort es 'Massage?' Vo sech...

Guet, das wärs... Next time more from Japan.

Die Faust Poseidons

Ahoi (das Mau würklech)

Nachdäm mer dr Schwäbu verabschiedet hei, simer zwe Täg uf Nusa Lembongan. Chli ga Strandferie mache...

Mitem Schwäbu simer no im Hardrockcafé xi ga ne Burger ifahre. Oder so heimer gmeint. Wo dAnsch ihre Vegi-Burger bstöut het, isch z'obligate "so sorry, no have" cho. Voller Wuet het de dAnsch ihri dräckige, sandige Füess i ihrem Brünneli wöuä wäschä. S'het aber z'viu Lüüt gha. Drum het de das dr Ürsu überno :-)

Uf dr Überfahrt nach Nusa Lembongan isch's üs de chli schlächt worde. Aber nachemne Bad i üsem Pool isch aus wieder guet xi:

Ga touche simer u ded heimer eh Huufe Fishy-Fishy xeh. N. L. Isch bekannt für ihri Algefarmer u di heimer de o no xeh:

Izze sitze mer aber wieder uf festem Grund u erwarte üse Bus nach Ubud :-)

Früecher, wo dr Ürsu z'erst Mau mitem Nicu u Äschli in Thailand isch xi, het me no glitte uf de Schifffahrte (gäu, Nicu?). Hützutags wirft sich der clevere Reisende es Stugerönli ih u geit de halt nach dr Fahrt es Stündli ga nückle. Gesagt, getan u tatsächlech hets de doch relativ gueti Wälle gha :-)

Abfahrt u Überfahrt si problemlos vonstatten gange. Aber bir Akunft hei sech de Mannschaft u Bsatzig einigi übli Schnitzer gleistet :-) Käpt'n Pole wär begeisteret xi. Bim Afahr-Manöver het el Capitan z'Schiff genau parallel zur Wäuä gstöut. Z'Resultat isch jedem klar, me wird nass. Was natürlech i dene Breitegrade nid wiiter schlimm isch. Drum sött me das halt erduure und ganz sicher, i dere Bootsstellig, nid ufstah. Säubstverständlech het das öpper no nid begriffe u steit im Momänt uf, wo ds Bootli zrüggschouklet u vomne chline Brächer troffe wird :-) s'het usxeh wi wenn si von der Faust Poseidons troffe wär worde. Klitschnass het si sech de ufgrapplet u isch a ihres Plätzli zrügg.

Bim Alegemanöver de dr nächst Faux-Pas. Statt ds Seili einisch um dWinde um z'mache, das mes de o chönti la gah, het ds Mandli gmeint es düeg de ds Schiff häbä. Me ahnt was chunt... Eh nächsti Wälle u ds Seili het sech eh Wäg dür sini blutte Händ bahnet. Biser het lah gah u ganz entsetzt sini Taupli bestuunet het :-)

Dir xeht, s'isch nach wie vor öppis los.

Liäbi Grüess

Ansch u Ürsu

Quo vadis...

Guete Morge

Mir ligge gad in Kuta i üsem sehr schöne Hotelzimmer. Läck het sech das veränderet sit mer vor zäh Jahr z'letst Mau si da xi. Krass!!!

Hüt isch am Schwäbu si letst Tag u mir hoffe, das mer no öppis guets z'mache finge.

Mir si über Permuteran dNordküste z'düruf uf Munduk. Ded heimer aso es super Hotel gha. 

Dasch d'Ussicht us üsne Zimmer mit Riesefänster. Vo ded simer id Riisterasse ga loufe.

U hei am nächste Tag es Töffli gmiätet für so drei Kratersee u Tämple ga z'luege. Dasch aso o sehr schön xi:

Z'vermeintliche Highlight isch aber üses zNacht xi: Duck Bezuzu (oder Betutu je nachdäm wän me fragt). Nachdäm mer diä in Permuteran nid hei chönne ässä (hei se z'spät bstöut - one day in advance, sir), heimer de hiä no einisch nachegfragt. Das gäbis nid, het dr Herr la verluute. Er wüssi keis Restaurant. Aber sini Schwägerin, di chöni das. Mir voller Fröid igstiige u tatsächlech: es riese Menü isch da uftischt worde mit luuter Läckereie: Gmües mit Kokosrasple, säubergmachti Tomatesauce, Tofu, Tempe und und und...

Ir Mitti de, ds Highlight, üsi Änte. Oder besser xeit: ds Biibiili. Mit knapp 20cm Längi (inkl. Chopf mit Schnabu - sehr zur Fröid vo Ansch u Schwäbu) u emne Läbiggwicht vo äuä knapp 1kg, isch das aso es magers Tiärli xi... Dr Ürsu isch flott zur Sezierig gschritte u het mit Gable u LÖFFU dere Änte dr Chopf abtrennt. Di zwe Häuftine hei de näbst viu Huut u Chnöche o no knapp 50gr Fleisch härgäh... Schön.

Drfür heimer vo üsne Nachbere u fasch Bali-Citizens eh super Pizza-Tipp übercho in Kuta:

Das wiederum isch eh sehr eh grossi Läckerei xi. Merci öich!

Mir hei o no es Update was üsi Reis ageit: nach Japan flüüge mer uf Taiwan u vo ded zrügg uf Kuala Lumpur. Somit wärde mer sicher bis Mitti Septämber hiä in Asiä umeturne. Was mer när mache, wüsse mer no nid.

Am Schwäbu wünsche mer eh guete Heiflug. Merci bisch verbii cho. Gut wars!!!

Startet guet id Wuche u häbets guet

Ansch, Schwäbu, Ürsu