Bäregrabe, Tourismus-pur u gstrandeti Seelene

Ahoi Everyone

Mir sitze da gad muetterseele-eleini amne Wasserfall u es isch herrlech. Ds Wasser isch chüel u s'het Steine im Schatte zum drufhöckle. Nume dZikade mache eh u huere Krach. Mir si uf Sibuyan-Island womer eigetlech 2 Nächt hei wöuä bliibe. Aber aus dr Reihe nah.

Zersch simer in Boracay xi. Äuä eine vo de touristische Orte uf de Philippine u das wo äuä dLüüt mit dene Insle assoziere:

Isch so, gäuet? Hiä heimer westleche Komfort gnosse u üs am zwöite Abe eh Pizza (für 4-6 Persone) gschnappet u si diä verbotenerwiis am Strand ga schnabuliere:

U latürnech no fetti Pancakes u Dessertli:

Vo ded heimer üs uf dOdysee dür di nördleche Visayas gmacht. U eh Odysee isches... Mitemne Pumpboat (di heisse so, wiu me ds Wasser muess usepumpe) simer uf Tablas Islands u das chunt de so scheisse ah, das me nüm wiiter chunt (usser mi nimmt es gfährlechs Töffli oder es tüürs Privatboot). Beides heimer nid gmacht. Fürs einte z'ängstlech, fürs angere z'giizig. Entsprächend heimer de es Zimmer ohni Aircon bi gfühlte 40 Grad verwütscht, es zNacht us Riis u Mangoketchup (Ansch) u Riis u Schwiinschwarte (Ürsu), und eh Early Rise am 5i kassiert. Well done, idiots.

Nachere 4-stündige Fährifahrt simer aber uf Sibuyan acho:

Luget Mau di härzige Bueblis:

Di chöme bir Fähriakunft u gumpe is Wasser. När wärdä vor Fähri obe Münze abegschosse u si touche drnah... Wi mit de Rüebli im Bärägrabe. U natürlech schiesst me dMünze wiit use, das si sech möglechst müesse asträngä... Momou.

Uf Sibuyan acho heimer is de gmüetlechi zwe Täg vorgstöut. Us däm isch aber nüd worde... DFähri womer hei wöuä näh, fahrt leider nüm. Drum müesse mer morn ernöit ufs Pumpboat u 4h übers Meer schippere:

Ah, es Mango-Festival heimer natürlech o no bsuecht sitem letste Mal:

Et voila... Das wärs gloub vo üs. Öich eh schöne Tag u vergässät nid:

It's more fun in the Philippines

Mir sitze da gad im Bus vo Dumaguette uf Bacolod. Keh Angst, dir outet nech nid as Geografie-Banause, we dr ni wüsst wo das isch :-)

Geit 6-8h für 240km, obwou dr Fahrer sis Gfährt verrosset (wes Mau fahrt, wases nid hüüfig macht). Sogar eh Priester isch churz igstige u het si Sägä gsproche :-)

Natürlech heter de o no chli Batzeli wöuä u Umschleg für di Spändewillige verteilt. DMüette näb üs het de plötzlech Zetter-Mordio afah schreie u wild gestikulierend am Priester dr Gar us gmacht (oder so hets dr Ürsu mit sire blühende Fantasie ämu interpretiert).

Gester simer eh Insurundfahrt ga mache. Uf Siquijor. DHäxä-Insu wos no Woodoo gäbi u Bleichgsichter no i grosse Chochtöpf zuebereitet wärdä (da mir fasch schwarz si, het üs aber niämer wöuä ässä). Ded isches aso schön xi:

U ded hets di besti Coconut ever gäh. Inkl. mit dr Machete gfertigte Löffu. We das nid Wäutklass isch, de wüsse mir o nüm!

Wichtig im Bus isch natürlech o dr Conductor (di heisse würk so - äuä no vo de Conquistadores). U das dä öppis z'düe het. Drum hei si o es System igfüehrt wo är chli cha mitem Locher spiele. 

U wiu dr Bus so vou isch, muess är när über dSitze chlättere u das wird wi folgt kommentiert: only in the Philippines... The conductor is a spider.

Drfür heimer de i Mac müesse ichehre u o hüt heimer mit dr Uswahl vo üsere Destination (Ilo Ilo) weni Glück gha. Drum heimer is de im Chino u bi Happy Hour Biär für 50 Rappe vergnüegt. ZNacht heimer de eh guete Italiäner verwütscht u drum isch das glich no eh einigermasse erfougriiche Tag worde.

Cheers

Ansch u Ürsu

Weiterse würk xeh?

Bonjour

Mir hei scho vo paarne Lüüt ghört das üsi Föteli nid usxeh wi me sech dPhilippine vorstöut... Drum chöiter nech izze säuber überzüüge. Mir si zwar nid sicher öb dr würk weit... S'isch nämlech schön hiä :-) sehr sogar!

Dasch dUssicht vo üsem Bungalow. Mir mache hiä 5 Nächt Halt. Mir hei Ostere wöuä überbrügge... S'göngi nüd hiä... Nüd my ass... Aus louft wi ging... Egal... Si hüt xi ga touche u schnorchle u hei gaaaaaanz viu Schiudchrotte xeh. Very nice.

Gester simer imne Nationalpark xi. U das het so usxeh:

Morn mache mer eh Tagesusflug uf ne angeri Insle u de geit de ds stressige Reiseläbä wieder wiiter. Mir wüsse no ni gnau wo düre, aber so wis usxeht stöh am Dsistig 240km ah. 6-8h göngi das. DBegeisterig haltet sech i Gränzä.

Es Strandbiudli heimer nech o no:

U süsch heimer nid viu z'brichte. Drum löh mer nech Mau dFöteli la gniesse :-)

Happy Easter

Ansch u Ürsu

Philippines

Guete Morge

Mir hei izze gad di dritti Übernachtig i de Philippine hinger üs u es gfaut is bis izze sehr :-)

Mir si in Tagbilaran uf dr Insu Bohol. DStadt isch nüd schöns u o nüd härzigs. Drfür biätet dInsu beides. Wunderschön grüen (und Achtung: SUBER) isches hiä. Gester simer mitem Töffli zu de Chocolate Hills. Di heisse so, wiu si ir Trocheziit bruun wärdä. Das chöi mir nid beurteile, gester si si brun-grüen xi. S'het grägnet :-)

Vo dene Hügle simer de zum Tarsier-Sanctuary. Charte konsultiert, diräktist Wäg gno u när ufem halbem Wäg döfe ds Töffli putze...

DStrasse si mehrheitlech eher Strässli, nid (resp. nüm) betoniert u nach Rägä vou Schlamm. Eh Schlappe Schlamm heimer natürlech o kassiert. Üse Nike-Verträter (D. D. us Z.) het gad Alptröim: 

Drfür heimer när no dr Tarsier xeh u sogar chönne es Foti mache mitem iPhone. Jawoll!

Wiiters heimer no gad nid ds brichte. Drum no paar Sache süsch :-)

DFilipinos si i Sache Ässä chli eiget für Asiate. Fast Food u Fried Shit isch hiä axeit. Gmües gits weni u wenn, de si tröchneti Shrimps drüber (was dr Ürsu gester bercho het und mit Empöre nachem erste Biss vo sech gschobe het). Entsprächend hets viu Dicki Lüüt (was in Asie doch eher dUsnahm isch). Vilech ligts o a däm:

4 Burger, 4 Fries u 4 Coci gits hiä für 12.- (Priis vo 1x, 1x u 1x ir Schwiiz). 

Was si o nid hei si OB's... Nachdäm mer 6 Läde u Pharmacies abklapperet hei u nume Binde i manigfacher Usfüehrig (o Wunder bruuchts so viu) hei gfunge, isch dAnsch de im Internet uf dSuechi. Ded hets de sogar es Forum gha wo üs i richtig Lade gleitet het... Momou, dasch wiit entwicklet hiä :-)

Süsch heimer no nid viu Nöis u s'wird äuä di Wuche o nid viu Spektakulärs passiere. Ostere isch ja de, u mir ziäh üs ines Touchresort zrügg. DLäde si läär, dSchlange vor de ATMs läng. Me cha sägä, s'wird nid viu gah, hiä :-)

Öich wünsche mer viu Osterhase, guets Eiertütsche u viu Spass bim uspfuuse u em verlengerete Wucheänd.

Ansch u Ürsu

Halong Bay, Sapa u Asian Friendliness

Guete Morge

Mir si i üsere letste Destination in Vietnam acho. In Sapa. Wunderschön isches hiä u mi cha go loufe... Guet für üsi Luune, wiu mir heis langsam chli xeh hiä. Si froh, chöimer iz de uf dPhilippine.

Schön ischs, gäuet? 

Nachdäm mer mit Müeh u Not us üsem Hotelier usegchutzelet hei, das me o uf eigeti Fuust los cha, heimer is de id Riisterasse vo Sapa ufgmacht u das as wunderschön empfunde. 

Vorhär simer no ir Halong Bay xi u o das es Highlight. Derfür möchte mer üsne liäbä Fründe Petra, Rebi, Simä, Cyru, Lüku u Nicu danke. Di hei dHalong Bay träffend beschribe u s'üs drum ermöglechet das sehr z'gniesse. Mir zahle öich de eh Rundi Biär deheime. Mir hei üsi Erwartige so töif abegschruubt, das mr de überau überrascht si worde. U für aui zuekünftige Vietnam-Bsuecher, hiä üsi Empfählig:

1) Göht 2N/3T

2) Nämät es tüürers Schiff (um di 200$/P)

3) Sparet zGäud wo dr fürs Schiff usgäbät indäm dr a) eh Fläschä Schnaps u b) mind. 6.5l Wasser mitschleipfet

4) Fröiet nech uf dHöhli u ufe Strand am erste Tag - s'isch ein Volksfest...

5) gniessets z'Kayake am 2te Tag

So isch das u so xehts us:

U iz no paar Anekdote: 

Dr Asiat, stets fründlech, het eh tolli Eigeschaft uffallendi Lüüt ir Gruppe no meh usezhebe. Dicki Lüüt si Happy Buddhas. Wes de ums zMorge geit, seit me: Breakfast, 7:00. early, because my happy buddhas are always hungry. Ungerstriiche wird das mitemne liebevolle Arm-um-dSchultere-vor-dickste-Person legge.

Wiiter wärdä gliichgschlächtlechi Partner wi folgt vorgstöut: this is John, he travels with his good friend Johann, who's not here yet. Klar männlechi Nämä, chönte ja aber o Fründe si. We de aber dr Johann inechunt, wirder überdüütlech as: ah, and here is Johann, the lady killer vorgstöut. Het sech sicher gfröit.

Weme bim zMorge zwüsche Beef u Vegetarian Fried Rice cha wähle, wird de bi Vegetarian iifrig gnickt. I ha verstande. Uftiischt wird natürlech glich Beef. Das wird de bemänglet mit: i eat no meat. Aaaah, okay - sorry, sorry. Me secklet use u chunt zrügg voller Stolz zMenetekel besiitiget z'ha. Triumphierend wird de dr Täuer präsentiert: ohni Ei, drfür mit Beef...

U wes imRestaurant öppis nid het u me das ustuuscht mit öppis angerem, de zahlt me när für 'special request'. Jawohl, so geit das hiä :-)

Pizzas, im Übrige, si o nach drü Mönet wäg vor Heimat no nid guet :-)

Adieu

Ansch u Ürsu

Schnäbichratzende Zoolog

San's griesst

Mir si in Hanoi oder besser xeit, wieder in Hanoi. Vorgester heimer dSteffi u dr Steffu wo im BFE schaffe (Ürsu's Ex-Arbeitgäber) troffe u si mit ne ga es Bia Hoi ha und ga zNachte. Het gfägt wieder öpper z'träffä u mir fröie üs über Bsuech. Aso schriibet üs we dr weit cho :-) mir vermisse dHeimat gad chli!

När simer gester u hüt im Cuc Phuong Nationalpark xi. S'wimmli vo Tiär, steit im Reisefüehrer... Vo wägä...

Womer si acho, heimer gad eh Nightwalk (wo gross apriese wird ir Broschüre) wöuä organisiere. Nume wiederwillig het me is de dä verchouft, aber zu däm später... Im NP hets Uffangstatione für Affe u Turtles. U für diä bruucht me eh Guide. DVietnamese hei äuä eifach dr best änglisch-sprächend vom Dorf zum Zoolog userkore u üs dä zur Verfüegig gstöut. Für viu isch das Mandli nid xi. Nachere erste Schimpftirade über di böse Chinese wo aus ässä (inkl Affehirni), heter sech de usgibig (öppe 1min) a sim Gmächt gchrauet. Bi de Schildchrötte acho, heter de ernöit über dChinese abgmotzt, obwou me hiä regumässig dutzendi Schiudchröttli am Märit xeht... Woner is de zum Abschied het wöuä dHand gäh isch dAnsch de chli zrügg gwiche ;-)

Churz vorem Nightwalk heimer de no zNacht zuenis gno. Fried Rice. Gmacht mit abgloffner Gefriermischung Gmües und verbrönntem Riis. Momou, eh Läckerei. Churz nach däm lukulische Mahl simer de vom Zoolog abgholt worde füre Nightwalk. Dä het 30min Töfflifahrt i Dschungu ine (jaja, es het Strasse im NP) uf dr Strass statt gfunde. Zielsicher het ds Mandli de o gad eh super schöni Echse ufem erste Boum gfunde. Bir Identifikation hets de aber ghapperet... Er het gmeint das sigi es Chamäleon... Naja... Meh heter de nüm ds Stang bracht. DTaschelampe heter düre Wald la freese wine Strobo ir Disco...

Chum isch de dTour fertig xi, ischer ufs Töffli u ab durch die Hecke. Üs het me Mitts ir Nacht im Wald lah stah. Danke, mir si guet hei cho! 

Deheime isch i däm Fau eh nassi Matratze u eh stinkendi Techi xi. DLuftfüechtigkeit...

Das wäri no eh tuusigjährige (ja, es isch eine, nid zwe) Boum, wos het gha.

Das dönd natürlech izze sehr negativ :-) ischs aber nid xi. Ds Grüen u dNatur im Park si super. Eh richtigi Entspannig nach au däm Lärm ir Stadt. Und, ganz wichtig: mir hei ganz schöni, wiissi Schneggene xeh bim Nightwalk.

Mir gö izze de no id Halong Bay (und si ufs Schlimmste gfasst) u när uf Sapa. Drum wüssä mer no nid, wenn dr nächst Blogg chunt.

Öich wünsche mer es schöns Wucheänd

Ansch u Ürsu