Friends, Family and the National

Guete Tag

Jaaaaaa, es isch lang här. U mir hei öii Kommentär zur Kenntnis gno... Mir düe wieder flissiger öppis da druf stöuä :-)

Aber mer hei natürlech mehräri Gründ für das lange Schwiige :-) dr Houptgrund isch: mir si in Singapur xi. Mir hei üse grüen Fuessabdruck chli schwärzer gfärbt u eh Städtereis gmacht. Mir finge das völlig ir Ornig. Schliesslech muess me o Mau eh Uusziit ha. :P

Houptgrund für dä Trip si di Herre da xi:

Ansch's Liäblingsband - The National - hei am Samstig es Konzärt gäh. U das amne OpenAir. Das heimer natürlech nid dörfe verpasse. Eh zwöite Houptgrund si diä zwöi xi:

Richtig. Sommers si ou cho u wiu mer diä scho lang nüm hei xeh, het sech das dopplet glohnt.

Singapur isch es tüürs Pflaster für Asiäreisendi. Üsi 90$ hei de o nume für nes Hostel glängt. Das isch de es Kajütebett ohni Fänster xi u dManne hei fürs WC eh Stock ufe müesse. Di abeküehleti Aircon Luft het de Manne de o nid so guet toh. Im Shopping-Centre wos eh Salat zum zMittag gäh het, hei zwe Asiatinne 3/4 vomne Salat lah stah. Unger angerem läckere Schinke. Di Zwe hei sech de a dä Salat härä gschaffet u nachdäm dr Fäbu no dr Näbätisch gfragt het öb das ihre si (Anm. von Ansch: die Ladies hei ihn vrständnislos agluegt!), hei si de dr Schinke packt u verschlunge. Für nes genauers Bild vo däm, lueget doch folgendes Video ca. 0:29mim:

http://m.youtube.com/watch?v=qnydFmqHuVo

Säubstverständlech heimer o no dStadt chli besichtiget:

Und es paar Läckereie verschlunge:

Izze simer aber scho wieder zrügg in Phnom i üsem Luxushotel :-)

Dasch halb so tüür u drü Mau so schön. O ds Biär isch billiger :-)

Gester u hüt heimer de o no Familiä troffe. Dr Phipu isch mitem Jepu hiä in Asiä am umetigere u mir si mit dene ga ässä u hei eh Usflug zumne alte Königsgrab gmacht:

Izze geits Richtig Süde as Meer. Es Visum ga mache. U de ab für dr nächst Bsuech in Ho Chi Min i Empfang z'näh. I 10 Tag darf dr Chrigu scho di Asiatische Chochkünst, Stränd u Temperature gniesse.

Mir hoffe, dir sit chli besänftiget dür di vile Biudli u di längi Brichterstattig. Häbäts guet u bis nächst Mau.

Ansch u Ürsu

Eliiiiiiifant

Huhu

Mir sitze hiä im Smile Restaurant in Kompong Cham, chli nördlech vo Phnom Penh u trinke eh Pineapple Juice. Hiä chame nid so dr Huufe mache. Es isch 36 Grad u me stirbt vo 11-16:00 fasch vorusse. 

Drum simer früeh uf u überne Master-Bambus Brügg. Mit sine Stummubeinli (gemäss Nik) het dr Ürsu über tuusig Schritte zeut. Aso äuä öppe 400m. Das Brüggli hätt aber o am Nik sis Gwicht usghalte. S'hei nämlech sogar Pick-Ups drüber möge. U so xeht das us:

När heimer is ids chüele Hotel müesse zrügg ziäh. Ded heimer, as aständigi Bürger, üsi Stüürerklärige usgfüllt. Heiter no ni gmacht, hä? Dr Chrigu, üse Lastesel, daf de diä mit hei näh u für üs abelah :-) Fröisch di, Chrigu?

Vorgester simer no im Elephant Valley Project xi. Eh Uffang-Station für Dickhüüter wo hei müesse Touriste oder Holz schleppe... Für aui wo no niä ufemne Elefant gritte si: chöiter gad vo öire Liste striiche. Es sogenannts No-Go. 

http://www.elephantvalleyproject.org/

U wiu si so härzig si, gad no eis:

Jo, viu meh heimer gad nid ds briichte. Morn fahre mer de uf Phnom Penh. 

Aaaaah.. Öppis heimer no. Dr Heisshunger nach Western-Food het is übermannt u mir hei nis i zwe Täg einisch Börger u einisch Pizza inezoge. U schäme üs natürlech chli. Aber es isch soooo läcker xi ;-)

Öich wünsche mer eh schöne Sundig u eh guete Wuchestart.

Ansch u Ürsu

Miiiiiiini-Van

Hello

Mir ligge im wilde Weste vo Kambodscha uf üsne Näster. Sen Monorom, heisst das Kaff. Hiä gömer morn go ne Usflug ines Elefante-Rehabilitation Centre mache.

Hüt simer hiä härä cho imne Mini-Bus. Diä hüt hei dr Vogu abgschosse. Ir Schwiiz würd me i di Minivans 14 Lüüt dri tue. Hiä hei si 22 inegmoschtet u dr 23igst het hinge ufs Gepäck chönne hocke. Richtig! Ds Gepäck hanget hinger use mit em Kofferruum-Techu halb zue u mit Seili agmacht. Sehr interessant. 

Mir si o no im Norde obe xi. Und zwar in Ban Lung. Womer es Superbungalow mit View hei gha: 

Faus nech öii Wägä Mau i Norde vo Kambodscha sötte füehre (was äuä eher unwahrschiinlech isch), hättä mir nech no eh Tipp: Coconut-Shake im (sehr innovativ gnennte) Coconut-Shake Restaurant. Wäutklass isch dr Vorname.

Wemer is das so überlegge... Vilech ischs scho nume für dä Shake dr Wärt da härä z'cho. Nume 12h Busfahrt vo Phnom Penh :-)

Wases o no het isch eh Super See wo komplett rund isch. När hei si überau so chlini Plattforme dri bout. Weme de 500m vom Igang wäg isch, het resp. hätt me de so eini für sich. Chum hei mir eh läärä für üs eroberet si drüü Wiisbrot cho u hei sech o ded müesse niederlah. Mit ihrem wunderschöne, französische Akzänt hei si de Non-Stop vo ihrne Travel-Adventures verzöut. Fuck this!

Wiiter simer no in Kratie xi. Eis vo de einzige nid verbombte Kaff in Kambodscha. U entsprächend hets no viu härzigi Hüsli:

Ded heimer o wieder einisch es Töffli gmiätet. Entsprächend de Fahrkünst, isch de o dAnsch gfahre. Dr Chrigu würd sägä: di einzig richtigi Entscheidig. U äuä o dr Grund, werum dä Uusflug unfallfrei über dBühni isch gange. Mir hei de no einisch Flussdelphine xeh. Und si när no ines Turtle-Conservation Centre, wo me dene Fisler hiä, eh Chance uf nes Läbä git:

När heimer no es Föteli us Laos :-) dr Ürsu het no es Borstetiär müesse chraue:

So! Das wärs vo üs. 

Liäbi Grüess

Ansch u Ürsu

Im Land der Khmer

Hi

Nachdäm mer di letsti Wuche am Mekong verbracht hei, hets izze gheisse Abschied näh vo Laos. 

Mir si sitem letste Blogg no uf Don Kong und Don Det xi. Zwe Insle im Mekong. Don Kong isch relativ gross, was mer bim Velofahre hei müesse merke. Bi knapp 35 Grad heimer dInsu mitem Velo erkundet. Di super Velo hei üsi Füdlis scho nach knapp 45min ruiniert gha. Me cha sägä, z'hocke isch o drei Tag später keh Fröid. Drfür heimer nech hiä no es Foti vomne Insubewohner:

Um Don Det, eh chlineri Insu heimer chönne umeloufe u no öppis typischs gfunge wo mer no ni verzöut hei. D'Laote mache überau so härzigi Gärtli uf Stäuze. Ded hei si X Gmües u Chrütli dinne:

Mir hei de no eh kuuli Kayak-Tour gmacht wo mer unger angerem Flussdelphine xeh hei. Es wiiters Highlight isch am Mekong si gröst Wasserfall xi:

Hüt heimer is de, wi xeit, ad Gränzüberquerig gmacht. Für 80km Wäg heimer 7h bruucht. Nachdäm is üse Bootsfahrer so clever het usglade, das mer is Wasser hei müesse zum usstige, heimer när Mau gueti 2h gwartet bis dr hingerst u letst Schnouz am Busbahnhof sini Arrival- und Departurecard usgfüllt het gha. Bekanntermasse si ja Gränzä immer geignet zum Abzocke. So o hiä. Ufnes Visa vo 20.- wird no 5.- druf gschlage, plus je eine für ds Handling ar Laos u Kambodscha Gränzä. Ds Fiäbermässe (jaja, dir läset richtig) chost de eh zuesätzleche Franke. Nach Adam Riese git das 28.- u so steit das o im Reisefüehrer... Für 30.- het me de das Ganze amne Schnouz chönne überlah u nume müesse warte. Ach so bereisti u beläsni Lüüt hei gfunge si heigi das gaaaaanz angers gläsä u das chosti nume 20.-... Ds Gstürm vo dene het de dAbfahrt no chli meh verzögeret. Si hei de o rächt bhalte u tatsächlech 1.- gwunne... Es Wow für diä.

Nachdäm aus glade isch xi, simer de nach drei Stung ar 20km entfärnte Gränzä itroffe. Ded heimer gschlagni 4h döfe warte bis aus gmacht isch xi. Di nächste 60km heimer de, o Wunder, imne Minibus mit 9 angerne i eire Stung absolviert. Am Stadtafang hets de gheisse es chämi eh wiitere Bus für diä wo i Süde wöuä. Da mir eh hei wöuä ahalte, simer suber no mit is Stadtzentrum u ded gad is Hostel u gad ab  is Biär.

Drei Stung später si de o dSchnöiz uftoucht wo ufe Bus gwartet hei (wo natürlech nid isch cho...). Muahahaha.

Ds Highlight vo üsem Hotelzimmer isch übrigens dDuschi... Me cha sägä, o Lüüt mit Ürsus doch eher gringer Körpergrössi (mir rede nid vom Umfang), finge nume knapp Platz:

Eh Gruess a Nik, Ryan, Yänu u d190er Kompanie...

Cheers!

Ansch u Ürsu

Mekong

Yihaaaa

Mir hocke hiä am Mekong u genähmige üs es chliises zMittag:

Was gmüetlech usxeht, isch mit herter Arbeit verbunde. As ersts heimer eh Bus gno wo me ir Mitti aus mit Riisseck ufgfüllt het. Ded hei sech när no öppe 15 Laote drufquetscht, so das dr Bus när sicher um 1/3 überfüllt isch xi. När wird au 5km aghalte u X Materialie wärdä ih und usglade... So xeht das när us:

Nach dere Busfahrt simer de in Pakse acho u hei am nächste Tag es sŏrngtăaou (müesster ni probiere usdspräche) gno. Das si grösseri Pick-Ups mit ere deckte Ladeflächi wo dLüüt druf hocke. Belade isch das mit folgende Sache xi:

Baguette, WC-Papier, Wasser, Salat, Dill, Koriander, Früehligszibeli, Mimosas, Maggaroni, Risseck, Taro-Cream Bun, wasser, Bier, Watt, Rad, Whiskey, Chicken on a Stick, 9 Ching, 14 Laote, 1 Grosle, 2 Farang (mir), 500kg Zemänt, Pops,  Keffirlimetteblätter, Kabel, Schlüüch, Schlangebohne, tröchnete Tintefisch, Abwäschmittu, Soyamilch, Chörb, Milch, Zigerette, Chinderoutöli, Bund Banane, Sack Fisch, Eier.

Di Liste isch natürlech nid abschliessend :-) 

mit däm Gfährt si mir is Bolaven Plateau. Uf Paksong, wo gemäss Lonely Planet eh Superort isch zum erkunde. Leider chame weder Velo, no Töffli, no Outo miätä... I däm super Ort. Merci. Drum heimer is entschide abz'ziäh u äbä a Mekong ga ds höckle. Eh alti Stadt (frei nach Götschi 'das Angkor des armen Mannes') simer o no go aluege u izze gömer de no paar Täg uf Mekong-Insle bevor mer uf Kambodscha rassle.

Mir wünsche öich eh guete Start id Wuche.

Häbets guet.

Ansch u Ürsu