Biuder-Blogg

Huhu

Mir sitze gad wieder imne uuuuralte Bus u mache di zwöiti Schloufe vom Wäg i Süde :-)

Mir hei natürlech nid ufe Götschi glost wo über dä Wäg wo mir izze mache xeit het:

Von Vientiane nach Pakse:

- im Bus ca. 20h

- im Flugzeug ca. 45min

Im Zweifelsfall immer fliegen...

Hahaha. Aber mir hei ja Ziit. 

D'Säru u dr Fäbu hei is gester verlah *sniff* u si ab uf Südthailand, Malaysia u Australia. Have fun friends. We miss you!

Ja, viu meh heimer nid ds brichte. Aber es paar Föteli heimer no für nech:

Di si aui us Vientiane. Me cha sägä mir hei eh chlini Gourmet-Tour gmacht :-)

Lime&Mint Shake. Ganz eh gueti Kombination.

Dasch dUswahl im Fruit Heaven wo mer regumässig ikehrt si. Und hiä unge no eh Gmüesmäritstand. Mobil, säubstverständlech:

As letschts no zwöi Föteli mit üsne liäbä Reisebegleiter. Üses letste zNacht. Vietnamesisch. Wätklasse-Summer Rolls zum säuber röuälä. @Chrigu: chasch di uf das fröie. Dasch ganz guet.

U när simer no uf dr arabische Halbinsle xi :-)

Nei, latürnech nid. Dasch am Mekong-Ufer. 50m vor Thai-Siite wo mr überne Insu wo nume ir Trocheziit fürechunt gwatschlet si. Me munklet, dr Fäbu het ging no Sand i sine Adidas.

Häbets guet u bis zum nächste Mau

Ansch u Ürsu

...

We are proud :-)

Meanwhile...

Hi

Mittlerwiile simer ir Houptstadt vo Laos acho - Vientiane. Sehr viu spektakulärs heimer sitem letste Itrag nid erläbt. Luang Prabang het üs aune sehr gfaue u mir gloube, das das o für öich eh Reis wärt wäri. Chli chalt isches...

Eh kuule Wasserfau hets ou. U mir si genau so Wasserfall-Muffle wi viu anger o. Dä hiä isch super!

Luang Prabang het übrigens viu Läckereie z'biätä.

Kokosnüss ghöre natürlech o derzue. Leider heimer gad keh Lao-Lao (laotische Riis-Schnaps - Tüüfuszüüg) drbii gha. Drum heimer üsi Kokosnüss haut ohni alkoholoschi Zuesätz müesse gniesse. Dr Schnaps hei aber üsi Mitfahrerinne i üsem Minivan-Trip uf Vang Vieng trunke. Vier jungi Oustralierinne wo sech ni drum kümmeret hei z'läsä wi dStrasse vo LP uf VV si. 6h nume ufe, abe, links rächts... Zwöi si äxtra z'vorderst u zwöi z'hingerst im Van ghockt. Si hei aber dRächnig ohni üsi Ruckseck gmacht. Di hei di hingerste nämlech as 2 u 3 Pärson uf dRückbank bercho :-)

DSäru het sech scho nach de erste füf Minute erkundiget öb di Dame öppis gägä Motion Sickness heige gno... Schliesslech heimer ja scho Erfahrig mit Chötzlis und am Fäbu es wiiters traumatischs Erläbnis wöuä erspare. Es kam, wie's kommen musste... Nach gfühlte 10min het Fäbus Banknachbarin ds Seckli zückt und dri greieret. Das het när vier Stund nüm ufghört u isch komischerwiis o nach Chips u angerne fritierte Sache ni besser worde... Werum äch?

Vang Vieng het üs de as Dörfli nid eso gfaue. Aber eh Blick is hinger dra glägnä Tal het is de überzüügt das mer es Velotüürli müesse mache:

Ded simer när ufne Hügu kraxlet und hei no dä Usblick chönne gniesse:

Izze simer in Vientiane, womer üsi letste gmeinsame Täg verbringe. Es winzigs Houptstädtli isch das hiä. Dr Ürsu het sech gester scho bim Laot zNacht eriiferet er wöugi sis Ässä sehr scharf. Däm isch Folge gleistet worde... Er het de dr Abe lang z Gluggsi gha u si lädierti Mage hets weni erfröit... Dir xeht, s'git Sache, di ändere sech niä :-)

Schöne Sundig u me wetts Mau as Schwiizer no xeit ha: Go Stan!!!

Ansch, Säru, Fäbu, Ürsu

Whisky-Tämpu u Laos for Penguins

Sabaidee (oder wi o immer me das schribt)

Nachdäm mer im Norde vo Thailand no am Nicu si Tämpu in Chiang Rai si ga aluege, heimer is när ufe Wäg nach Laos gmacht.

(In Gross isch das eh Whisky Fläschä)

Für uf Laos gits izze eh riesigi, nigunagu nöii Brügg. U mit dere verschiedeni, nöii Ikommensquelle. Zum Bispiu eh Bus wo 20Baht choscht und ded muess me für jedes Gepückstück no 25Baht druf legge. När wohnt nach dr Brügg as laotischs Makakke-Alpha Mändli wo TukTuks dirigiert u Touriste abzockt. 

In Laos simer de as ersts ine Gränzort wo Huay Xai heisst. Ded heimer es ersts Beer Lao gha. 

Das heimer tüür erchouft. Bire böse alte Frou wo üs ds Wifi-Passwort nume het wöuä gäh we mer eh Tour bi ihre bueche. Mir heis de vore Touristin bercho, woruf di Alti isch use cho und üs es 'you stole my wifi' vorgworfe het. Si het üs de derfür 3 grossi, statt chlini Biär verrächnet. Nätt.

När heimer eh zwöitägigi Schiffsfahrt ufem Mekong gmacht. Es isch u huere chalt xi. Mir si nis vorcho wi ir Arktis:

8 Grad am Morge. Vier Schichte heimer müesse alegge u chalt heimer ging no gha. Komischi Lüüt hets o gha ufem Boot. Zum Bispiu diä da: 

Aber ds Ässä u dLandschafte si super schön xi:

Früüre düemer immer no, aber izze in Luang Prabang. Hiä isches sehr suuber u es gfaut is. Gester heimer es Lao BBQ gha. Sehr zur Fröid vom Fäbu. Das isch eh Ring wo Suppe dri chunt. Dä wird ufne Cholegrill gleit u när chame ir Suppe zGmües, dNudle u dEier choche u obe druf ds Fleisch u dr Tofu mache. Suberi Sach:

Ände weimer mitere laotische Weisheit. Haha.

Krieger

Mir sitze imne Minibus nach Pai (i üsere Wäut wird das Päääääiiii usgsproche). Eh Tipp vom Rebi. Sozsägä es Must-See. Üse Fahrer isch eh Chrieger u dStrass sis Schlachtfäud. D'Susie würd usstige, dr Chrigu dr Hunderter Trinkgäud zücke. 672 Kurve hets, für ihn öppe 300, wiu är dHeufti schnitt, resp. eifach ir Mitti vor Strass raset. D'Ansch het Shotgun (front row) g'anglet u verpflegt dr Fahrer flott mit Wasser, so daser i sire komplette Konzentration nid gstört wird. Ds Ganze: es Highlight a Fahrkünst.

Eh Fahrgast het di Tour nid ganz so guet überstange. Nach dr gfühlte 600ste Kurve hei ne churz vor Schluss dEingeweide im Stich gloh u er het fründlecherwiis gad näbäm Fäbu ine Sack kotzt. Ohni z'zögere heter aber gad wiiter gässä u natürlech gad wieder müesse wärfä. Schön.

So xeht Pai us. Schöni Landschafte, agnähms Klima. Leider hets aber viu mit abgschnittne Haar, verfilzte Bärt und de süsch typische Azeiche vo Säubstfindigstrips...

Drum simer izze o scho ufem Wäg wiiter. Hiä no eh Nachtrag us Chiang Mai. Mir hei no dr Mondemon Ohrepänkli-Lade vo Asiä gfunge und dFroue hei sech chönne usläbä. Für 1 Paar in Barcelona gits hiä öppe 20 Stück :-)

No eh Nachtrag zu üsem Wohlbefinde: dAnsch het sech gschonet und isch mittlerwiile wieder fit. Dr Ürsu het gmeint er müessi nach zwe Täg scho wieder eh Wurst u Biär inetonnere. Si Mage dankts ihm mit konstantem Durchfau :-)

Darum merke: Tee statt Bier!

Adieu

Coffee, Shakes und Tage der Toten

Guete Tag

Mir si in Chiang Mai u s'gfaut üs sehr hiä. Mir wohne imne härzige Quartier vou Lädeli, Hostels u Restaurants. Leider hei mr nid sones härzigs Hostel wi di angere, abr guet. Nächst Mau heimer de meh Glück.

Mir si dür dStadt turnet und si afe dä schön Wat go aluege (obwou dr Fäbu izze de dSchnurre vou het vo dene):

När heimer gad näbä üs eh Märit wome läckeri Fruchtsäft cha choufe:

Und in Sukhothai heimer usegfunge wi Thais ihri Ice-Coffes To Go mache. Me macht dr Kafi, dued ne ine Pastiksack vou Crushed Ice, dued dä Sack ines Papierseckli und das när wiederum ine grössere Plastksack mit Hänku. Mir gloube, sogar dr Mac macht mittlerwiile weniger Abfall. Bravo! Aber läcker isches :-)

In Chiang Mai simer när no go Muay Thai luege. Super xi, bis ufe Schluss u das i doppleter Hinsicht.

1. isch dr letscht Kampf verschobe xi. Di einzige zwe dicke Thai-Kämpfer vom Abe hei dr Abschluss gmacht u dr dickscht isch nach gfühlte 30sec ir erste Rundi zBode...

2. het dr Ürsu sis letste Biär nüm möge. S'wärd ihm schlächt (u das ghört me ja bekanntlech weni, wes bi ihm um Biär geit). D'Ansch wo mit ihm Biär teilet het, het ds gliiche gha u chum simer deheime xi, het dr Spass agfange. Mir erspare nech izze dEinzuheite. Aber gfägt hets nid. 

So hei mer Säru u Fäbus Hochziitstag as lebende Tote im Bett verbracht. Izze chöimer aber wieder ufstah u bim Beck öppis ga z'Morge hole. Mau luege öb das de guet chunt.

Öich wünsche mer guets uspfuuse u eh schöne Sundig.

Ansch, Säru, Fäbu, Ürsu

Chang

Guete Morge

Mir ligge da am 07:50 i üsem Guesthouse u lose are dumme Ängländerin bi ihrem Skype Gspräch im Näbäruum zue. Oh, my gosh... Das het si öppe 30x ir Minute verzöut, bevor dAnsch es: 'iz bis Mou ruhig' vo sech gäh het! Izze isch si furt :-)

Mir si izze in Sukhothai, womer zwe Nächt bliibe u hüt gö go Stei-Hüüfe luege.

Sitem letste Iitrag simer zersch im Khao Yai Nationalpark u när in Lopburi xi. Im Nationalpark simer ga Dschungel-Trecke u hei Gibbons xeh. Das Föteli het dr Guide mit Säru u Fäb's Kamera gmacht udr Fäbu hets när mit sim iPhone vor Kamera gfötelet! Pretty good, huh?

Wiiter heimer ganz viu Makkake (o Affe) und Reh xeh. Z'Highlight isch aber natürlech am Schluss eh Herde wildi Elefante xi. Di si näb dr Strass am mampfe xi u hei sech ni la störe. Sogar es Bebeli hei si derbii gha, aber das het sech leider ni la fotografiere.

Chang isch übrigens o zBiär in Thailand. DMeinige gö aber usenang öb izze Chang oder Leo z'beste sigi. Uf au Fäu wär hiä Mau es Foto das dr wüsst wi das so usxeht:

Nachem Nationalpark simer uf Lopburi wo zHighlight dStrasse-Affe si. Di turne ded ds hunderte frei dür di ganzi Stadt u stähle aus was wi zFrässä usxeht. So quasi zPendant zu Strassehüng u -chatze i angerne Stedt. Üs hei si nüd gno, aber am Morge simer gweckt worde wo si vor üsem Fänster Radau hei gmacht:

Natürlech heimer no es paar Föteli meh vo dene Hagle. So xehts us we si när vo de Decher dStrasselampe abe chöme:

Mitem Zug u emne uralte Bus simer när i füf Stung vo Lopburi uf Sukhothai gfreeset. Vo hiä us geits de no wiiter nördlech u zwar uf Chang Mai, womer de äuä Mau chli lenger bliibe, wiu mr wei wäschä u am Sundig a Sunday-Market wei.

Scho isch Mittwuch, di halbi Arbeitswuche heiter scho fasch gschafft. You can do it.

Liäbi Grüess

Ansch, Säru, Fäbu, Ürsu

River Cruise

Hellou

Üse 2t Blogg chunt usem Zug vo Ayuthaya nach Pak Chong. Ayuthaya, eh früecheri Königsstadt isch vor auem bekannt für di vile Steihüüfe wome cha aluege. Unger angerem dä Buddha wo im Boum gfange isch: 

I Fiinschmöckerkreise isch aber dr Stand am Nightmarket mit sire Minced Pork Omelette zHighlight vo dere Stadt. Fäbu fingt zwar das ds Hüehnli mit Cashew-Nuts zBeste isch xi waser ded het gha. Ürsu wiicht aber nid vo sire Omelette ab. DAnsch u dSäru meine klar: Noodles, Vegetable and Egg.

Eh Läckerei uf au Fäu!

Näbst em Ässä heimer o no "a romantic Rivercruise into the Sunset for only two hundreeeeed Bath, my friends" gmacht. Mir si schlussändlech romantisch imne Longboat mit 30 angerne Wiisbrot ipfercht xi. Gad vorem Motor wo eim fasch zGhör groubt het. Bsunders wiu ds Mandli am Stüür no het müesse nonstop eh chli gäsele. Dr Sunneungergang bim letste Tämpu het aber de für vieles entschädiget (Säru Föteli):

Eh Velotour mit uralte Göple heimer de o no ungerno. Am drü heimer aber vor dr Hitz kapituliert.

Säru, Ansch u Fäbu si när no id Thai-Massage. Ürsel isch gägä dHandles ga jogge. U wär äuä o gschider id Massage. Si Gring isch ämu wesentlech röter xi as de drü angerne ihre.

Izze simer ufem Wäg imne Schüttuzug nach Pak Chong, womer i Dschungu wei go Viecher sueche.

Mir wünsche nech es schöns Wucheänd.

Ansch, Säru, Fäbu, Ürsu

Handles arrived

Schiff Ahoi

Mir si in Bangkok acho und verlöh dä Moloch nach vier Täg de morn o scho wieder! Drum chunt izze üse erst Blogg! Dr Titu, passend zu üsem Reiseziel:

How to (love)handle the ricebowls!

Mir hei scho ersti Schrecksekunde u Ufreger erläbt! Si aber süsch guet acho u zfriede:

- Am Checkin het me nis ohni Rückflug nid wöuä la istige! O dr Schiffsuswiis vo Ansch's Eutere wo mir as Wiiterreise-Bestätigung hei wöuä präsentiere het nüd gnützt! Schlussamänd hei de 2 Kreditchärtli u 3 Bankchartr glänt für di nätti Dame z'überzüüge, das mir gnue Gäud hei für di erste 30 Täg

- Im Flugi vo Doha uf BKK het sich de Ansch's Sitznachbar es Schlaftablettli und es Biärli gönnt u sich im Koma drü Mau uf dAnsch gwäuzt! Gentleman-like het dr Ürsu näbädra pfuust! Em Saber wo nim ohni Ürsu-Übertriibig bis zur Brust abeghanget isch, het si chönne entcho!

Ds BKK heimer Simä u Nicu troffe! Säru u Fäbu, wo mit üs iz umetigere heimer o ufglade u z'6t heimer scho chli Biär trunke!

S'isch heiss u de muess me viu trinke, heimer ghört!

DStadt heimer natürlech o scho erkundet! Unger angerem dr Wat Pho! Dr liegend Buddha:

Ansch u Fäbu hei sech da äuä es Vorbiud abgluegt und o gad eh Nuck müesse näh:

Morn geits wiiter Richtig Norde! Ayutthaya isch üse erst Stopp! Nach längere, erfouglose Telefonat heimer izze es nöis Deheime für zwe Nächt!

Mir wünsche öich aune es guets Nöis! Teilet doch dAdrässä vo däm Blogg de interessierte mit! Mir fröie üs über Rückmäudige u Kommentär! Über Mails, Whatsapp u SMS! Vergässät üs nid! Mir gäbä nech gärn Antwort u fröienüs! We dr is weit cho bsueche, let us know!

Schöne Abe,

Ansch, Säru, Fäbu, Ürsu