Gfundä!!

Ahoi Allerseits

So, lang isches gange (chli meh as 70 Täg) u wiit isches xi (fasch 10'000 Meile), aber mer hei se ufgstöberet, dNad :-)

Das bedütet o, mir si in Halifax acho. So nöch simer em deheime scho lang nüm xi. Nume no dr Atlantik zwüsche drin. Dä isch o gad vor üsere Huustür:

Mir mache, wie erwartet, nid viu. Mir warte bis dNad am Morge usem Huus isch u düe de när, ganz fründschaftlech, no paar Stung us-schlafe ;-) när gömer id Stadt ga käfele u ga umegammle...

Iz isch ja de Thanks Giving (ämu ir USA) u drum het sech dr Ürsu gester im botanisch Garte übr dGans wöuä härmache:

Di heter de i eine vo Nad's WG ihrne Chüeuschränk wöuä zwüschelagere:

Ja, dir zeuet richtig, dChüelschränk und dKilowattstunde. DNad betätigt sech hiä as Don Quijote u dWindredli si ihri energieverschlöidernde Mitbewohner. Jedes Liächt wome hiä ablöscht brönnt nach knapp 3min wiedr :-)

Da sech dr Ürsu aber i karnivorischer Unterzahl befindet, het ne dAnsch vom Gans-Agriff chönne abbringe u das schöne Tiär dräiht wiiterhin friedlech sini Rundine im Teich.

DNad xehmer de immer gad am Füürabe u fröie üs immer we si ufchrützt u üs Gsöuschaft leistet:

Natürlech o, we si üs hiuft ar Melä ihres Geburigschänk z'vertilge:

Dasch natürlech ar Ansch ihre Ateil. Dr Ürsu isch mit sim verböistig:

Aber irgendwiä wei di zwe Herbivore ihm dä gar nid striitig mache :-)

Mir wünsche öich eh schöne Tag u eh gueti Rästwuche.

Nad, Ansch, ürsu

Winterwelt

Ahoi

Mir hei ni viu z'brichte. Weder lustigs z'verzöuä, no dummi Sache agstöut. Entsprächend weimer nech o nid ds lang verwiile. Mir hei ja das Jahr vor öich Winter. U da mir sehr winterverliäbt si (bsunders dr Ürsu, houhouhou), wette mir öich super Tipps gägä Winter-Blues mitgäh :-)

Zersch Mau afe üsi Föteli usem Schnee-Land:

Das si se, üser Föteli us Montreal u Quebec. Sehr chalt isch aso würk xi. Aber mir hei üs mit Zibele-Schicht probiere z'wehre. U hiä si üser Tipps für deheime:

1) Göht doch wieder Mau zumne Asiate-Lädeli u choufet nech es Fläschli Sake (oder no besser, es Fässli). Düed das deheime schön werme, u scho chunt das guet:

2) We dr zBiel (okay, ir beste Stadt vor Wäut) wohnet, göht zum L'Angel go nes Schoggimiuch-Kit choufe u machet nech eh warmi Schoggi (we dr nid ds Biu wohnet: hey, you're shit out of luck):

3) Machet nech eh Täuer feini Teigware mit viu Parmesan:

Pesto: Zibeli fiin hacke; Basilikum fiin hacke; Chili fiin hacke; Piniechärnä abrate u fiin hacke; aus mischle; Parmesan u Oliveöl drzue; mit Salz, Pfäffer u Zitronesaft abschmöcke.

Arrabiatta: Zibeli fiin hacke; Chili fiin hacke; beides ir Pfanne mit Oliveöl abrätle; Tomatemark derzue; mit Balsamico u Rotwii ablösche; Pellati derzue; la ichochöcherle; mit Salz, Pfäffer u Cayenne abschmöcke.

4) Choufet nech eh Riise-Cookie u teilet dä mit NIÄMEREM!!!

5) Suechet nech es Gspähnli wo Vorrät agleit het:

6) Verstecket nech u chömet nüm füre. Vorzugswiis nöime wos warm isch. Oberemne Chüeuschrank oder Bachofe isch üse Tipp:

Adios muchachos

Ansch u Ürsu

Canada, oh Canada

Bonjour (iz simer jo in Canada)

Aso as ersts zu de Gwinner u em Rätsu. DAntwort isch Springfield u dr Fium isch Simpsons - The Movie. Gwüsst hei das paari. Di schneuste drei si dr Oli (Sa Nacht), dr Chrigu (So Morge) u dr Nicu (Mo Morge) xi. Dir sit aso aui iglade zu Meatballs (in ferner Zukunft). Da das aui Manne si u dSäru mit The Truman-Show (eh Klassiker) o eh legitimi Antwort het gäh gits für si as "Trostpriis" es Tête-à-Tête mit dr Ansch. Mir hoffe so isch aune diänt.

Es si scho wieder paar Täg vergange u mir si izze in Canada. 

In Detroit heimer di Brügg gno für übere z'freese u si när dIda ga bsueche:

Zersch heimer aber no zwöi Gschichtli us Detroit. Mir si ded ines Steak-House go ässä. 2h Warteziit, gemäss Empfangs-Chatz. Was macht me da? Richtig, es Biärli näh. Nachem erste isch de dr Ürsu ungeduldig worde. Zur Beruhigung isch de dAnsch ga frage öb me o ar Bar chönni ässä. Ded ischs de: First come First served xi. Oder ide Wort vor Chatz: If you see a seat, jump! Zäh Minute später simer ar Bar gsässä :-)

Ded heimer eh huere lustige Chäuner gha. Äuä äh Ur-Detroiter wo Fröid het gha das mir Detroit Biär usprobiere. Ei Rundi heter is ämu gschänkt :-) u wo dAnsch nach dr Vegi-Bstellig no es Wasser ohni Iis (wär bruucht Iis wes dusse -3 Grad isch?) bstöut het, heter mitemne Grinse gmeint: Vegetarian, no ice in the water... You're a weird person :-)

Dr Ürsu het sech chli übernoh mit de Rippli u isch so Chugurund xi das är im Hostel nüm dür dTüür isch cho:

Me erkennt da dranne das ds Hotel z'wünsche het Übrig glah... Am 2i ir Nacht simer vo Gstank u Lärm gweckt worde... Eh Mitbewohnerin het gfunge si müessi no eh Snack mache. Dä isch de ir Chuchi ohni Abzug vor üsere Tüür zuebereitet worde... Dr Gstank isch de dür ds Chatzetüüri u dLüftig diräkt zu üs ine zoge... Mir hei de chönne wähle: Tod durch Ersticken oder Erfrieren. Mir hei ds Fänster uftah ir Hoffnig sanft z'entschlafe...

Mir läbä immer no, wi dr merket u si iz in Canada. U dasch üses Outo gester:

Nachem Chratze u Schabe hets üs de ad Niagara-Falls verschlage:

D'Ida, ihre Fründ Ryan u ihri Kollegin Jillian hei üs o scho es typischs Kanada-Gricht uftischt: Poutine (usgsproche wi dr russisch Präsident). Us esthetische Gründ heimer dä, i bruuner Sauce tränkt u mit orangem Chäs überbachne, Huufe Fritli nid gfötelet :-)))

Hüt isch zWätter wieder besser xi u mir si dür Toronto ghönteret. Es het sogar glängt für id Hockey Hall of Fame. 

D'Ida het hüt Abe müesse ga u iz simer wieder z'zwöit bis mer i füüf Täg bir Nadle itrudle...

Bye Bye USA

Guete Tag

Mir si iz gad ufem Wäg nach Detroit. Üsere letste US-Station vor Canada :-) Es geit iz dür verschneiti Landschafte. Eh Cheltewälle us Alaska het üs troffe. Di isch gad mit üs in Chicago itroffe.

Chicago het üs sehr gfaue. Erstens wius eh schöni Stadt isch:

Faus dr öich fraget werum dr Ürsu keh Chappe a het u mir vor arktische Cheltewälle rede. Aso... Das isch eso xi. Er het am Abe mit eim Griff sini Chappe im Schildchrot inne gfunge. Het se parat gmacht für am nächste Tag. Ganz stolz. U womer de hei wöuä ga, isch di Chappe niänä meh xi. Er het de afah sueche u sueche u nach öppe 10min ischer so gnärvt xi, das mer hei müesse ga. DAnsch het ihri Chappe abote (si het eh Kapuze gha). Das het dr Stämpfeli aber nid wöuä. Er het liäber chalti Löffle gha. Womer de am Abe si zrügg cho u in aller Rueh hei gluegt, isch si de nach 30sec uftoucht...

Zwöitens gits in Chicago Läckereie zum ässä:

Dasch eh Deep Dish Pizza. Original Chicago Style. Me erkennt, di hets verschobe. Das Missgschick isch o am Ürsu passiert. Das Ding isch fasch wine Chueche u mir hei de dr Inhalt wiedee müesse druf schufle. U de heimer no einisch Teigware gha:

Mit Giant Meatball. Wäutklass (obwou dr Ürsu dr bescheidne Meinig isch, dases di beste Meatballs bi ihm git - was dAnsch nid cha bestätige, haha).

U drittens isch Chicago u huere multi-kulti. Da hets alles wases uf dr Wäut so git :-)

Mir hei im Urban Holiday Loft gwohnt. Emne schigge Hipster-Hostel. DReception isch vom ne arrogante, bärtige Anüsli bsetzt xi. Uf dFrag wome chönn parke isch cho: on the street, i mean, read the signs. Wow, merci. Mir hei de drü Fänster im Zimmer gha. Was ja eigetlech super isch. Nume: der Amerikaner isoliert nicht. Und kennt die Doppelverglasung nicht. Mir si de ga Techine hole u bi dere Glägäheit über dChelti belehrt worde. In Amerika louf me nid im T-Shirt ir Wohnig ume... Merci und Wow 2. Und: er müessi di ganzi Hütte heize. Das hei mir de natürlech nid wöuä, hei das vermäudet u si unger Techi. Machem zNacht simer de heicho und Achtung! Souna! S'hei äuä no angeri chalt gmäudet... De wird so gheizt: dür riesigi Röhre wird heissi Luft blase u jedes Zimmer het eh Öffnig wos useblast. Guet, mir i de Ungerhose u T-Shirts gschwitzt :-) nach 30min isch de abgstöut worde. U nachere wiitere Stund isch de dWermi dür di nid isolierte Fänster u Wänd entwiche. Wow 3 für di nachhaltigi Nutzig vo ändleche Energie-Quelle.

As Wow 4 heimer de am letste Tag 3x eh Stromusfall gha. Mir si de nüd ga sägä, sondern hei dStirnlampe gno. Muahaha.

Mir gei wieder Mau es Rätsu. Da dr Nicu letst Mau briegget het es sigi kes guets xi u är wöu no eh Chance, hiä isch si, Herr Bussinger:

Das Foto isch vor Bohne in Chicago. Mir sueche aber iz eh Stadt usemne Fium :-) weli Stadt u wele Fium isch das äch? Muahaha. Di erste drü richtige Antworte berchöme es Meatball zNacht vom Ürsu (wohlverstande, di beste Meatballs vor Wäut).

Iz simer in Detroit u das isch krass hiä... Das heimer bim jogge xeh. U dr Typ im Hostel het nume xeit: it's not dangerous... Everybody just left...

Truurig.

Und glich schön.

So, u izze gömer is Biär u BBQ. Gniesset öii warme Wohnige. Mir heis schön as Schwiizer...

Ansch u Ürsu 

Elvis has left the Building

Hallo

Wi im letste Iitrag erwähnt, heimer ire ehemalige Chile gnächtiget. Es Hostel u jede hiä berchunt es Ämtli. Das het dr Ürsu bir Buechig überläsä u prompt si o mir nid derfo choche... Sweep the Hallway... Gärn! Das heimer natürlech gmacht, unger de Argus-Ouge vom Personal. Dr Herr het üs de mitteilt, das sigi immer eh Job für zwöi u förderi zTeamwork (wiu eine fägt u dr anger schüfelet). Mir si vei echlei dankbar das mir di Bezihigsprob überstange hei. Iz wüsse mer ämu das mer de zämä chöi wohne u us-chöme. Hahaha

In Memphis heimer is Musig-Technisch wiiterbiudet u si as ersts id Sun Studios. Ded si Stars wi dr Elvis, Cash u J. L. Lewis entdeckt worde:

Nachdäm simer mitem Free Schöttl zum Elvis sire bescheidnige Villa (Graceland) gfahre. Das isch izze es Museum und sehr spannend:

När heimer am späte Nami wiu mer kes zMittag hei gha hei, no imne Touri-Resti eis vo Elvis's Liäblings-Ässä gha:

Es Peanut-Butter-Banana Sandwich. Das hiä isch us Gold gmacht xi u het 5$ kostet. Sehr xund im Übrige... U iz sägä sech de gad aui: ah, drum isch dä so dick xi. Stimmt nid. Ds Mandli het öppe 4 ganz wüesti Sache gha, wo de o zu sim früeche Abläbä gfüehrt hei. 

Es isch aso super xi in Memphis u für Musigfans eh Bsuech wärt!

Wiiter simer uf Nashville. O bekannt für dMusig. U Musig simer ga lose. Drzue heimer es Biärli u eh Börger gno. Näbä üs heimer de no no eh wiiteri Spezialität entdeckt (u tunlichst nid bstöut): Fried pickles. Für aui Nid-Dicke: frittierti Essig-Gurke... Was zur Höu???

In Nashville isch de o dCountry Music Hall of Fame. Di simer natürlech o go inspiziere. U wüsse iz einiges meh ;-) 

Nashville isch ou eh kuuli Stadt. Mir si no am Farmer's Market xi u ded ga foode:

Iz simer ufem Wäg nach Chicago. Ded erwartet üs de frostigs Wätter... 3 Grad. Somit simer izze aui wieder gliich wiit :-)

So, das wärs. U üs bliibt no es: Elvis has left the building.

Ansch, Ürsu