Mir wüsse dir heit 0 Grad, müesst schaffe u s'isch dunku. Wär nid cha händle we mir blöffe. Dä sött izze eh angeri Websiite itippe...
Mir si bi guet 26 Grad vo Houston uf Galveston gchesslet. A STRAND :-)
Ded het me üs de no nid is Hotel wöuä lah. Obwou äuä aus läär isch xi. Mir si de A STRAND ga bade, wo der Marco mit träffsicherer Miene dr Wärt vom Extra Virgin Oil im Golf vo Mexico usegschmöckt het :-)
Nachdäm simer ga zMittag ässä u ded ine rumpusuurigi Chäunerin ineglaueret. Läck het diä eh Mouggere gmacht. Äschlis Äschäbächer het si usere Foliä bastlet, zum Ässä keh Gable bracht u uf dFrag öb mer döfe Serviette ha het si für üs vieri eini bracht. Mir hei de zLokal verlah u si ad Pier für NES BIÄR mit agnähmere Ziitgenosse ga näh:
Wiiter simer uf Kountze im Big Thicket. Ufem Wäg ded härä heimer de ändlech ire Weid Longhorns entdeckt. Di het dr Götschi scho lang wöuä xeh. Blinker use, a Strasseramd parkiert u ad Weid härä. Voll Fröid dr Föteler zückt u was macht dr Ämmitaler mit Chue-Erfahrig? Är pfiift... u was mache dChüe? si flüchte...
Ded in Kountze hei mer eh CABIN IN THE WOODS gha:
Es Füürli heimer o no gmacht. Zersch het dä Hagu nid wöuä alah. Mir si de aber gmeinsam id Büsch u hei zUngerholz dezimiert u dene Schiiter Füür ungerem Füdle gmacht. Leider hets chli rächtsdrang gha (was ja in Texas nid verwunderet) u isch is de gad churz nachdäm mer z'erste Biär uftah hei zämägchrutet.
Mir hei de o no eh NIGHT SAFARI döfe mache. Private Golf Cart. U was heimer xeh? Eh Biber u eh Armadillo (Gürtler). Allerdings müesse mer bi auem Blöffe ehrlech bliibe... Dr Biber het me ir Nacht chuum xeh. U dr Schosshund het drei Armadillos i Wald oder ungers Huus gjagt. Hahaha
Da mer iz scho mehreri Dusch-Iträg hei ufgfüehrt isch natürlech ou üsi FREILUFTDUSCHI unbedingt erwähnenswärt:
Uf Arate vom Rebi heimer de o no in Lafayette, Mitts im Cajun Country (nöcheri historischi Usfüehrige vom Marco) eh Stopp gmacht. Hiä heimer ES LOFT für üs 4i.
Si natürlech o go Cajun-Musig lose u chum ir Bar gstange isch de dr Ürsu (zuegegäbenermasse dr Best-Ussehend nach dr Ansch) o zum ne Tanz ufgforderet worde. Gemäss dr überwiegende Mehrheit vo üsem
Grüppli het ihm eh hübschi, jungi Dame dHand entgägägstreckt u är het diä, mitemne flehentleche Blick zur Ansch, geflissentlich überseh. Di aschliessendi Diskussion im Plenum het ergäh, das dAnsch ihn jederziit mit anderne Dame würd la tanze. Ersch bim Choche für anger Froue gäbs de es Iischritte. Dra erkennt me: aui Klarinettestunde u aus Wunschdänkä vom Papa Känu het usem Sohnemann kes musisches Genie gmacht.
Aber gnue über Ürsu's Tanzkünst. Mir wette o am Götschi hiä no eh Bäredienst tue. Dä het nämlech gross verzöut, er heigi sich scho mängisch überleit ga lehre z'tanze. Somit, Co: Amäudig füre Tanzkurs abschicke. Üses Wiähnachtsgschänk wäre de Schue mit modische Stahlkappe... U singe: put on your dancing shoes.
Natürlech gönnt me sech o no es WELLNESS U SPA. Hiä hättä mr dr Aeschli bim Hot Shave:
Cajun Food heimer o no probiert. Xeht weni appetitlech us. Isch aber läcker xi.
Cajun Benedict isch das. Gumbo isch o gässä worde. Rächt interessant wases da so git.
Häbets guet
Aeschlimaa, Götschi, Ansch, Ürsu
Keine Kommentare:
Kommentar veröffentlichen