Sinners

Guete Tag

Mir si wieder eleini u hüt chli truurig i Norde gfahre. Mir hei üsi Reisegspähnli zrügg glah u wieder Mau eh Krokodilsträne müesse verdrücke. 

Merci öich zwöine fürs cho. Es hat gedürstet und gehungert. U keni dicke Lüüt in Amerika... 

Di letste zwe Täg heimer üs im Sündenpfuhl des Südems umxeh. New Orleans isch eh lustigi Stadt u doch würklech schön. Mit alte Hüüser, gueter Musig u läckerem Ässä:

Mir si o em Ruef vor Natur no gfolgt und id Sümpf unger New Orleans. Aligatore heimer gsuecht u leider nid gfunge. Mir heinis churz überleit öb mer mitels SsiiSsaaSsugg es Opferlamm zum alöcke söuä usmache, s'när aber la si ;-)

Xeh heimer aber de Schiudchröte u wunderschöni Sumpf- u Moorlandschafte:

Dr Marco het de no eh Frösch im Unterholz ghöre quake u isch däm nache. Schliesslech heter ne de entdeckt. Im Muul vore Schlange ;-) di het dä churz vorhär gschnappet u gad vertilgt. Ds Quake wo dr Götschi het ghört si di letste verzwiiflete Rüef vo däm arme Hagu xi.

Bi Speis u Trank am zwöite Abe heimer de no es paar Buebli mit Götschis Fasch-Hose xeh:

Während mir gmüetlech üses zNacht verdrückt hei, isch jede vo dene hingerenang ufs WC u mit sehr uffällig vergrösserete Ouge u eidütige Nase-Putz-Bewegige zrügg cho... Mit däm nöi erworbne Muet hei si sech de a Türsteher vom Klub näbä dranne härägwagt. De hei si äuä chli eh z'grossi Röhre gfüehrt. Das Mandli het de eis vo de Buebli wo äuä useghöischt het packt u ad Wand ufedrückt. Ds Hösli het sech äuä chli verfärbt u dBei hei ir Luft zablet. Hahaha. 

I üsere Bar heimer ir Zwüscheziit eh nöii Rundi Biär bstöut. Dr Christoph het de eidütig es Budweiser bstöut. Aber er het, sehr zu sim Unmuet u üsere Belustigung, de es Bud Light übercho. Me cha sägä, dChäunerin het träffsicher erkennt: da het eine nid so gärn Biär...

Ufem Rückwäg simer de no dürd Bourbon-Street gschuenet. Dasch ded wos abgeit u eh Million Bsoffni Lüüt het. Üs passt das nüm so u drum simer ire Näbägass xi. Lustig si aber dChilebuebe wo zwüsche aune Bsoffnige mit Mikrophon predige u probiere verlorni Seele u Sünder mitemne 'you must confess' vorem Fägefüür z'rette. Sehr erfougriich wird die Mannschaft Gottes äuä nid si...

I däm Sinn hei mir zwöi hüt es Hostelzimmer ire alte Chile... S'het iirgendwiä zischt bim dusche. U nach verbrönntem Fleisch gschmöckt womer si ine cho. Saaaaaaaatan!

Adieu, Adieu

Die Sünder