Vietnamese special treats

Guete Morge

Zersch Mau vorewäg... Dr Hundechopf wo mer letstens ufem Märitstand hei xeh, düe mer nech nid zuemuete. Dr Ürsu het ne o scho wieder vom iPhone glöscht. Dr Chrigu hätti dä sicher no, für allfällig interessierti :-)

Nör heimer in Ninh Binh eh wiiteri Spezialität verwütscht. In Saigon unger hets bim Biär trinke ging so Froueli wo eim Wachtu-Eili abiätä. U das xeht de so us:

Di gits zämä mit grüener Mango Salz/Pfäffer und Salz/Chili. Eh grossi Läckerei. In Ninh Binh heimer is de ane Strasserand gsetzt und Bia Hoi (säuberbrauts Biär) bstöut. Eh Jug (1l, vilech o 1.5l) choschtet de 1.-

Sehr zu Ürsu's Fröid hei dLüütlis am Näbätisch Eili gha u wo dAnsch sich bir Chäunerin bemerkbar het gmacht, heter de suuber zähni bstöut. Wo si de si ufem Tisch glandet (u das Wortspiel passt aso sehr guet), hei mer aber de mit grossem Entsetze festgstöut, das üs da eh ganz angeri Spezialität uftischt isch worde. Halb gschlüpfti Bibiilis hets gäh... Danke!

Frage nach em Guetsii bitte a Nicu richte. Das Wildschwoin het so eis gässä. Dr Ürsu het sech ni chönne überwinde u dAnsch het Wachtueili izze uf ihri schwarzi Liste gno :-)

So! U izze no zu de erfröilechere News :-) mir si izze afe ir trochne Halong Bay xi. Wunderschön isch das ded. Hei eh Bootsusflug gmacht u si uf verschiedeni Hügle kraxlet.

Izze simer in Hanoi u warte uf di dopplete Steffs. DSteffi u dr Steff wo im BFE schaffe chöme morn is Biär mit üs. Ungerdesse wärdä üsi Visas verlengeret u mir gö de zwüscheziitlech no ine Nationalpark. Evtl. Gits de dr nächsti Itrag ersch ire Wuche wieder.

Adios

Ansch u Ürsu

Mafia Mafia

Ciao Ragazzi

Mir si im Land vor Mafia acho :-) ändlech. Nachdäm mer iz guet u lang si düre cho, hets is izze doch verwütscht. Mir si i Phong Nha Nationalpark u go Höhline luege :-)

Für da härä z'cho, muess me eh für Vietnam-Verhäutnis huuuuere tüüre Transport näh. 500'000 Dong (20.-) pro Pärson. Natürlech geits o billiger. Aber de muess me drü Mau umstiige u chunt eh Füüfliber billiger drfoh. Hiä acho heimer de probiere eh Rücktransport z'organisiere...

Me wird hiä überau uf eh gliich Ort verwiese: Easy Tiger. Ded acho hets de ganz eh lessige Oustralier gha. You can ask me everything, I know it all. Jo genau. Natürlech heter nüd gwüsst wo nid i sire Broschüre steit. Schlussamänd heimer de müesse eh tüüre Transport näh... Thank you, Mr Everything :-)

Schön isches hiä übrigens o :-)

U so xeh di Höhline us, womer si xi:

Wi riesigi Kathedrale ungerem Bode. Bis zu 50m höch si di Höhline. Sehr idrücklech!

Iz mache mer is ufe Wäg nach Hanoi, womer de üses Visa wei verlengere. U da das scho glii ablouft, müesse mer is chli spuute.

Mir si zwüscheziitlech no in Hue, er alte Kaiserstadt xi u hei ded o no paar schöni Sache xeh. Di wei mir öich nid vorenthalte :-)

Ah ja, u Zug gfahre simer natürlech o no. Es Highlight, sägä aui. Üs hei si im Hotel zNäscht abgschrisse u Holzklass heimer o no müesse fahre. U mit Holzklass si hiä würk 4h Holzbank gmeint. Gruess am Füdli. DFänster si ded vergitteret u e Zug-Anus passt gnau uf, das me das Gitter nid uftuet. Zum Glück heter bim schönste Teil gschlafe u mir hei gmüetlech chönne fötele :-) chum erwachet ischer de i sim schigge Uniförmli cho dr Pölimaa usehänkä. Merci, Anus.

Standesgemäss het dr Zug de bir Abfahrt 1.5h u bi Akunft 3h Verspätig gha. So, das wäris vo üs. Häbäts guet.

Ansch u Ürsu

Gschobe, kocht u Päckli gmacht...

Tschou Zämä

Mir si wieder eleini *sniff* dr Chrigu isch am Fritig gägä Abe wieder hei zue. Nachdäm er sich no schnäu eh Schale het la mache, ischer wieder is Arbeitsläbä zrügg kehrt. Am letste Abe het ne ufem Heiwäg no eh Gans agriffe. Di het gschnatteret und tah. Wo är de nid wunschgemäss ds Territorium het verlah, isch si de wine Furie uf ne los :-) vor Ehrfurcht erstarrt, heter nume no sini Scheiche chönne aspanne. DGans het sech de halb i sine Hose verhedderet und isch äuä abem eigete Muet so verchlüpft, das si nüm richtig het chönne zuepacke. Chrigu füehrt das natürlech uf sini trainierte Oberschänku zrügg. Seis wie's sei. Er isch iz wieder xund u munter deheime. Isch schön xi bisch cho, Chrigu!

Mir si ging no in Hoi An. U das sit izze vier Täg. Isch aso schön hiä. Sehr touristisch, aber schön:

Mitem Chrigu simer no ire Ruinestadt xi. My Son:

Ded härä heimer eh Tour gmacht. Mir drü wo Tours hasse... Natürlech heimer de o wieder eh Guide verwütscht wo sehr zu üs passt... Nach 3/4 Stung im Bus heter de losgleiht. Mitere Gällä wo am Ürsu sini locker i Schatte stöut heter uf üs igschroue, das eim fasch zTrummufäu platzt isch. Ufgrund vom Jahr (the year of the horse), isch üsi Gruppe 'Team Horse' touft worde. Chum ufem Gländ acho, simer de ständig mit "follow me, Team Horse" konfrontiert worde. Das het de ar Ansch nach 10min nüm passt u mir hei is müesse absetze :-)

Yeah, u hüt simer no ire Chochschueu xi. Hei glehrt wime Riisteig, Riisnuudle u no süsch Läckereie macht. Ürsu cha no choche u mir hoffe das mer de das no chöi wo mer hei glehrt wemer wieder zrügg si. 

De chöiter de cho ässä i üsi Wohnig (womer no nid hei u äuä nid so schnäu berchöme) u us üsne Schäli wo mir hei gschickt hei. Ja, das isch o no es Highlight: üses Päckli.

Das heimer mit Lampe, Lampillon u äbä Schäli gfüllt u iz schouklets de di nächste drei Mönet heizue.

So. Izze müesse mer Mau ga mampfe. Häbäts guet u guete Start i Mändig. Mir müesse o früeh uf, nid nume dir. 5:50 isch ufstoh, 6:30 Abfahrt.

Adieu

Ansch & Ürsu

Da Lat

Xin Chào (Hallo)

Mir si izze drei Tag i agnähmer Chüeli xi. In Dalat uf 1500m Höchi. Sehr eh komischi Stadt, wo, wis dr Nicu usdrückt het, so gar nid zu Vietnam passt. DHüüser xeh us wi Deheime, ds Züüg isch ufgruumt u dr Ghüder haltet sech i Gränzä.

Ir Stadt hets es lustigs Huus wo usxeht wi usere Fantasie-Wäut u me cha über dHuusdächer freese:

Ürsu het sech chli müesse zämä näh, wiu er mit zuenähmendem Alter immer meh Höheangst het :-) langsam muesser äuä de deheime afoh Betablocker z'näh zum ga ds Snowboarde. Hahaha.

Einisch heimer no Töffli gmieter u si über Stock u Stei für ne Silk Factory, eh Wasserfau u eh Kafiplantage ga z'luege.

Ürsel het sech immer wieder chli ufgregt das me zweni cha mache. Aber er schiint wi ging dr einzig z'si. Dr Chrigu isch gester Abe am 10ni vor Erschöpfig übermannt igschlafe u het sech ersch am 7ni wieder bewegt.

Gester heimer übrigens no es vietnamesischs Käfeli gno. Das xeht hiä so us:

Hiä stöh aui uf dä Kafi wo si Wiesel z'frässä gäbä u diä när dBohne useschisse. Suberi Sach. Mir as Kafi-Kenner hei das natürlech nid probiert. Derfür heimer, wimer das vo üsere geliäbtä Nachberin glehrt hei, ganz viu Zucker u Milch i Kafi tah :-)

In Mui Ne simer o no xi. U o ded heimer no paar Sache xeh: eh schöne Sunneufgang, eh Wüesti u eh Fischerflotte.

Iz geits wiiter uf Hoi An, wonis de dr Chrigu scho wieder verlaht :-( aber er chunt ja i guet füüf Mönet wieder :-)

No eh Nachtrag zum Kafi :-) säubstverständlech trinkt dPetra ihre Kafi schwarz-schwarz. U het dr Ürsu immer usglacht wiu är nid Kafi, sondern eifach es Miuchgetränk zue sech nimmt.

Häbäts guet u bis nächst Mau

Ansch, Chrigu, Ürsu

Blindi, Busse u ungergangni Märkt

Ahoi

Aso as ersts Mau fougendes: dä Post chunt usemne Sleeperbus. Eh sehr eh amüsanti Erfindig. Bsunders wiu dVietnamese diä o düre Tag nämä u o für Fahrte vo 5h. So xeh diä us:

Drei Koje näbä nang u zwe überenang. Super Sach imne Land wos 35 Grad im Schatte isch u me überau muess dSchue abziäh. Abr wahrschiinlech isch dr Hingergedanke dä, das dr Gstank vom Fuessschweiss eim möglechst schnäu is Land vo de Tröim schickt...

In Can Tho simer no xi u hei zwöi lustigi, aber fotolosi Sache gmacht. Am erste Tag simer id Massage. Zu de Blinde. Di Hütte wo di Massage het stattgfunge isch ganz gspässig. Unge wines Garage, dunkus Stägähuus u Zimmer wo niämer het gseh wo si härä füehre... DAnsch isch ine Ruum wos keh Liächt het gha gfüehrt worde. Ihri Erfahrig hetere da ghulfe. Schliässlech bruuche ja di Blinde weniger Liächt as mir.  Dr Chrigu u Ürsu hättä äuä scho Todesängst usgstande. Di hei nämlech scho Axtmörder hinger jedem Egge xeh. Wo de dMassage agfange het, het Ürsu am Chrigu au zwe Minute flehentlechi Blicke zuegworfe. Di nid-ändendi Tortur isch vom Rügge, dBei ds dürab zu de Füess u wieder ufe. Me seit ja, das kleine Schläge auf den Hinterkopf das Denkvermögen fördern. Das verfäuht bim Ürsu ganz sicher sini Wirkig. I sire Wüesti us Schmärz het är i sim Delirium am blinde Masser sini Wasserfläschä entwändet. Wo dAnsch 30min später gfragt het wenn das me di Wasserfläschä kouft het, isch de o dAntwort entsprächend xi: dasch am Chrigu sini. Ha diä mit abe gno. Wo dä de bemerkt het das das nid sini sigi, isch de dr 'Diäbstahl' ufgfloge. So wiit isches aso scho cho...

Nachemne Apero am Fluss si de dLäbesgeister zrügg kehrt:

Am nächste Morge simer de ga 'the sunken Markets' luege. Em Ürsu isch scho bim Ablick vo de 20 Böötli dr Lade abe. Er het eh Armada us Frücht- u Gmüesböötli erwartet... Nachdämer de eh Schüssle Noodle-Soup verwütscht het, ischer wieder abecho. Im Übrige macht me Noodles wi fougt: me dued Riisteig über Wasserdampf gare, di Runde Platte wärdä när tröchnet u dürne Maschine glah u gschnitte:

In Saigon simer o no Mau xi u hei es wiiters Mau läckeri Suppe verdrückt:

Iz simer, wi xeit, im Bus u hoffe das di Tortur nid länger as di akündete füüf Stung geit. Luft heimer ämu scho fasch keni me.

Sayonara

Nöie Bsuech in Saigon

Guete Morge

Mir si izze dr viert Tag hiä in Saigon u hei sit gester Abe Bsuech :-)

Dr Chrigu daf izze as wiiters Reisemitglied de viele tuusig Töffli hiä uswiiche:

Mir si gester Abe scho mit ihm ga vietnamesischi Pancakes und Seafood Noodles ässä. Für nes Biärli im Strässli hinger üsem Hotel hets o scho glängt.

Vor sire Akunft heimer no amne lustige Stand gad UF dr Strass g'ässä wo öppis wäri xi für üsi Basketballerfraktion. DStüehli si öppe 25cm u ds Tischli knapp 40cm höch xi, Töffli, Outos u Mönsche si knapp näbä düre gfreeset u ds Ässä het knapp 1.- koschtet:

Hiä wärdä am Wucheänd us aune Lädelis Bars. När wird eifach immer wiiter uf dStrass usegstuehlet. Bis knapp di halbi Strass zuegstuehlet isch. Natürlech fahrt ging no glich viu Verchehr. Aui Lüüt hocke när uf dene Schämeli u Mini-Stüehl u trinke Biär. Bis dSchmiär ume Egge chunt. När wärdä sofort i eire Hektik aui Tischli u Stüeuh vore uf dr Strass inemanöveriert u dLüüt bliibe haut de stah :-)

Säubstverständlech nume so lang bis dSchmiär ume Egge isch u de wird fröhlech wieder usegstuehlet. Wis muess si.

So, mir gö glii Mau uf i Fruchtsaft. Bruuche chli Vitamine, nid das dr Chrigu no chrank wird. Dr Ürsu würd sis nöie Spezialgebiät nid gärn wieder abgäh. Woner doch so guet isch, mittlerwiile ;-)

Öich aune eh guete Start id Wuche.

Ansch, Chrigu, Ürsu

Moto Trouble, Stomach Trouble, Vietnam

Hellöu

Mir si sit gester ganz im

Süde vo Vietnam. Uf Phu Quoc, ere Insu gad vor Kambodscha. Eigetlech heimer diä mitemne Töffli wöuä erkunde, aber eh Dünnpfiff-Agriff het dr Ürsu flach gleit. In Kep simer zwöi Mau ga läckere Seafood ässä u ded isch äuä eine vo de Shrimps z'viu xi, füre Ürsu :-)

Izze müesse mer eh Tag ussetze. Vou Fröid het dr Ürsu vori gmeint er chönn scho wieder furze. Was bim erste no tiptop klappt het, isch bim zwöite Mau id Hose :-)

In Kep heimer o no eh lustigi Gschicht erläbt. Ded heimer mitemne Töffli eh Usflug uf Pfäffer-Plantage gmacht:

Scho womer zTöffli hei gmietet hets nüm so viu Luft gha. Das het dr Typ vom Hotel de mitere Velopumpi behobe. Het natürlech nod lang gha und ufem Rückwäg simer de uf dr Fäuge gfahre. DAnsch het de ds Töffli zumne Mech gfahre. Dä het keh Wort änglisch chönne, aber sofort gwüsst was muess gmacht wärdä. Nach erfougriicher Identifizierig vom Loch heter de eh Ladig Liim ufe Pneu gmechet, dä abgfacklet u när dr Chläber druf. Fertig i 10min. Chostepunkt: 2'000 Riel - 50 Rappe. Mir hei huere Fröid gha u däm Mandli gad 10'000 gäh. 

Im Hotel heimer de das üsem Hotelchef verzöut. Em usgwanderete Dan us dr Schwiiz. Es richtigs Arsch. Entschuldigung, nix. Het wöuä wüssä wases koscht het u gfunge er ziäg de das sim Agstöutä vom Töffli ab... Er stimmt äuä o fürd SVP... Tssss

Jo, was heimer no? Natürlech dä geil Fisler wo vorgester binis gwohnt het :-)

So, izze ruiht dr Ürsu no chli us u de mache mer is de morn richtig Ho Chi Min City uf, womer de am Sundig dr Chrigu abhole. U hoffentlech de scho wieder es Bia Saigon mit ihm chöi trinke.

Prost

Ansch u Ürsu

Strand und Ässääääää

Guete Morge

Mir si nid viu wiiter cho sit letst Mau. I gloub öppe genau ei Strand u eis Kaff :-)

Mir hei in Sihanoukville no einisch dr Phipu ufgablet u si mit ihm eh Tag a Strand. Ded heimer is, imne (äuä vergäbleche) Versuech, üsi Voisins (Petra u Cyru) vo üsere Strandtouglechkeit z'überzüüge, sogar im Sand gwäuzt. Das si üs de chöme cho bsueche. Mir hei no ging Sand überau :-)

När simer wiiter uf Kampot. U in Kampot, da chame ässä, wi Gott in Frankriich. Hiä isch jedes Ässä eh Träffer. Zum Bispiu das:

Noodle Soup mit Pork Dumplings, steamed Veggie-Dumplings u Flied Noodles. Sensationel. 

Natürlech heimer o no zwe Usflüg gmacht. Einisch simer mitem Töffli uf Bokor Hill. Ded hets früecher sone verlassni Hill Station gha. Aber dIdylle isch dür nes wunderschöns Casino gstört worde. Dr Sinn für dSchönheit geit de Lüüt hiä mängisch chli ab :-)

Phipu isch de gester ab uf Vietnam u mir zwöi hei es Velo gmietet u es Tüürli (natürlech ir Mittagshitz) gmacht. Di erste 12km heimer de guet gschafft u si zure Höhli im Kalkstein cho:

Üsere Charte fougend, heimer de eh ganze Kreis wöuä mache. DCharte het üsi Höhli genau ir Mitti azeigt. Womer de nach ca. 4km Fäudwäg uf dr Strass si acho, heimer mit Entsetze festgstöut dases no 15km id Stadt zrügg si. Kreis my ass... 

Di 30km töne für öich nid nach viu, aber gloubet is... Mit Hitz, Verchehr u schlächtä Strasse isch das keh Spass... 

Was mer o no hei isch di Läckerei:

Ziäht nech Mau das Wäutklasse-Schüümli vo dere Lemon Pie ine. Grosses Kino.

So, eh guete Sundig öich aune.

Ansch u Ürsu