Abschied näh :-)

Hello

So, mir gspüre dBedbugs ah üs nage u ds Alter i de Chnöche. Entsprächend heimer di letste Täg agfange, üs wi normali Touris z'bewege. Mir chehre i Mittuklasse-Hotels ih u miätä Fahrer zur Fortbewegig ;-) 

Ässä düemer aber nach wi vor uf dr Strass u somit isch nid aus verlore:

Natürlech het di Art reise sini Gründ:

A) hoffe mer das Bedbugs i tüürere Hotels chli weniger verträtä si

B) isch ds reise in ds Jave sehr müehsam (250km i 9h Bus fäge nid)

C) nimmt üs Schwäbus Awäsäheit natürlech 1/3 vo de Chöschte

U so simer de o mit Fahrer uf Borobudur:

Wo mer si acho, hets eh riese-Mönschemängi vor de Tor gha u mir hei is gfragt öb mir überhoupt inechöme. Dr Vorteil Wiisbrot z'si isch, me het eh eigete Igang. Dr Nachteil: me zahlt vier Mal meh :-)

DAnsch überleit sech übrigens üses Grüppli z'verlah u sich ihrere nöie Gäng azschliässä:

O dr Schwab het Ahänger gfunge:

Was uf de erste paar Etage vo Borobudur no einigermasse gange isch, het de ds oberst Obe Überhand gno. Nach 50 Fotos heimer ufhöre zöuä, aber au Meter het öpper wiiteri Biudli wöuä mache. 

Womer de gfragt hei für was di Biudli aui si, hei si entweder gad nüm so guet änglisch chönne oder schelmisch grinset. FB weiss izze ämu das mer in Indonsiä si. So gömer ämu nid verlore...

Nach knapp 2h heimer de ds Gländ fluchtartig müesse verlah.

O hiä no ne chlini Anekdote: dr Schwäbu isch vore junge verhüllte Dame für nes Foto aghalte worde. Woner de, pflichtbewusst, sini Häng bi sech bhalte het, hets gheisse "hands here" u sini Hang isch uf ihri Schultere platziert worde.

Ufem Rückwäg heimer de no eine vo de geilste asiatische Outofahrtricks erläbt. Mir chöme vore Siitestrass uf ne dicht befahrni Houptstrass ohni Chance uf abbiägä. Chum isch me aghalte isch eh junge Herr ad Schibe cho chlopfe u het 2000 Rupie (20 Rappe) id Hang drückt bercho. Drufhii hei sech 6 Type schreiend u winkend Mitts i Verchehr gstöut u üs eh Wäg uf di angeri Siite ermöglechet. Sensationel.

Imne riesige Hindu-Tämpu (Prambanan) simer o no xi u izze mache mer is ufe lang u wiit Wäg nach Bali.

Öich wünsche mer eh guete Wuchestart.

Ansch, Schwäbu, Ürsu