Mir si wieder zrügg in Taipeh u gniesse üsi letste Täg Taiwan. Wobii me vo gniesse eigetlech nid cha rede :-) mir si froh, wemer de uf Malaysia zrügg chöi (obwou ded dBedbugs warte - ir Wuche grännä mer de äuä wieder)...
Gester heimer ufne Hügu ufe wöuä u hei üs mit dr Metro i 30min zur Gondle ufgmacht. Ded acho het üs es Schiudli erwartet: the gondola is closed for reparation every Monday. Okay, safety first. Gueti Sach. De halt zägg ufs Alternativtransporrmittu: dr Bus. Nach 15min isch di gwünschti Nummere acho u mir ineghüpft. Womer de üsi Zieldestination gnennt hei, isch abgwunke worde: road construction. Schön...
Mit dr Metro ire Stündige Rück- u Wiiterfahrt zrügg zumne nächste Sightseeing-Point. Usgstiige u chli umeglaueret, bis mer bimne Fort wo ds Highlight ded isch, si acho: closed. Every first Monday of the Month. Respäkt für si.
Jä guet... So geits. Was heimer süsch no erläbt? Mir si no in Taichung xi u hei ded zwe Usflüg gmacht. Dr erst zumne Tämpu u emne Lampemacher :-)
Dr zwöit zum Sun Moon Lake wo eher Rain Moon Lake hätt söuä heisse :-) ufem Wäg heimer öppe 4x müesse underestah, das mer nid bachnass si worde. Zum Glück heimer eh Tag vorhär no Chirschi kouft zum schnouse.
Am erste Tag in Taipeh simer de gägä Abe no is National Palace Museum. Dr LP warnt vor: many, many peoples :-)
U siehe da: halb China het üs fasch überrennt.
Di si Teil vore öppe 50-chöpfige Reisegruppe xi. U im Museum hets öppe 200 vo dene Gruppene gha. Di einte si de wippend vor Fröid vor dene Ustelligsgägäständ gstange, angeri hei ihri Taupli ad Schiibe drückt u di eltere Lüüt si fröhlech, luut usegorpsend vor de Vasene usem 15. Jahrhundert bliibe stah :-)
Furze u Gorpse isch im Übrige hiä gerne gesehen, resp. gehört. Gester heimer are rote Ample gwartet u chum isch grüen worde het ds Chinamandli, äuä zur optimale Beschleunigung, eine la flättere. Dä het a beidne Füdlebacke drü Mau gflatteret bevor de dBrämsspur im Hösli glandet isch. Sini Müette isch ihm ohni Miene z'verziäh im Gstank hinge nache gwatschlet.
Gester simer no im Chäuer vom Taipei 101 (höchsts Huus vo Asiä) go zNacht ässä. Imne Michelin-Stärn Restaurant wome 45min het müesse astah. Vor NY Times as eis vo de zäh beste Restaurant vor Wäut grated. U was gits ded? Richtig: Dumplings. Zur Perfektion gmacht. Bis zu 16'000 Stück wärdä hiä pro Tag handgfertiget. Jedes Stück muess 21gr si, 5gr Teig, 16gr Füllig. U ds wichtigste, 18x falte. De geit när dr Dampf i dene 4min wo si dampft wärdä genau richtig dür aues. Begriffe? Gut. 1gr oder 1 Falt drnäbä = Dumpling in die Tonne treten.
Eh ganz eh grossi Läckerei. U pro Nase für 10.- chame o nüd sägä :-)
Hiä hättäter no dr agsprochnig Turm u das wärs xi vo üs.
Ansch u Ürsu
Keine Kommentare:
Kommentar veröffentlichen