Nicu het no ei Abe u di letste paar Täg heimer doch no einiges gmacht. Nach Kyoto simer i di japanische Alpe uf Matsumotooooooo (so singt dStationsdame am Bahnhof das). Vom Schloss u em Ässä heimer ja scho verzöut, drum iz no zwöi Gschichtli meh :-)
Bir Schlossbesichtigung hets gad hinger üs es Japanermandli gha wo usem Rache gstunke het, as wener eh Schwarm vergammleti Fischli mitemne Fass Biär abegspüelet hätti. Sehr agnähm. Das gits im Übrige no viu hiä. Aber bim Konsum vo Nato (siehe letste Blogg), wunderet üs das nüd.
Am Abe simer Mau no ines Pub u hei ded ändlech eh betrunkne Japaner xeh flüge. Er het sech probiere zwüsche zwe Tische dürezquetsche, isch umdonneret u het no gad dr Tisch mit-abgruumt. As we nüd wäri xi ischer Richtig WC gstürchlet u mir hei de ersch bi sire Rückkehr xeh, daser zÄrmli chuum me het chönne bewege :-)
Go wandere simer o no u hei Wätterglück gha. Trotz axeitem Rägä simer troch bliibe u hei gmüetlech üses Märschli chönne mache:
DBäre hei aber trotz Warnig nid wöuä fürecho ;-)
När simer no im Manga-District xi u ded het is dr Nicu as ersts ine Noodle World Champion gfüehrt u dä isch würk Wäutklass xi. När heter mit troumwandlerischer Sicherheit dr gröst Manga-Store gfunge. U ded heimer dr eint oder anger Schlingu xeh:
Zwöi heimer imne Egge überrascht wo si dMangapuppe mit de gröschte Huupe im Internet nachegsuecht hei. Di si ganz verdatteret xi wo mer o chli Manga-Meitschi hei wöuä luege. Hahaha.
När simer am Abe uf Ebisu, dasch es Usgangsviertu u ded het dr Nicu es wiiters Highlight gfunge. Curry-Ramen u di het üs dr eint Chäuner zeigt. Dä isch us sim Restaurant gfreeset u mit üs im Schlepptou zum Konkurränt. Sehr, sehr geili Siächä, di Japaner.
När ischs wiiter ine Stehbar u ded heimer nachemne Biärli di grossartigi Idee gha, mir brüüche aui no Sakeglesli. U wiu diä so geili hei gha, wome sogar het döfe mitnäh, heimer när no chli Sake vernichtet ;-))))
@Simä u Karli: bi üs isch Nicu aso ni aggro worde vo Sake. Mir gloube, das het ar Gsöuschaft glägä. Harharhar
Hüt simer no uf Yokohama u ded anes Baseball-Spiu. Hei di billigste Plätz gno u niämer het üs erklärt das das Stehplätz si. U das für 2.- meh eh Sitzplatz hätti chönne ha... Dinne acho heimer de z'oberst ufe müesse u o ded hets ke Platz meh gha. Am Ürsu isch wi ging gad dr Lade abe u er het afah stämpfele :-)
Das hei paar Japaner äuä xeh u si fröhlech zu üs cho u hei üs xeit si heigi Sitzplätz aber wöuä stah... Mir söuä dTickets tuusche u ga hocke. Ürsus Zwänzgabachti-Schnurre het sech de minütlech besseret u wos de no es Biärli gäh het, isch aus wieder guet xi. U weme de meint dJapaner sige ging liisli, het me sech de tüüscht. Da wird gsunge u gholeiet... Mir hei chuum me chönne zämä rede. Staatsreligion das Spiu!
So, izze heimer gad am Nicu Ade xeit u si gad chli sehr truurig.
Aber schön isch xi mit dir, Nicu. Merci viu Mau fürs cho, guete Heiflug u bis bald!!!
Ansch u Ürsu
Ah, Nicu het üs no zumne läckere japanisch Whisky iglade. Dä da hiä isch aso z'empfählä:
Keine Kommentare:
Kommentar veröffentlichen