Nueva York

Hola de Nueva York (müesse ja üebe)

As Wäutebummler hei mir üs in Boston is Maparium ufgmacht. Dir wüsst ni was das isch? Di hei eh Wäutchugle bouet wome drii ine cha u när dWäut vo inne xeht :-) me daf keni Föteli mache. Latürnech... Vo däm laht sich dr Ürsu scho lang nüm lo entmuetige u hiä wär wi das usxeh het:

Nice, eh?

Ir Biblere simer o no xi:

Heinis o wieder Mau es Open-Mic ah tah. Zersch het es greises Mandli es Gedicht vom Fägefüür vo sech gäh. Da isch Ürsus Biär gad schal worde. När het eh Bob Dylan für di ganz, ganz Arme es Stückli gspiut. Es wiiters Mandli het bi jedem vo sine Fähler es Xicht gmacht wine Maa i Chohleschue. Eh alti Glatze het de es blächerns Simon&Garfunkel vo sech gäh. Nachdäm er sini Gitarre 3x het gstumme,  het er de bim Gsang träffsicher bi jedere Note drnäbä ghoue (vom Text här, heter gloub Sounds of Silence vergwaltiget). DGlüsler heter während däm ganz Chatzegjammer nid einisch uftah, süsch häter xeh, das ds Publikum ine Art Liichestarri gfaue isch. Singendi (oder besser jaulendi) Chatze hets o gha... Di ersti het o di ganz Ziit dOuge zämä kniffe. Mir nämä ah, eh spirituelli Sach. Di zwöiti het sech as Rapperin versuecht. Aso eh Queen Latifah wird das äuä nid...

Da het sech dr Ürsu de überleit, das är gliich no Talänt chönt ha... Er chouft sech de deheime eh Kontrabass u vergrabt sech im Chäuer bisers cha. DAnsch lehrt de no Banjo u de heimer dänkt mir chönte mitem Cyru ar Gitarre, er Chris ar Giige, em Götschi am Schlagzüüg u em Rebi as Sängerin eh Country-Band uftue, eh?

Ds beste am Abe si di zwöi Biär u üsi drü Pizza-Slices xi...

U as letsts heimer no es AirBnB mitemne super Zimmer gha. Mit leider zwe Nachteile: emne überängstleche Mami u emne Schreihals-Söhnli. Weme ir Nacht isch ga bisle, isch ds Müetti sofort uf cho luege wär da umegeisteret. U weme zPäch het gha um di 6i ufdswache. Het si das gad as Alass gno afah zMorge zuezbereite. Näb üsem Schlafgemach. U de isch när am 06:30 dr chlii Maa gweckt worde u het üs mit Gejohle bis am 07:50 ungerhalte. Hahaha.

Mir si mitem Bus für 8$ pro Pärson uf NY u hei sogar Wifi im Bus gha. Es richtigs High Tech Erläbnis i amerikanischer Infrastruktur:

Ded acho heimer de wieder es AirBnB gha u das Mau mit üsem Host es bessers Los zoge. Si heisst Linda, isch Künstlerin, Musikerin u Schouspielerin. Si het üs mit ane Kunstustellig vomne Kolleg vo ihre gno. När nachdäm anes Konzärt vomne DJ-Kolleg u am Schluss no ine Club wo de am Mändig es Gratis-Konzärt sigi wome unbedingt müessi ga. 

Dasch aus super xi. Bis mer de deheime ir Wohnig inne festgstöut hei, das mir üsi Zimmertüüre nid hätte söuä bschliesse. Da keh Schlüssu vorhande isch. Hahaha. De heimer is ir Nacht spät as Lock-Picker probiert:

Langfinger Känu het de das, zimli erfouglos, i sini begnadete Häng gno... Nach 15min heter de dr Schrubezieher gno u das mit roher Gwalt erlediget. Sehr zum Erstuune vo üs aune, heter de di Tüüre ufbracht. Ohni Tür z'verschliisse, dr Schrubezieher z'vermorxe und, wichtig, sini Taupli si o unversehrt. U iz heter ds Gfüeuh er chönt in die Gilde der Diebe iträttä. Hahaha.

Öich es guets Wucheänd!

Ansch u Ürsu