Steihüüfe

*sing* Feliz Navidad, Feliz Navidad *sing*

Mir ghöre scho di erste wieder: ööööu, scho wieder Steihüüfe... Und ja, nach Wasserfäu, Böim, rote Feuse u Lüüchttürm si izze dSteihüüfe dranne. Das Mau heimer für öich: Chichen Itza

Natürlech hets eh huere Huufe Lüüt in Chichen Itza u mir hei ere dicke Amerikanerin zueglost wi si sich bim Guide beschwärt het. Letst Jahr, da sig si im Amazonas xi. Bimne 'remote tribe' wo no niä eh Tourist xeh heigi. 'Almost untouched' sige diä xi. Mir hei is de di entsetzte Xichter vo dene Buschmönsche vorgstöut wo dä Elefant in Pink i ihres Dorf gwalzt isch. 

Und Ek Balam:

Übrigens hei mir no zPendant zu de Asiatische Frösche gfunge :-) für aui wo nid wüsse was das isch: dAsiate verchoufe sone Schissfrösch us Holz wome mitemne Pänggu cha übere Rügge striiche u de quaket dä so soublöd. Hiä in Mexico hei si eh Tonflöte wo me cha dri blase u de dönds wine Jaguar schreit/fuucht:

Aber mir wüsse, üsi Läserschaft isch aspruchsvou. Drum hättä mer näbst Steine o no es Föteli us Valladolid z'biätä:

U natürlech o no eis vom Ürsu, wo langsam zum Hippster mutiert u näb Bart u Holzbrille iz o scho grüeni Drinks zum zMorge nimmt. Är möcht sich aber wehre u zu sire Verteidigung sägä, das är nid gwüsst het das das es grüens Blatt isch wo da i si Drink gschmugglet isch worde ;-)

Eh wiitere Drink-Highlight isch de dPiña Picante xi. Früsche Ananas-Saft mit chli Salz u Chili. Para puro mexicanos:

U natürlech daf o dWiähnachte hiä nid fählä. Drum fahrt hiä dr Coca-Cola Truck mit Samichlous düre (obwou dRegierig 2013 Süessgetränk um 1 Peso pro L tüürer gmacht het, weil muchos gordos en Mexico):

Üsi nächsti Station heisst Merida. U mit däm beände mir dä Blogg.

Hasta luego.

Ansch u Ürsu