Mir chöi sit letster Nacht stouz biiträtä id 0-Grad Camper-Gang. Mir si izze bim Grand Canyon und das am Nordrand. Ded isch öppe 2'500m über Meer u entsprächänd wirds izze iischalt :-) wi überläbt me das, fraget dir öich? Ganz eifach: mitem Zibeleprinzip. Mir hei in SF dicki, nöii Stinkseck kouft wo gemäss Packigsbiilag bis -12Grad werme (was aber sicher nid stimmt...). Derzue schleipfe mer i üsem Schnägähuus sit 9 Mönet üser aute Stinkseck mit. Gägä dCheuti heimer diä izze fürezouberet u si mit dene i di nöie ine. Natürlech mit üsere Odlo-Ungerwösch u siehe da: warm isch ds Näschtli. Di gröschti Gfahr isch izze, weme ir Nacht erwachet u uuuuuunbedingt muess ga biisle. De muess me sech us dr Zibele befreie u när zum WC (wo meistens sehr erfröilecherwiis mehreri 100M vom Zäutli wäg isch) waggle. Dr Hii- u Rückwäg isch ded wo Gfahr luuret, das me zur Iissüüle erstarrt. Zrügg im Zäut stöut me de fest, das ds Nästli natürlech di gwünsti Betttemperatur a di fröstelnde Temperature dusse abgäh het. De stramplet me bises warm isch u hofft, das me nid no es zwöits Mau muess ga ;-)
So xehter us dä Grand Canyon. Mi cha das nid so beschriibe. Es isch wunderschön u riesig. Mi steit so ded u fragt sech, wi äch das so gange isch anno dazumal. Mir hei uf au Fäu sehr Fröid gha u finge, weme gad ir Gägänd isch, cha me da Mau ga driigügsle.
Näbst dr Cheuti heimer is dä o süsch müesse verdiene. Womer am 14:30 si acho hets überau gheisse: Full. De simer ganz nätt ga frage öbs äch no es Plätzli für üs heigi. U huere hässige Griesgram het üs de belehrt wi viu Reservierige är heigi u blabla. Het sech de erbarmt u üs eh schöne Platz überlah. Mir abzottlet u dänkt dä sig de am nächste Tag nid ume. Denkste. Womer am nächste Morge am 9i di agstange für nes Plätzli heter üs wieder dumm agmacht u xeit mir müessi Platz wächsle. Da üser Nachbere früecher abgwanderet si, heimer dene ihre Platz wöuä. Er heigi nüd frei u gad dä wäg gä u üse sig ou furt. Dummerwiis si de gad 2 Lüüt uftoucht wo o früecher si gange u de heter nüm angers chönne. Mir hei de eh Platz übere züglet u ir Nacht festgstöut: üse gestrig Platz isch läär bliibe. Het äuä eine es chliises Schneebele u dued sis ramponierte Säubstbewustsii mit Wichtigtuerei stimuliere. Huere Schnouz..
So xehts übrigens ume Grand Canyon us. Nüd mit Wüesti u so. Wi mir unwüssende gmeint hei :-)
Vorem G. Canyon simer no im Valley of Fire xi. Das isch auso o schön ded. Fisler hets ded o wieder u krassi, roti Felse.
Jo, viu meh heimer gad nid. Mir gö izze wieder richtig wermi (so hoffe mer).
Häbäts guet u bis zum nächste Mau
Keine Kommentare:
Kommentar veröffentlichen