Faus sech di einte oder angere gfragt hei, werum mir dene Busse hiä Chicken Bus sägä. Hiä wäri Ürsus Sitznachbar:
Wobii Sitznachbar nid ganz korräkt isch. Eher Stehnachbar. Er het nämlech 2h döfe stah im Bus u ds Huehn het ihn obe ir Gepäck-Ablag argwöhnisch beäugt :-)
DAnsch het währenddesse am Bode müesse hocke ds Päärli wo rächts u links vor ihre isch ghocket, het unbedingt no müesse obe ihre düre knutsche. Iklemmt ganz hinge im Bus isch si de nätterwiis vom dicke Conductor no fasch verquetscht wordey Dir xeht: es geit öppis.
Izze simer in Antigua. U hiä isches richtig schön. Umgäh vo Vulkän, mit flache, farbige Hüüsli:
Wi sech's ghört hets is natürlech o no Mau dRänze verwicklet u is düregspüehlet. Aber keh Angst. Hilfe ist nah:
Pepto-Bismol cha aues töde. Ei Schluck u di drin enthaltnige radioaktive Stoffe döde aus ab. Muerto el Chäfer. Näbäwirkige het das Gsöff keni. Aber dr Ürsu weiss, nachdäm me i eim Läbä drü Fläschli drfo het trunke, passiert das:
Da är bis iz scho 2.5 het gha, wärde dReisetätigkeite bis uf wiiteres igstöut. Hahaha.
Vo Antigua heimer as ersts eh Usflug uf Chichicastenango gmacht. Dasch eine vo de gröschte Märkt in Zentralamerika u dWiisbrot schwärme us. Mir hei is knapp chönne zrügghaute mit Maske u Stoubfänger choufe. Trotz good price.
Bi dere Läckerei hiä heimer nid chönne wiederstah:
Licuado de Fresa :-) Ärdbeer-Miuch. Läckerei.
As zwöite Usflug simer zum Lago de Atitlan. Schön isches ded:
Ded heimer es Fährtli mitem Schiffli gmacht. S'het liächt Wäuä gha. Ds Schiffli isch zum Glück deckt xi. Aber me fahrt natürlech o gägä dWäuä Vollgas. Was passiert isch klar. DBandschiibe liidet. Diä mit guetem Rügge si beglückt, wiu das ja chli isch wi im Europapark. We de no ds Mandli vor eim ufsteit u me scho vo wiitem xeht dases ihm bir nächste Wäuä dr Schädu wird adonnere, de chame sech fröie. U de, wi dAnsch, bim erste dumpfe Schlag afah göisse vor Fröid. We de us däm nüd glehrt wrd, de faht dAnsch de irgendwenn vor lache afah Träne vergiesse :-)
Jup, so isch das. U im einte Kaff am Lago Atitlan, ded chöme as dFiuzlüüs u dBedbugs här. Läck hets ded eh Asammlig vo dene. So öppis heimer no niä xeh. Was diä ded aui mache isch üs es Rätsu. Aber ded heimer das nättä Japan-Mandli troffe. Das het i aller Seelerueh uf sim säuberboute Grill Yakutori (Spiässli) u Miso-Suppe gmacht. Das het sech Ürsel natürlech nid chönne la entgah
Am Abe chame de in Antigua no bim schönem Sunneungergang uf dTerasse u eh läckeri Michelada verdrösche:
So muess das si.
Guete Start öich is Arbeitsjahr ;-)
Ansch u Ürsu
Keine Kommentare:
Kommentar veröffentlichen