Eigetlech heimer dä Blogg 'Chicken Bus II' touft gha. Aber mir hei ar Susie no wöuä eh Schreck ijage bevor mer se de wieder chöi umarme ;-)
Aber: first things first:
Heiter gwüsst das aui Chicken Busses ursprünglech Ami-Schuelbusse si? Di wärdä nach 10 Jahr oder 150'000km usgmusteret u versteigeret. Wärde när uf Mexico abgschleppt, chöme stärcheri Möcke, breiteri Sitze u eh nöie Astrich. När geits uf Zentralamerika wo si 7 Tag ir Wuche, 14h am Tag fahre. I eim Tag fahre si meh as in Amerika ihre Wuche.
Dä Negro Primero (dasch nume für diä wo in Venezuela si xi lustig - ded heisst eh Chopf ufere Banknote so) hets i Blogg gschafft wiu är während 3/4h ke Ton troffe het. Derzue heter eh Schildchrotte-Panzer und eh Muschle (Caracol) as Instrumänt missbruucht. Z'lüstigste isch aber xi, woner het verzöut das di Muschle am beste sigi mit Cilantro, Cebolla u Tomate. El caracol es el viagra del negro. Amen.
Dasch eh Chile in San Salvador. Schön, nid? Di Stadt isch aso no interessant. S'het huere viu Lüüt u di fisle aui wi imne Ameisehuufe umenang. Z'sehenswärtiste si dChiile (was o öppis heisst):
In Guatemala City simer o no xi u hei ds Huus vo Ürsu's Grosi gfunge. U das muess natürlech o ufe Blogg:
Ded heimer am Abe imne Resti mitemne Guatemaltek gredt. Är isch scho ir Schwiiz xi, vo ded is Elsass, woner sis schlimmste Erläbnis heigi gha. Di heige ihm öppis vorgsetzt wo 'fuerte' sigi. Da heig är dänkt: 'i bi Guatemaltek, öie shit chani längst ässä' u heigi härzhaft abbisse. S'sig ihm de id Nase ihne u er heigi gmeint sini letsti Stund heigi gschlage. Jäjo, Cheibe Meerrettich ;-)
U izze no zum Titu... Mir si hüt in San Salvador hei glüffe u de het eh Charre hinger üs plötzlech beschlöiniget, isch näb üs düre u dr eint möögget 'go back to your fucking country' use. Das wär no gange. Mir gö ja schliesslech glii hei. Unagnähm isch xi, daser gad vor üs rächts abboge isch u mir angst hei gha daser de no Mau vo hinge chunt. So nachem Motto: platta o plomo (Gäud oder Blei).
Mir heis de mitem Bus (wo es 20gi chost) heigschafft. U si de vor luuter Chlupf is Biär:
U gad näb üs ine salvadorianischi Pizzeria (vo üsere AirBnB-Mom). Ded hets zwe chlini Pizzas, 2 Biär u 2 Cheesebread für 10$ gäh. Eh faire Priis, finge mir. Das doch no Bluet fliässt heimer de üses Cheese-Bread erschosse ;-)
Pizza isch natürlech nid ds National-Ässä. Das si Pupusas:
Äh Läckerei. Bsunders o für Vegis. Mais- oder Riismählflade mit X Füllige. Eh grossi Läckerei. Da het üs üsi Hostmum härä gfüehrt. Dir merket, si isch eh Liäbi.
So! Häbets guet u bis nächst Mau.
Ansch u Ürsu
Keine Kommentare:
Kommentar veröffentlichen